“Indawat ni Jesucristo Kadatayo nga Umawat iti Sakramento,” Liahona, Marso 2021
Binulan a Mensahe iti Liahona , Marso 2021
Indawat ni Jesucristo Kadatayo nga Umawat iti Sakramento
Madalusan ken maagasantayo no laglagipentayo ti Mangisalakantayo iti tunggal lawas.
Ti Maudi a Pangrabii, ni Carl Heinrich Bloch
Sakbay a natay, nangan ni Jesucristo iti maysa a maudi a pannangan a maawagan iti Maudi a Pangrabii. Iti gibus daytoy a pannangan, inyam-ammona ti sakramento kadagiti pasurotna. Pinirsapirsayna ti tinapay ken binendisionanna daytoy. “Aramidenyo daytoy a panglaglagip kaniak,” kinunana (Lucas 22:19). Kalpasanna binendisionan ken imbinglayna ti maysa a tasa ti arak.
Paset ti Linawas a Panagdaydayaw
Idi naisubli ti Simbaan ni Jesucristo iti daga, ti sakramento nagbalin a paset ti linawas a panagdaydayaw. Kabayatan ti pannakimisa, ti sakramento ket bendisionan ken ipasa dagiti addaan iti priesthood. Agkararagda a mangus-usar kadagiti balikas manipud kadagiti nasantuan a kasuratan (kitaen iti Moroni 4; 5). Kalpasanna mangan iti tinapay ken uminum iti danum ti tunggal tao iti kongregasion a panglagip ken ni Jesucristo ken ti sakripisiona para kadatayo, ti wagas nga indawatna kadatayo.
Rinetrato ni Angela Suitter
Panagsagana a Makiranud
Tapno agsagana nga umawat ti sakramento, nasken a sipupudno a panunotentayo maipapan iti biag ken pilitayo. Nasken nga agbabawitayo kadagiti biddut ken basbasoltayo iti napalabas a lawas, agraman ti panagkiddaw iti Dios iti pammakawanna. Saan a nasken nga agbalintayo a perpekto tapno umawat iti sakramento, ngem nasken a napakumbaba ti puspusotayo.
Panagkararag iti Getsemani, ni Del Parson
Ad-adda pay Ngem iti Tinapay ken Danum
Ti pannakiranud iti sakramento ket maysa a sagrado, nasantuan a kanito. Ipalagip kadatayo dagiti kararag ti sakramento a no makiranudtayo iti tinapay ken danum, laglagipentayo ti bagi ken dara ni Jesucristo a naited kadatayo. Ikaritayo a sumurot Kenkuana ken agbiag a Kristiano. Ikaritayo a mangpadas a mangtungpal kadagiti bilin ti Dios. Kas supapak, liwliwaen, tarabayen, ken agasannatayto ti Nasantuan nga Espiritu.
Panangpabaro kadagiti Katulagan
No awatentayo a nabuniaganen ti sakramento nga addaan iti natarnaw a puso, pabaruentayo ti katulagan nga inaramidtayo iti panagbuniag. Iraman daytoy ti panangawat iti Espiritu Santo ken pannakadalus manipud iti basol a kasla nabuniagantayo manen. Daytoy ti namnama ken asi nga idiaya ni Jesus iti tunggal maysa kadatayo. Saan pay a naladaw tapno agbabawi ken mapakawan.
Tapno Kanayon a Laglagipendak, ni Gary L. Kapp, saan a mabalin a kopiaen
Ania ti Kuna dagiti Nasantuan a Kasuratan maipapan iti Sakramento?
Nasken nga amirisentayo dagiti bagbagitayo a naespirituan, sipupudno a panangkita iti kaunggan, sakbay ti panangawat iti sakramento (kitaen iti 1 Taga Corinto 11:28).
Kalpasan ti Panagungarna, impakita ni Jesus kadagiti taona iti America no kasano ti umawat iti sakramento (kitaen iti 3 Nephi 18).
Imbaga kadatayo dagiti agdama a propeta nga agusar iti tinapay ken danum para iti sakramento, ngem talaga a saan a napateg no ania man ti kanen wenno inumentayo (kitaen iti Doktrina ken Katulagan 27:2). No dadduma kasapulan kadagiti addaan iti alerdyi ti agusar iti sabali pay a sustansia a kapada ti tinapay.
© 2021 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, March 2021. Ilokano. 17464 864
Ti Maudi a Pangrabii, ni Carl Heinrich Bloch; ladawan ti agtutubo a babai nga agkarkararag ni Angela Suitter; Panagkararag iti Getsemani, ni Del Parson; Tapno Kanayon a Laglagipendak, ni Gary L. Kapp, saan a mabalin a kopiaen