Monthly Liahona Message, February 2021

Yoeg Got Ngodaed ni Ngaed Tawfe Gaed

Yesus Kristus e yaen u wo’en e tawfe ku be’ ni ke pi’ Got motwon.

Dani yo’or mornga’agen e yafos ku Yesus Kristus ni gadaed manang, machane gadaed manang mini’ tawfe nag ni gonpa’an 30 e duw rok (mu guy ko Luke 3:23). Ba’aray boech banan ni kad filed ni mornga’agen fare wo’en e tawfe ntay Ngak.

Fan Ngak Gubin e Gidii’

Fa’anra kad ilal’ gaed ma kad nanged e tin nib mat’aw nge tin nib kireb, ma aram ni ba’adag e Chitamangdaed nibay u Tharmiy ni ngaed tawfe gaed (mu guy ko Doctrine and Covenants 18:42). Yesus e bee’ nib polo’, machane ke mel’eg ni ngan tawfe nag me fol ko fapi motochiyel rok Got (mu guy ko Matthew 3:13–17; 2 Nephi 31:7). Gubin e gidii’ nike yim’ e krayag ni ngan tawfe nifan ngoraed. Gadaed ma rrin’ e biney ni fan ngoraed napan nran yaen nga temple ngan tawfe nifan ngoraed. (Mu guy ko Doctrine and Covenants 128:15–18.)

Yib rok be’ ni bay Motwon

Yesus e gathi mel’eg demuturug e en ni tawfe nag. Ya ke yaen ngak e cousin rok ni John, nibay gelngin fare priesthood rok ni ke yib rok Got. Tomuren ni yim’ Yesus min lii’ pi gachalpen Rok, ma fare gelngin fare priesthood en chuweg u fayleng. Ma napan, ko 1829, John fare Tawfe ke yib i m’ug ngak Joseph Smith me pii’ motwon ni nge tawfe u dakean fithingan Got. Bachan e biney nikan fulweg, ma aram nrayag ni ngaed tawfe gaed ko biney e gelngin e daba’.

Ba Micheg ni L’agruw Kanawo’en

Tawfe e ba micheg ni l’agruw kanawo’en, fa ba m’ag, u thilin daed nge Got. Kaed michegned:

1. Ni gadaedra fek nga dakean daed fithingin Kristus.

2. Ni gubin ngiyal’ ma bay u wun’daed.

3. Ni ngan fol ko fapi motochiyel Rok.

Ma ra fulweg, i Got ni micheg ni fare Kan ni Thothup Rok e gubin ngiyal’ ma bay i par rodaed. Meybil ko sacrament e ma pug oran ngodaed e biney ni gubin e wik. (Muguy ko Doctrine and Covenants 20:77, 79.)

Thapeg fare Kan ni Thothup e kabyang ko fare Tawfe ni th’abi Ga’fan

Tomuren ni kan tawfe nag Yesus, me yib fare Kan ni Thothup nga dakean ni boed yaʼan ba bulogol (mu guy ko 2 Nephi 31:8). Daba’, napan tomuren nran tawfe nigey, ma aram min michegney. Biney e be yip’fan ni bay ni thapeg ba tawa’ath ko manʼaegfan ko denen u dakean fare Kan ni Thothup.(mu guy ko 2 Nephi 31:17). Fare Kan ni Thothup e rayag ni nge taʼmagaran e mada’ad ngodaed, fa munguy nagdaed, fa powi’iydaed ko tin nib mat’aw, fa ayuwegdaed ngaed thamiyed e tu’ufeg rok Got (mu guy ko Doctrine and Covenants 39:6).

Gubin Ngiyal’ ma Rayag ni ngan Kalngan’uy

Got e manang ni gadaedra rrin’ e togan. Demuturug gelingin e athamgil rodaed, ya gadaedra denen mab momaw’ rogon ni ngan ayuweg fare m’ag ko tawfe. Ere ke pi’ ngodaed wo’en ni ngan kalangan’. (Mu guy ko Doctrine and Covenants 1:38 Gubin e rran ma rayag ni ngaed wenig gaed min mat’aw nag e tin ni yibe rrin’ nib kireb. Rayag ni ngan meybil ngan fith ngak Got ni nge n’agfan rodaed. Ma napan, ni gadadra thapeged fare sacrament u fithik e guman’, ma rayag ni par fare Kan ni Thothup rodaed (mu guy ko 3 Nephi 18:11).

Mang e ma Yoeg e Thin nib Thothup ni mornga’agen e Tawfe?

Galibthir e thingar fal’agew rogon pifak row ko tawfe (mu guy ko Doctrine and Covenants 68:25).

Bitir ni meruk e duw rok nga but’ e dani tu’uf ni ngan tawfe nag (mu guy ko Moroni 8).

Napan nran tawfe nagdaed, ma aram ni kad michegned nra “kirbaenʼmed ngakʼ e piʼin nibe kirbaenʼ; … mi gimed falʼeg laniyaenʼ e piʼin nib tʼuf rokʼ ni ngan falʼeg laniyaenʼ, pired ni gimed e pi mich rokʼ Got ni gubin e ngiyalʼ ngo fithikʼ gubin banʼen, nge gubin yang ni gimed bay riy,” (Mosiah 18:9).

© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Piliyeg ko Monthly Liahona Message, February 2021. Yapese. 17464 905