« ’Ua fa’aora Iesu Mesia ia tātou i te hara ’e i te pohe », Liahona, ’Ēperēra 2021

Parau poro’i tā’āva’e nō te Liahona, ’Ēperēra 2021

’Ua fa’aora Iesu Mesia ia tātou i te hara ’e i te pohe

Nō tāna tusia, e fāna’o tātou pā’āto’a ’ia ’ite mai i te hau ’e te ’oa’oa mure ’ore.

E tītau tātou ia Iesu Mesia ’ei Fa’aora nō tātou. Nō te mea ’ua ’aufau ’oia i te ho’o nō tā tātou mau hara ’e ’ua upo’oti’a i ni’a i te mana o te pohe. ’Ua fa’aora ’oia ia tātou ! Tāna tusia nō tātou, tei pi’ihia te Tāra’ehara, ’o te ’ohipa faufa’a roa a’e ïa tei tupu Maoti ’oia, e ’ere te pohe i te hope’ara’a. Maoti ’oia, e nehenehe tā tātou mau hara e fa’a’orehia, e fa’ariro-fa’ahou-hia ’ei mea mā, ’e ’ia maita’i atu ā tātou i te mau mahana ato’a.

’O Iesu Mesia te Fānau Tahi

Hou tātou ’a haere mai ai i te fenua nei, ’ua ora na tātou i pīha’i iho i tō tātou nā Metua i te ao ra. ’Ei Fānau Tahi, ’ua tauturu Iesu Mesia i te poietera’a i teie ao nehenehe mau. ’Ua mā’itihia ’oia ’ei Fa’aora nō tātou ’e ’ua fāri’i ’ia fānauhia i ni’a i te fenua nei, ’ia nehenehe iāna ’ia hōro’a mai i te hi’ora’a maita’i roa a’e, ’ia ha’api’i i tāna ’evanelia ’e ’ia fa’aoti i te tāra’ehara nō tātou.

’Ua ’aufau Iesu Mesia nō tā tātou mau hara

I tō Iesu ’itera’a, ’ua fātata ’oia i te pohe, ’ua haere ’oia i roto i te hō’ē ’ō tei pi’ihia Getesemane nō te pure. I te roara’a o taua pure ra, ’ua ha’amata ’oia i te ’aufau i te ho’o nō tā tātou mau hara. ’Ua hina’aro mau ’oia e mamae ’ia ’ore tātou ’ia mamae, mai te mea e tātarahapa tātou. Ma te fāriu-’ē-ra’a atu i tā tātou mau hara ’e maoti te pe’era’a i te Fa’aora, e nehenehe tātou e ’ite mai i te fa’a’orera’a hara ’e te fa’aorara’a. Maoti te mea tāna i fa’aruru i Getesemane, ’ua ta’a maita’i ia Iesu e aha mau te rirora’a tātou tāta’itahi. ’Ua fāri’i ’oia i tō tātou mau ’oto, mau ma’i ’e mau māuiui ato’a. Teie te tuha’a mātāmua o te tāra’ehara.

’Ua upo’oti’a Iesu Mesia i te pohe

I muri a’e i tāna pure i Getesemane, ’ua ha’avarehia Iesu, ’ua tāpe’ahia ’e ’ua fa’autu’ahia ’ia pohe ma te fa’asātaurora’a. Noa atu e mana hope tōna, ’ua vaiiho Iesu iāna iho ’ia pohe i ni’a i te sātauro. ’Ua tu’u tāna mau pipi ma te here i tōna tino i roto i te hō’ē mēnema. ’Aita rā rātou i ’ite ē noa atu ’ua pohe tōna tino, tē ora noa ra tōna vārua i roto i te ao vārua. Toru mahana i muri mai, ’ua ora fa’ahou mai Iesu ’e ’ua fārerei ia rātou, ma te fa’a’itera’a ē ’ua upo’oti’a ’oia i te pohe. Nā teie i fa’aoti roa i te tāra’ehara. Nō te mea ’ua ti’afa’ahou mai Iesu, e ora fa’ahou mai tātou tāta’itahi i muri mai i tō tātou pohera’a.

Te aura’a o te Noera ’e te Pāsa

Tē fa’ahanahana nei te tuha’a rahi o te ao nei e piti ’ōro’a ’o tē tauturu ia tātou ’ia ha’amana’o i te tāra’ehara a Iesu Mesia. I te noera, e ha’amana’o tātou ma te māuruuru ē, ’ua ineine Iesu i te fāri’i i te misiōni ’ia haere mai i te fenua nei, noa atu ē tei roto te mamaera’a ’e te pohera’a nō tātou. E fa’ahanahana te Pāsa i te upo’oti’ara’a te Fa’aora i ni’a i te hara ’e i te pohe, ’o tē hōro’a ia tātou i te tīa’ira’a nō te hō’ē ananahi ’oa’oa mure ’ore.

Te pi’ira’a te Mesia ia Petero ’e ia Anederea

E aha tā te mau pāpa’ira’a mo’a e parau nei nō ni’a i te tāra’ehara a te Fa’aora ?

Nō te mea ’ua ’ite maita’i roa Iesu ia tātou, e nehenehe ’oia e « fa’aora » ’aore rā e tauturu ia tātou (hi’o Alama 7:11–12).

’Ua ta’a i te Fa’aora tō tātou mau ’oto ’e te pe’ape’a (hi’o Isaia 53:2–5).

’Ua tono mai te Atua ia Iesu nō te fa’aora ia tātou, nō te mea ’ua here te Atua ia tātou tāta’itahi (hi’o Ioane 3:16–17).

’Ua pure Iesu nō tāna mau pipi, ’oia ato’a nō tātou, ’ia pāruruhia i te ’ino ’e ’ia hō’ē tātou ’e ’ōna ’e te Metua i te ao ra (hi’o Ioane 17).

Tē ani manihini mai nei tō tātou Fa’aora ’ia pe’e iāna ’e ’ia ho’i i mua i tōna aro (hi’o Te Parau Ha’api’ira’a ’e te mau Parau Fafau 19:16–19, 23–24 ; 132:23).

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, April 2021. Tahitian. 17467 895