Porous ren Liahona Iteiten maram, April 2021

Jises Kraist a Angasa Kich seni Tipis me Mano

Pokiten An we asor, kich meinisin sia tufichin kuna kiname me pwapwa ese much.

Kraist a Forata ewe Fonufan, seni Robert T. Barrett

Sia eita ngeni Jises Kraist pwe ach Chon Amanau. Ena pokiten A moni niwinin ach kewe tipis me ani ewe manamanen mano. A angasa kich! An asor fan itach, itan ewe Achasefan, ewe akaewin auchean mettoch mi fis. Pokiten Ii, mano esapw ina muchun. Pokiten Ii, sia tongeni musono seni ach tipis, winiti nimoch sefan, me mamarita iteiten ran.

Jises Kraist ewe Anaemon

Me mwen ach eto ngeni fonufan, sia nomw ren inach me samach won nang. Usun ewe Anaemon, Jises Kraist a aninis ne fori ei ningochun fonufan. A kefinita pwe epwe ach Chon Amanau me tipeeu ngeni ach sipwe uputiw won fonufan pwe Epwe fori ewe anen apiru mi murino, afanafana An we kapas allim, me ounusano ewe Achasefan fan itach.

O Semei, seni Simon Dewey

Jises Kraist a moni Ach kewe Tipis

Nupwen Jises a sinei pwe epwene mano, A feino non ewe manaman itan Gethsemane epwe iotek. Non an iotek, A poputa ne moni niwinin ach kewe tipis. A mochen weires pwe sisapw mefi ika sia aier. Ika sia kunuseni ach kewe tipis me tapweno mwirin ewe Chon Amanau, sia tongeni kuna musono me chikar. Pokiten met a mefi non Gethsemane, Jises a ennetin weweiti epwe ifa usun ngeni emon me emon kich. A mefi meinisin ach netipengaw, semwen, me metek. “Iei ewe ewin kinikinin ewe Achasefan.

Ewe Ireirenon Kraist, by Carl Heinrich Bloch

Jises Kraist a Manau seni Mano

Mwirin An we iotek non Getsemane, Jises a kuna amwam, kanupus, me mano seni an we irapenges. Ina mwo nge Amen unusen manaman, Jises a etiwa Mananauan epwe mano won ewe irapenges. Noun kewe chon kuna ra umoumoch ne enennia Inisin non ewe pwang. Rese sinei pwe inamwo pwe Inisin a mano, Ngunun mi chiwen manau non ewe nenien ngun. Mwirin unungat ran, Jises a manau sefan me feino churir, pwarata pwe mi tongeni manau seni mano. Ei unusochun ewe Achasefan. Pokiten Jises a manau sefan, emon me emon kich sipwe pwan manau sefan mwirin mano.

A Manau, seni Simon Dewey

Ewe Wewen Kirisimas me Paska

Chommong chon fonufan ra apwapwai ikei ru fansoun pwe epwe anisi kich ach sipwe chechemeni ewe Achasefan an Jises Kraist. Non Kirisimas, sia chechemeni ren kinisou pwe Jises a mochen me etiwa ewe misin an epwe feito ngeni fonufan, ina mwo pwe epwe riafou me mano fanitach. Apwapwan Paska ewe Chon Amanau angangen omusa tipis me mano, a ngeni kich epinukunuk ren pwapwa ese much.

Kraist a Kori Peter me Andrew, seni James Taylor Harwood

Met Kewe Pukefel ra Apasa usun An ewe Chon Amanau we Achasefan?

Pokiten Jises a sineochu kich, A tongeni “fangono,” ika anisi kich (nengeni Alma 7:11–12).

Ewe Chon Amanau a weweiti ach netipengaw me chou (nengeni Isaiah 53:2–5).

Kot a tinato Jises epwe angasa kich pokiten Kot amen tongei emon me emon kich (nengeni John 3:16–17).

Jises a iotek ren Noun kewe chon kuno, pachenong kich, sisapw tonong non sosot me sipwe nonom Ren me Samach won Nang {(nengeni John 17).

Ach Chon Amanau a tingorei kich ach sipwe tapweno Mwirin me niwinno ngeni non Nenian (nengeni Doctrine and Covenants 19:16–19, 23–24; 132:23).

© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Monthly Liahona Message, April 2021. Chuukese.17467 901