“Jezikri Mande Nou pou Nou Pran Sentsèn,” Liahona, Mas 2021
Mesaj Mansyèl Liahona, Mas 2021
Jezikri Mande Nou pou Nou Pran Sentsèn
Lè nou sonje Sovè nou an chak semèn, nou pirifye epi nou geri.
Anvan Li te mouri, Jezikri te manje yon dènye manje yo rele Dènye Repa a. Nan fen repa sa a, Li te entwodui sentsèn bay moun ki t ap suiv Li yo. Li te kase pen an epi li te beni li. Li te di yo “Se pou nou fè sa pou nou ka toujou sonje mwen,” (Lik 22:19). Apresa Li te beni epi pataje yon gode diven.
Yon Pati nan Adorasyon Chak Semèn
Lè Legliz Jezikri a te retabli sou tè a, sentsèn nan te vin yon pati nan adorasyon chak semèn nan. Pandan reyinyon sentsèn legliz la, moun ki gen prètriz beni sentsèn nan epi yo distribye li. Yo priye avèk pawòl ki nan ekriti yo (gade Mowoni 4; 5). Apresa chak moun nan kongregasyon an manje pen an epi bwè dlo a pou yo ka sonje Jezikri ak sakrifis Li pou nou an, jan Li mande pou nou fè sa a.
Se Angela Suitter ki fè foto a
Preparasyon pou Patisipe
Pou nou prepare pou n pran sentsèn nan, nou ta dwe reflechi avèk onètete sou lavi nou ak chwa nou yo. Nou ta dwe repanti pou erè ak peche nou te fè nan semèn ki pase a, epi mande Bondye pou L padone ou. Nou pa bezwen pafè pou nou pran sentsèn nan, men kè nou ta dwe enb.
Priyè nan Jetsemani, pa Del Parson
Plis Pase Pen ak Dlo
Pran sentsèn se yon moman ki sen ak sakre. Priyè sentsèn yo raple nou ke, pandan n ap pran pen ak dlo a, n ap sonje kò Jezikri ak san L Li te bay pou nou an. Nou pwomèt pou nou suiv Li epi mennen yon lavi kretyen. Nou pwomèt pou nou eseye respekte kòmandman Bondye yo. An retou, Sentespri a ap ba nou rekonfò, gide nou epi geri nou.
Renouvèlman Alyans
Lè sila nan pami nou ki batize yo pran sentsèn avèk yon kè ki pi, nou renouvle alyans nou te fè nan batèm nan. Sa gen ladan l resevwa Sentespri a epi pwòpte anba peche kòmsi nou te batize ankò. Se espwa ak mizèrikòd sa a Jezi ofri chak nan nou. Li pa janm twò ta pou nou repanti ak jwenn padon.
Pou Nou Toujou Sonje Mwen, pa Gary L. Kapp, pa gen dwa kopye
Kisa Ekriti yo Anseye sou Sentsèn?
Nou ta dwe egzamine tèt nou espirityèlman, pandan n ap gade andedan nou avèk onètete, anvan nou pran sentsèn nan (gade 1 Korentyen 11:28).
Apre Li te Resisite, Jezi te montre pèp Li a nan Amerik la kijan pou yo te pran sentsèn (gade 3 Nefi 18).
Pwofèt modèn yo di nou pou nou itilize pen ak dlo pou sentsèn, men sa nou manje oswa bwè a pa vrèman enpòtan (gade Doktrin ak Alyans 27:2). Kèk fwa moun ki gen alèji yo oblije itilize yon lòt bagay nan plas pen an.
© 2021 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, March 2021. Haitian Creole 17464 036
Dènye Repa a, pa Carl Heinrich Bloch; foto yon jènfi k ap priye pa Angela Suitter; Priyè nan Jetsemani, pa Del Parson; Pou Nou Toujou Sonje Mwen, pa Gary L. Kapp, pa gen dwa kopye