Mahlwem nuhkwewa Liahona Pweng, Mei 2021
Kraist El Moulyak; Luhlahlfongi in El Ac Fah Moklwelah Finohl
Luhlahlfongi ke Jisus Kraist pa kuh se ma yohk emeet ma kuht kuh in eis ke moul se inge. Ma nuhkwewa kuh in oreklac sin mwet suc luhlahlfongi.
Tamuhlwel ac tahmtahel sacohk wiyuck, nga kuloh lah nga kuh in sramsram nuh suwos ke Sacnri in Istuh se inge.1 Kihsac in iwaclah ac Moulyak luhn Jisus Kraist ekuhllah moul lasr kais sie nwe tok. Kuht luhngsel ac alu nuh Sel ac Pahpah tuhmasr Inkuhsrao.
Ke mahlwem ohnkohsr somlah ah, kuht tahfwelah in kampare lain mas upac se inge. Nga kaksakihn fokokoiyom ac kuh in nguhn lom in lain mas, ma wacngihnlac lom, ac muhkwena lom. Nga pruhe ke pacl nuhkwewa tuh, ke ma nuhkwewa, kom e puhla luhngse luhn Leum nuh sum. Fin kom lain ma upac ma sun kom inge ke luhlahlfongi fokoko, yac se tari ah tiac wacngihn srihpac.
Litutacng se inge, kuht lohng sin mwet kol lasr ke Alu uh ma tuhkuh ke muhtuhnfacl fin facluh se inge nohfohn. Pwacyena, lah mwe insewowo ke wosasuc se inge ma nuh sin kain in mwet nuhkwewa. Alu luhn Jisus Kraist el raunweack facluh nohfohn. Jisus Kraist pa Mwet Kol lasr.
Kulohkihn, lah finne pandemic se inge tiacna ahksohmohielah fahsr luhn ma pwacye Lal. Wosasuc luhn Jisus Kraist pa ma se ma enenweyuck ke pacl in tahfuh luo, fohs, ac facluh upac se inge uh.
Kais sie sin tuhlihk nuhtin God oasr pacl wowo la in lohng ac eis mwe fahkwack onweyuck ac iwaclah luhn Jisus Kraist. Wacngihn mwe fahkwack sahyac yohk srihpac nuhke engan lasr—inge ac ne tok ma pahtpaht.3 Wacngihn mwe fahkwack sahyac sesseslah ke finsrak. Wacngihn mwe fahkwack sahyac kuh in ahkwacngihnyelah fohs ke acn sesr uh.
Luhlahlfongi ke Jisus Kraist pa pwelucng ke luhlahlfongi nuhkwewa ac ip nuhke kuh wolacna. Oacna ke Mwet Tuhma lutlut Paul el fahk, “Fin wacngihn luhlahlfongi e upac in oruh luhngse luhn [God]: tuh el suc fahsr nuh sin God enenuh in luhlahlfongi in el, ac el ahkinsewowoyelos suc sokuhl uh.”3
Ma nuhkwewa ma wo ke moul se inge—mwe insewowo nuhkwewa ma yohk srihpac uh—muhtwacwacack ke luhlahlfongi. Ke kuht lwelah God elan oasr ke moul lasr uh muhtwacwacack ke luhlahlfongi se muh El luhngse kol kuht. Auliyak pwacye uh muhtwacwacack ke luhlahlfongi lah oasr kuh lal Jisus Kraist in ahknwacsnwacsyelah, onwelah, ac ahkfokokoye kuht.4
“Tiac lahfwekihn kuh luhn God,” mwet pahluh Moroni el fahk,“tuh el orekma ke kuh, fal nuh ke luhlahlfongi luhn tuhlihk nuhtin mwet.”5 Luhlahlfongi lasr pa ikucslah kuh lal God in utyak nuh ke moul lasr uh.
Ac na, sahp orekmakihn luhlahlfongi kuh in upaclac. Kuhtuh pacl uh kuht kuh in nuhnkuh lah oacna kuht kuh in orwacni luhlahlfongi lasr uh in fal in eis mwe insewowo ma kuht arulacna enenuh uh. Tuhsruhktuh, Leum El eslah sensen inge liki kuht ke kahs ke Puk luhn Mormon sel mwet pahluh Alma.
