Padahk en ehu ehu Sounpwong kan Liahona, Mahs 2021

Sises Krais Mahsanihong Kitail en Ale Kamadipw Sarawi

Kitail mwakelekeldahr oh mwahulahr sang ni atail kin kataman atail Sounkomouro nan wihk koaros.

Kamadipw en Kamwurumwur, sang Carl Heinrich Bloch

Mwohn Ah kamatalahu, Sises Krais wia ehu kaimwseklahn koanoat me kahdaneki Kamadipw en Kamwurumwur. Kaimwseklahn koanoatpene wet, E kasalehiong Sapwellime iangahng kan duwen kamadipw sarawi. E pelingpeseng pilawahu oh kapaiada. E mahsanih, “Kumwail wia met ong ni ketemenpei” (Luke 22:19). Oh E pil kapaiada oh ehukihong irail kepin wain ehu.

Kisehn Kaudek en nan ehu ehu Wihk

Ni ansou me Mwomwohdiso en Sises Krais kopwurupwurdohng sampah, kamadipw sarawi wia kisehn kaudek en nan ehu ehu wihk. Nan ansou en sarawi, kamadipw sarawi kin kapaida oh nehnepeseng sang irail akan me kolokol prihsduhd. Re kin kapakap ni arail kin doadoahngki koasoai kan sang nan pwuhk sarawi (kilang Moroni 4; 5). Koaros me iang sarawi kin uhd tungoale pilawa oh nim pihl pwehn kataman Sises Krais oh Sapwellime tohnmetei ohng kitail, nin duwen Ah ketin mahsanihong kitailehr.

Kilel sang Angela Suitter

Kaukaunop en Ale

Pwehn warehng ale kamadipw sarawio, kitail anahne ni mehlel medewe atail mour kan oh pilipil kan. Kitail anahne koluhkihla atail sapwung kan oh dipatail kan nan wihk me nekiero, pil iangahki peki rehn Koht sapwellime mahk. Kitail sohte anahne en unsek pwe en ale kamadipw sarawio, ahpw kitail en ahneki mohngiong karakarahk.

Kapakap nan Kedsemeni, sang Del Parson

Laud Sang Pilawa oh Pihl

Ansoun ale kamadipw sarawi, wia ansou en wahu. Kapakap en kamadipw sarawi kan kin katamankiong kitail me ansou me kitail pahn ale pilawa oh pihlo, kitail kin katakataman kahlap oh intahn Sises Krais. Kitail inoukihong en idawehn Ih oh momourki mour en Souleng. Kitail inoukihong me kitail pahn song oh kolokol sapwellimen Koht kosonned akan. Ni atail pahn wia mepwukat, Ngehn Sarawi pahn kansenamwahuih kitail, kaweid, oh kamwahuihkitaila.

Pwurehng Wiahda Inou Kan

Ansou me kitail pepdaislahr oh ale kamadipw sarawi sang ni mohngiong mwakelekel, kitail kin pwurehng wiahda atail inou kan me kitail wiahda ansou me kitail pepdaiso. Met pil iangahki alehdi Ngehn Sarawi oh pilehu mwakelekelda sang nan dihp duwehte kitail pwurehng pepdais. Iei met me wia mahk oh popohl me Sises ketikiong emen emen kitail. E sohte pwand kitail en koluhla oh alehdi mahk.

Me Re pahn Patohwan Tamatamanki Ih Ansou Koaros, sang Gary L. Kapp, sohte mweimwei wia koapi

Dahme Iren Pwuhk Sarawi Kan Kosoia duwen Kamadipw Sarawi?

Kitail anahne kasawih paliwaratail kan ni keneinei, loalatail kan en mwakelekel, mwohn atail pahn ale kamadipw sarawi (kilang 1 Korint 11:28).

Mwurin Ah Iasadahu, Sises kasalehiong Sapwellime aramas akan nan Amerika duwen arail pahn ale kamadipw sarawi (kilang 3 Nihpahi 18).

Soukohp en rahnpwukat padahkiong kitail en doadoahngki pilawa oh pihl ong kamadipw sarawi, ahpw dahme kitail kang oh nim sohte wiahda mehkot (kilang Doctrine and Covenants 27:2). Ekei pak irail akan me kin suwediong pilawa pil kak doadoahngki ehu soangen pilawa torohr.

© 2020 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Monthly Liahona Message, March 2021. Pohnpeian. 17464 885

Kamadipw en Kamwurumwur, sang Carl Heinrich Bloch; kilel en serepein pwulopwul wie kapakap sang Angela Suitter; Kapakap nan Kedsemeni, sang Del Parson; Me Re Pahn Patohwan Tamatamanki Ih Ansou Koaros, sang Gary L. Kapp, sohte mweimwei wia koapi