Anij Ekar Jiron̄ Kōj Bwe jen Peptaij

Jisōs Kraist ekar kōm̧m̧ane juon waanjon̄ak kōn peptaij jān juon eo ewōr ippān mālim an Anij.

Ilo an jab ļap meļeļe ko kōn lukkuun mour eo an Jisōs Kraist, jejeļā ke Ekar peptaij ke ekar 30 an iiō (lale Luk 3:23). En̄in ej jet men ko jemaron ekkatak kōn peptaij jān waanjon̄ak eo An.

N̄an Kajjojo Armej

Eļan̄n̄e em̧m̧an jon̄ad im maron̄ bōk eddo n̄an jeļā oktak ikōtaan jim̧we im bōd, Jemedwōj Ilan̄ ekōņaan bwe jen peptaij (lale Katak im Bujen Ko 18:42). Jisōs ekar wānōk, ak Ekar kālet wōt bwe en peptaij n̄an ļoor kien ko an Anij (lale Matu 3:13–17; 2 Nipai 31:7). Barāinwōt ro em̧ōj aer kadede mej remaron̄ bar peptaij. Jej kōm̧m̧ane menin n̄an er ilo ad peptaij kōn er ilo tampeļ ko. Lale Katak im Bujen ko 128:15–18

Kōm̧m̧ane kōn Mālim

Jisōs ekar jab peptaij ippān jabdewōt. Ekar etal ippān eo nej Jein etan Jon, eo ekar wōr ippān mālim eo an priesthood jān Anij. Ālkin an kar Jisōs mej im ālkin aer kar m̧an rikaļoor ro An, mālim eo an priesthood ekar jako jān laļ in. Innem, ilo 1829 eo, Jon Ripeptaij ekar waļo̧k n̄an Josep Smith im leļo̧k n̄an e mālim n̄an peptaij ilo etan Anij. Ak kōn Jepļaaktok in, jemaron̄ bar peptaij kōn ejja mālim in wōt rainin.

Juon Kallim̧ur Me Ruo-Wāween

Peptaij ekoba juon kallim̧ur me ruo-wāween, ak bujen, ikōtaad im Anij. Jekar kallim̧ur:

N̄an bōk iood make etan Kraist.
Keememej E Iien Otemjej.
N̄an kōjparok kien ko An.

N̄an ukōtļo̧k, Anij ej kallim̧ur bwe Jetōb eo An enaaj pād ippād. Naan kein ilo jar in kwojkwoj eo ej kakeememej kōj kōn bujen in aolep wiik. (Lale Katak im Bujen Ko 20:77, 79.)

Bōk Jetōb Kwojarjar Ej juon M̧ōttan Eaorōk an Peptaij

Ālkin an kar Jisōs peptaij, Jetōb Kwojarjar ekar waļo̧k ilo nememein juon mūle (lale 2 Nipai 31:8). Rainin, ālkin an armej peptaij, rej kapen. Meļeļein rej bōke juon kōjeraam̧m̧an eo ejeņoļo̧k eo me rej karuwaineneik er n̄an bōk menin letok an Jetōb Kwojarjar n̄an karreo ilo mour in jetōb (lale 2 Nipai 31:17). Jetōb Kwojarjar emaron̄ kakōl kōj kōn joreen, kaeņōm̧m̧an kōj, tōl kōj n̄an kōm̧m̧ani kālet ko rejim̧we, im jipan̄ kōj en̄jake iakwe eo an Anij (lale Katak im Bujen Ko 39:6).

Jemaron̄ Ukweļo̧k Aolep iien

Anij ekar jeļā bwe jenaaj kar kōm̧m̧an bōd. Jekdo̧o̧n kijejeto ko ad rem̧m̧an tata, jenaaj jerawiwi im likjab n̄an mour ekkar n̄an kallim̧ur ko ad ke jaar peptaij. Innem Ekar letok n̄an kōj kajjojo bar iien n̄an ad bar ukweļo̧k. (Lale Katak Im Bujen Ko 18:13 Aolep raan jemaron̄ kate kōj jon̄an ad maron̄ n̄an joļo̧k bōd im kajim̧weik bōd ko ad. Jemaron̄ jar im kajjitōk ippān Anij n̄an jeorļo̧k ad bōd. Innem,eļan̄n̄e jenaaj bōke kwojkwoj eo kōn bōro ettā, Jetōb Kwojarjar emaron̄ pād ippād (lale 3 Nipai 18:11).

Ta eo Jeje ko Rekwojarjar rej Ba kōn Peptaij?

Mama im Baba rej aikuj jipan̄ ajri ro kōppopo n̄an peptaij (lale Katak im Bujen Ko 68:25

Ro laļin ruwalitōk iiō rejjab aikuj peptaij (lale Moroni 8).

Eļan̄n̄e jej peptaij, jej kallim̧ur n̄an “jān ippān ro rej jān; … kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im aolep jikin ko” (Mosaia 18:9).

© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly Liahona Message, February 2021. Marshallese. 17464 874