Bulanan nga Mensahe sa Liahona, Abril 2021

Si Jesucristo Nagluwas sa Aton gikan sa Sala kag Kamatayon

Tungod sang Iya pagsakripisyo, tanan kita may kahigayunan nga makakita sang wala katapusan nga paghidaet kag kalipayan.

Christ Creating the Earth [Si Cristo nga Nagatuga sang Kalibutan], ni Robert T. Barrett

Ginatawag naton si Jesucristo nga aton Manluluwas. Ini bangod kay Iya ginbayaran ang bili sang aton mga sala kag gindaug ang gahum sang kamatayon. Ginluwas Niya kita! Ang Iya pagsakripisyo para sa aton, nga gintawag nga Pagbayad-Sala, amo ang pinakaimportante sa tanan nga hitabo. Tungod sa Iya, ang kamatayon indi ang katapusan. Tungod sa Iya, mahimo kita mapatawad sang aton mga sala, mangin matinlo liwat, kag magtubo sing mas maayo kada adlaw.

Si Jesucristo Amo ang Panganay

Antes magkari sa kalibutan, nagpuyo kita upod ang aton mga ginikanan nga langitnon. Bilang Panganay, nagbulig si Jesucristo sa pagtuga sining matahum nga kalibutan. Ginpili Sia nga mangin aton Manluluwas kag nagpasugot nga matawo sa duta agud makapahamtang Sia sing perpekto nga halimbawa, magtudlo sang Iya ebanghelyo, kag humanon ang Pagbayad-Sala para sa aton.

O My Father [O Amay Ko], ni Simon Dewey

Si Jesucristo Nagbayad para sa Aton mga Sala

Sang mahibaloan ni Jesus nga madali na lang Sia mapatay, nagkadto Sia sa isa ka hardin nga gintawag nga Getsemani agud magpangamuyo. Sa sinang pangamuyo, nagsugod Sia sa pagbayad sang bili para sa aton mga sala. Kinabubut-on Sia nga nag-antos agud indi kita mag-antos—kon maghinulsol kita. Kon aton talikdan ang aton mga sala kag sa baylo sundon ang Manluluwas, makaagom kita sang kapatawaran kag pag-ayo. Tungod sang Iya naagyan sa Getsemani, si Jesus nakahangop gid kon paano ang mangin pareho sang kada isa sa aton. Nabatyagan Niya ang tanan naton nga mga kasubo, balatian, kag mga kasakit. Amo ini ang una nga bahin sang Pagbayad-Sala.

The Burial of Christ [Ang Lubong ni Cristo], ni Carl Heinrich Bloch

Gindaug ni Jesucristo ang Kamatayon

Pagkatapos sang Iya pangamuyo sa Getsemani, si Jesus gintraydoran, gindakop, kag ginsentensyahan sing kamatayon paagi sa paglansang sa krus. Bisan pa nga Sia lubos nga gamhanan, gintugtan ni Jesus ang Iya kaugalingon nga mapatay sa krus. Mapinalanggaon nga ginplastar sang Iya mga sumulunod ang Iya lawas sa lulubngan. Wala sila nakahibalo nga bisan patay na ang Iya lawas, ang Iya espiritu buhi sa gihapon sa kalibutan sang mga espiritu. Pagligad sang tatlo ka adlaw, si Jesus nabanhaw kag ginduaw sila, nga nagapamatuod nga sarang Niya daugon ang kamatayon. Ini ang nagkompleto sang Pagbayad-Sala. Bangud nabanhaw si Jesus, ang kada isa sa aton mabuhi liwat pagkatapos kita nga mapatay.

He Lives [Buhi Sia], ni Simon Dewey

Ang Kahulugan sang Paskwa kag Paskwa sang Pagkabanhaw

Madamo sa kalibutan ang nagasaulog sang duha ka selebrasyon nga nagabulig sa aton nga dumdumon ang Pagbayad-Sala ni Jesucristo. Sa tion sang Paskwa, ginadumdom naton sing may pagpasalamat nga ginbaton ni Jesus ang misyon nga magkari sa duta, bisan pa nga nagalakip ini sang pag-antos kag pagpakamatay para sa aton. Ang Paskwa sang Pagkabanhaw nagasaulog sang kadalag-an sang Manluluwas batok sa sala kag kamatayon, nga nagahatag sa aton sang paglaum para sa kalipayan sa wala katapusan nga palaabuton.

Christ Calling Peter and Andrew [Si Cristo nga Nagatawag kanday Pedro kag Andres], ni James Taylor Harwood

Ano ang Ginasiling sang Balaan nga mga Kasulatan parte sa Pagbayad-Sala sang Manluluwas?

Tungod si Jesus nakakilala sa aton sing lubos, sarang Sia “magtabang,” ukon magbulig, sa aton (tan-awa sa Alma 7:11–12).

Ang Manluluwas nakahangop sang aton mga kasubo kag kalisud (tan-awa sa Isaias 53:2–5).

Ginpadala sang Dios si Jesus agud luwason kita tungod ang Dios nagapalangga sa kada isa sa aton (tan-awa sa Juan 3:16–17).

Si Jesus nagpangamuyo para sa Iya mga sumulunod, lakip na sa aton, nga maproteksyunan batok sa malain kag mangin isa sa Iya kag sa Amay nga Langitnon (tan-awa sa Juan 17).

Ang aton Manluluwas nagaagda sa aton nga sundon Sia kag magbalik sa Iya presensya (tan-awa sa Doktrina kag mga Kasugtanan 19:16–19, 23–24; 132:23).

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, April 2021. Hiligaynon. 17467 861