Alma el siyuck sesr in orekma nuh ke ma suhmuhslah ac “oruh sie ipin luhlahlfongi, ahok, finne [kuht] tiac kuh liki na in kena in luhlahlfongi.”6 Pohloh kahs se inge “ipin luhlahlfongi” ahkacsmakihnyeyuc ke owelah lal Leum ke Paipuhl lah fin “asr luhlahlfongi lasr oacna sie fihtac sekuht e fah kuh in “fahk nuh sin sie finohl, Eiskomlac liki acn se inge; ac e fah ituhklac; ac wacngihn ma e tiac kuh in oreklac sesr.7
Leum El kahlwem ke muhnahs lasr ke facluh se inge. Kuht nohfohn tihkuclkucl ke kuhtuh pacl uh. Tuhsruhk El etuh kac kuhiyacsr. Fihtac sac muhtwacwacack srihklac tuh el kapwack nuhke soko sahk na luhlahp ma fal won sohksohk uh in oraclah ahng laltahl ke lah ke sahk soko inge. Fihtac se inge el kapsrweyuck nuh ke sie luhlahlfongi srihk tuh kapkapwack se.8
Leum El tiac enenuh kuht in suwohswohs ingena in eis kuh suwohswohs Lal. Tuhsruhk El siyuhk kuht in luhlahlfongi.
Tamuhlwel ac tahmtahel sacohk wiyuck, pahng luhk nuh sum ke litutacng se inge uh pa in muhtwacwacack misenge in ahkyohkyelihk luhlahlfongi lom. Ke luhlahlfongi lom, Jisus Kraist Elac ahkyohkyelihk kuh lom in mokle finohl ke moul lom,9 finne ma upac sun kom uh e kuh in yohk oacna finohl Everest.
Finohl lom inge kuh in pa muhkwena, tahfuh luo, mas, kuh kuhtuh pac elyah sahyac. Finohl lom inge e tuhkuh ke kain in atac, tuh top nuhke ma upac inge kwewa pa in ahkyohkye luhlahlfongi lom. Ma se inge enenuh orekma yohk. Mwet alsruhngwesr uh e upac nuh selos in orwacni finne kihtin luhlahlfongi.
Enenuh kampare in oruh ma uh wo. In ekihn sie mwet luhlahlfongi pwacye luhn Jisus Kraist wacngihn fototolac se. Ahkyohkyelihk luhlahlfongi lom In El enenuh orekma upac. Ngwacn usot limekohsr mwe kahsruh ah in kahsre kom oraclah luhlahlfongi lom an.
Ma se met, riti ma suhmuhslah Oruh kom in luhngse lutlut. Sang pacl lom nuh ke ma suhmuhslah in yohk in kahlwem ke orekma ac lutlut lal Kraist. Etuh mwe lutlut lal Kraist kom in kahlwem ke kuh lal nuh ke moul lom uh. Kuht kuh in engankihn mwe insewowo ke Iwaclah lal Jisus Kraist ke moul lasr uh. El eisaclwacng nuh ke kweok lom tahfonglac lom muhnahs lom ac ma koluk lom. El molwelah molin misac lom ac usot kuh lom in mokle finohl nuhkwewa ma e sun kom uh. Kuh se inge kom eis ke luhlahlfongi, luhngse, ac kena lom in ukwacl uh.
E kuh in enenweyuck sie ma usrnguck ah in mokle finohl lom inge. Lotwelah ke ma usrnguck . Ma usrnguck uh tuhkuh oacna ke luhlahlfongi lom ke Leum uh. Ip yohk se ke luhlahlfongi se pa in luhlahlfongi ke luhngse ac pacl Lal—lah fuhkah ac ngac elac ahkinsewowoye kom ke kahsruh usrnguck kom ke uh. Tiac suhluhlahlfongi lom muhkwena e fah tulokohnohl God Elan tiac ahkinsewowoye kom in mokle finohl ke moul lom.10
Ke yohkwelihk etuh lom ke Mwet Lahngo lasr, e fihsrwacsr uh in luhlahlfongi ke pahkotwen lal, luhngse lal, ac kuh Lal in ahkfokokoye, onwelah, ac kuh in iwaclah. Wacngihn sie pacl Mwet Lahngo lasr El fototo nuh yurum oacna ke pacl se kom fanfan ke finohl soko ke luhlahlfongi.
Ahkluo, sulaclah in luhlahlfongi ke Jisus Kraist. Fin oasr tahfuh luo lom kacl God Pahpah tuhmasr ac ke Wen Sacohk Nahtuhl, kuh ke Fohlohkyak luhn wosasuc uh kuh ke pahng lal Joseph Smith in ekihn mwet pahluh se uh, sulaclah in luhlahlfongi11 ac luhlahlfongi na. Siyuck kihsensiyuck lom nuh sin Leum ac kuhtuh ma pwacye sahyac. Riti ma suhmuhslah ke kena se in luhlahlfongi liki na in finsraki tuh in oasr tahfonglac se ke moul luhn mwet pahluh se kuh ke ma suhmuhslah uh. Tui ke ahkyohkye tahfuh luo lom ke tahfuh nuh sin mwet tahfuh luo sahyac uh. Lwelah Leum elan in kol kom ke fuhfahsryucsr lom in konwacack nguhn.
