Bulanan nga Mensahe sa Liahona, Marso 2021

Gin-agda Kita ni Jesucristo nga Mag-ambit sang Sakramento

Ginatinloan kag ginaayo kita samtang aton ginadumdom ang aton Manluluwas kada semana.

The Last Supper [Ang Katapusan nga Panyapon], iya ni Carl Heinrich Bloch

Antes Sia mapatay, nagkaon si Jesucristo sang katapusan nga salu-salo nga gintawag ang Katapusan nga Panyapon. Sa katapusan sining salu-salo, ginpakilala Niya ang sakramento sa Iya mga sumulunod. Ginpamihakpihak Niya ang tinapay kag ginbendisyunan ini. “Himoa ninyo ini sa handumanan nakon,” siling Niya (Lucas 22:19). Dayon Iya ginbendisyunan kag ginpalibot ang tagayan sang alak.

Parte sang Semanal nga Pagsimba

Sang ginpanumbalik sa duta ang Simbahan ni Jesucristo, nangin bahin sang semanal nga pagsimba ang sakramento. Sa tion sang simba, ginabendisyunan ang sakramento kag ginapanagtag sang mga nagakapot sang priesthood. Nagapangamuyo sila gamit ang mga tinaga halin sa balaan nga mga kasulatan (tan-awa sa Moroni 4; 5). Dayon ang kada tawo sa kongregasyon nagakaon sang tinapay kag nagainom sang tubig para dumdumon si Jesucristo kag ang Iya sakripisyo para sa aton, sa paagi nga ginpangabay Niya sa aton.

Litrato ni Angela Suitter

Paghanda sa Pag-ambit

Para maghanda sa pag-ambit sang sakramento, dapat tampad naton nga panumdumon ang aton mga kabuhi kag mga pagpili. Dapat naton hinulsulan ang mga sayop kag mga sala sang nagligad nga semana, lakip na ang pagpangayo sa Dios sang kapatawaran. Indi naton kinahanglan nga mangin perpekto para mag-ambit sang sakramento, kundi nga dapat mapainubuson ang aton mga tagipusuon.

Prayer at Gethsemane [Pangamuyo sa Getsemani], iya ni Del Parson

Labaw pa sa Tinapay kag Tubig

Ang pag-ambit sang sakramento isa ka sagrado, balaan nga tion. Ang mga pangamuyo sa sakramento nagapadumdom sa aton nga samtang nagaambit kita sang tinapay kag tubig, ginadumdom naton ang lawas kag dugo nga ginhatag ni Jesucristo para sa aton. Nagapromisa kita nga magsunod sa Iya kag magpangabuhi bilang Cristohanon. Nagapromisa kita nga tinguhaan naton nga tumanon ang mga kasuguan sang Dios. Bilang balos, ang Balaan nga Espiritu magapaumpaw, magagiya, kag magaayo sa aton.

Pagpabakod sang mga Kasugtanan

Kon kita nga mga ginbunyagan nagaambit sang sakramento nga may matinlo nga tagipusuon, ginapabakod naton ang kasugtanan nga aton ginhimo sa bunyag. Nagalakip ini sang pagbaton sang Balaan nga Espiritu kag pagkalimpyo sa sala nga daw ginbunyagan kita liwat. Amo ini ang paglaum kag kaluoy nga ginatanyag ni Jesus sa kada isa sa aton. Indi pa ulihi para maghinulsol kag mapatawad.

Nga Inyo Ako Dalayon nga Dumdumon, iya ni Gary L. Kapp, indi pwede kopyahon

Ano ang Ginasiling sang Balaan nga mga Kasulatan parte sa Sakramento?

Dapat naton usisaon ang aton mga kaugalingon sa espirituhanon, nga matuodtuod nga ginabinagbinag ang sulod naton, antes mag-ambit sang sakramento (tan-awa sa 1 Mga Taga-Corinto 11:28).

Pagkatapos sang Iya Pagkabanhaw, ginpakita ni Jesus sa Iya katawhan sa kadutaan sang Amerika kon paano mag-ambit sang sakramento (tan-awa sa 3 Nefi 18).

Ang moderno nga mga propeta naghambal sa aton nga maggamit sang tinapay kag tubig para sa sakramento, pero indi importante kon ano ang aton ginakaon ukon ginainom (tan-awa sa Doktrina kag mga Kasugtanan 27:2). Kon kaisa ang may mga allergy kinahanglan maggamit sang lain nga daw pareho man sa tinapay.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, March 2021. Hiligaynon. 17466 861

The Last Supper [Ang Katapusan nga Panyapon], iya ni Carl Heinrich Bloch; litrato sang lamharon nga babayi nga nagapangamuyo iya ni Angela Suitter; Prayer at Gethsemane [Pangamuyo sa Getsemani], iya ni Del Parson; Nga Inyo Ako Dalayon nga Dumdumon, iya ni Gary L. Kapp, indi pwede kopyahon