“Jisōs Kraist Ekar Lo̧mo̧o̧ren Kōj jān Jerawiwi im mej,” Liaona, Eprōļ 2021
Kajjojo Allōn̄ Liaona Ennaan, Eprōļ 2021
Jisōs Kraist Ekar Lo̧mo̧o̧ren Kōj jān Jerawiwi im Mej
Kōn katok eo An, jemaron̄ aolep bar wōr juon ad bar iien kappukot aenōm̧m̧an im lan̄lōn̄ eo ejjeļo̧k jem̧ļo̧kin.
An Kraist Kōm̧anm̧an Laļ in, jān Robert T. Barrett
Jej ņae etan Jisōs Kraist āinwōt ad Rilo̧mo̧o̧r. Unin ej kōnke E ekar kōļļaik wōņāān jerawiwi ko ad im anjo̧ ioon kajoor an mej. E ekar lo̧mo̧o̧ren kōj! En̄taan eo An n̄an kōj, ņae etan Pinmuur eo, ej iien eo eļap an aorōktata me em̧ōj an bōk jikin. Kōn E, mej ejjab jem̧ļo̧k eo. Kōn E, jemaron̄ jeorļo̧k jerawiwi ko ad, erom̧ erreo bar juon alen, im em̧m̧anļo̧k ilo ad eddōkļo̧k kajjojo raan.
Jisōs Kraist Ekar M̧aanje eo
M̧okta jān ad itok n̄an laļ in, jaar mour ippān jined im jemed ilan̄. Āinwōt juon M̧aanje, Jisōs Kraist ekar jipan̄ kōm̧anm̧an laļ in eaiboojoj. Kar kālet E bwe en ad Rilo̧mo̧o̧r im kar errā bwe en ļotak ilo laļ in bwe E en maron̄ kōm̧m̧an waanjon̄ak em̧m̧an, kwaļo̧k gospel eo An, im kadedeļo̧k Pinmuur eo n̄an kōj.
O Jema, jān Simon Dewey
Jisōs Kraist ekar Kōļļāik Jerawiwi ko Ad
Ke Jisōs ekar jeļā bwe E m̧ōttan jidik enaaj mej, E ekar etal n̄an juon jikin kallib ņae etan Getesemene n̄an jar. Ilo iien jar eo, E ekar jino kōļļā wōņāān jerawiwi ko ad. E ekar en̄taan bwe jen jab en̄taan—n̄e jej ukweļo̧k. Ilo ad eļļo̧k jān jerawiwi ko ad im ļoor Rilo̧mo̧o̧r eo, jemaron̄ bōk jeorļo̧k bōd im kōmour. Kōn ta eo Ekar en̄jake ilo Getsemane, Jisōs elukkuun meļeļe ta eo enaaj āinwōt n̄an kōj kajjojo. Eaar en̄jake aolep ad būrom̧ōj, nan̄inmej, im metak. En̄in ej m̧ōttan eo m̧oktata ilo Pinmuur eo.
An Kraist Kallib , jān Carl Heinrich Bloch
Jisōs Kraist Ekar Anjo̧ Ioon Mej
Ālkin jar eo An ilo Getsemane, kar liaakeļo̧k Jisōs, kalbuuji, im kaje n̄an mej im debwāāl. Men̄e ekar ļap An kajoor, Jisōs ekar kōtļo̧k An make mej ioon debwāāl. Ro rikaļooraņ rekar likūt Ānbwinin ilo juon lōb. Rekar jab kile bwe men̄e Ānbwinin ekar mej, jetōb eo An ekar mour wōt ilo laļ eo an jetōb. Jilu raan tokālik, Jisōs ekar bar mour im loļo̧k er, kam̧oole bwe E emaron̄ anjo̧ ioon mej. Menin ej kadedeikļo̧k Pinmuur eo. Kōnke Jisōs ekar bar jerkakpeje, kajjojo iaad jenaaj bar mour juon alen ālkin ad mej.
E Mour, jān Simon Dewey
Meļeļe in Kūrijm̧ōj im Ijtō
Eiten aolepān laļ in rej keememe holiday kein ruo me rej jipan̄ kōj kakeememej Pinmuur eo an Jisōs Kraist. Ilo iien Kūrijm̧ōj, jej keememej ippān kam̧m̧oolol bwe Jisōs ekar kōņaan kōm̧m̧ane mijen eo n̄an itok n̄an laļ in, men̄e menin ekar kobaik en̄taan im mej n̄an kōj. Ijtō ej keememe anjo̧ eo an Rilo̧mo̧o̧r ioon jerawiwi im mej, eo ej letok n̄an kōj kōjatdikdik n̄an juon ilju im jekļaj in lan̄lōn̄ ejjeļo̧k jem̧ļo̧kin.
An Kraist Kūr Pita im Andrew, jān James Taylor Harwood
Ta eo Jeje ko Rekwojarjar rej Ba kōn Pinmuur eo an Rilo̧mo̧o̧r?
Kōnke Jisōs ejeļā kōn kōj ilo ejjeļo̧k kalijōkļo̧k, E emaron̄ “jipan̄,” ak jipan̄, kōj (lale Alma 7:11–12).
Rilo̧mo̧o̧r emeļeļe ad būrom̧ōj im liiajlo̧l (lale Aiseia 53:2–5).
Anij ekar jilikintok Jisōs n̄an lo̧mo̧o̧ren kōj kōnke Anij ej iakwe kōj kajjojo (lale Jon 3:16–17).
Jisōs ekar jar kōn ro rikaļoor ro An, ekoba kōj, n̄an kōjparok kōj jān men ko renana im n̄an juon wōt Ippān im Jemedwōj Ilan̄ (lale Jon 17).
Rilo̧mo̧o̧r eo ad ej karuwaineneik kōj n̄an ļoor E im jepļaak n̄an Ippān (lale Katak im Bujen Ko 19:16–19, 23–24; 132:23).
© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Translation of Monthly Liahona Message, April 2021. Marshallese. 17467 874