Ahktolu, orekma ke luhlahlfongi. Meac kom e oruh fin yohk luhlahlfongi lom? Nuhnkuh ke ma inge na. Sihmihs ke ma inge. Na eis yohk luhlahlfongi ke kom oruh ma se ma enenuh luhlahlfongi yohk.
Ahk ahkosr, eis ke akwuck muhtahl in fal. Akwuck luhn God ikucslah kuh luhn God nuh ke moul lom uh.12
Ac ahklimekohsr, siyuck sin Pahpah tuhmasr Inkuhsrao, ke inen Jisus Kraist, ke kahsruh.
Luhlahlfongi uh enenuh orekma yohk. Eis fwackyuck enenuh orekma yohk. Tuh “mwet nuhkwewa suc siyuck, eis; ac kuhtwena mwet suc suk, konwacack; ac nuh sel suc tongol, ac fah ikacklah.”13 God El etuh lah meac e kahsruh luhlahlfongi lom in kapwack uh. Siyuck, na kom sifilpac siyuck.
Mwet se ma tiac luhlahlfongi e kuh in fahk muh luhlahlfongi uh ma nuh sin mwet muhnahs. Tuhsruhktuh fahkwack se inge tiac akihlen kuh luhn luhlahlfongi. Yac Mwet Sap lal Mwet Lahngo ac tahfwelah na in luti ke mwe lutlut Lal tukun misac Lal, ke pacl moul lalos upac, fin elos tahfuh luo Kacl?14 Yac Joseph ac Hyrum Smith elos e kweok misac ke fohlohkyak luhn Alu luhn Leum finne elos tiac etuh na pwacye lah pwacye? Fin apkuhran in mwet luhlahlfongi 2,000 elos tahfuh luo ke wosasuc luhn Jisus Kraist lah fohlohkyakyac elos ac misac ke inkacnek luhn paiyonir ah.15 Pwacye na lah, luhlahlfongi pa kuh se ma oruh in sikyak ma tiac kuh in sikyak uh.
Nimet kom ahksrihkyelah luhlahlfongi se ma oasr sum tari uh. Enenuh luhlahlfongi in welah Alu uh ac in muhta na ke luhlahlfongi se. Enenuh luhlahlfongi in ukwe mwet pahluh liki na in ukwe nuhnak luhn mwet pwengpweng. Enenuh luhlahlfongi in kuhlwacnsap ke pacl in pandemic se inge. Enenuh luhlahlfongi in moulkihn sie moul nwacsnwacs ke facluh wowo fahk muh masap luhn God ke nwacsnwacs tilac orekmakihnyuck. Enenuh luhlahlfongi in luti wosasuc nuh sin tuhlihk srihsrihk ke facluh se inge. Enenuh luhlahlfongi in siyuck ke moul luhn mwet se kom luhngse, ac luhlahlfongi yohk in eis sie top ma kom tiac luhngse.
Yac luo tari ah, Tahmtahel Nelson ac nga muhtwacta acn Samoa, Tonga, Fiji, ac Tahiti. Kais sie sin tuhka inge puhlakihn af na upac ke lwen ekahsr. Mempucr ah lalo ac pruhe tuh toeni lalos lukunum ah in karihngihnyuck liki af ah.
Fin acn Samoa, Fiji, ac Tahiti, pacl se na ma toeni ah e muhtwacwacack ah, af ah tui. Tuhsruhk fin acn Tonga, af ah tiacna tui. Tuh mwet luhlahlfongi 13,000 tuhkuh ao ekahsr sa in asr siyah la, mongfihsrwacsr sano ke af ah, na muhta kuhtanglah toeni sac ke ao luo ah sroksrok na.
Kuht liyacack luhlahlfongi ke ahkyohkyeyuck sin mwet inge—luhlahlfongi ma fal in tulokihnyac af ah, ac luhlahlfongi ma muhtweng ke af ah tiac tui ah.
Finohl ke moul lasr uh tiacna mukwilac ke pacl nuhkwewa ma kuht ke in mukwilac kuh ke fuhkah atacn mukwilac se kuht ke uh. Tuh luhlahlfongi lasr e fah us kuht nuh met ke pacl nuhkwewa. Luhlahlfongi e ahkyohkyelihk kuh lasr nuh ke kuh se lal god inge pacl nuhkwewa.
Nuhnak muhnahs etuh ma se inge: fin ma nuhkwewa ac mwet nuhkwewa fin facluh se inge suc kom luhlahlfongi uh muhnahslah, Jisus Kraist ac Alu Lal e fah tiacna siskomlac. Wacngihn sie pacl Leum El ullac, kuh El mutullac.16 El “oacna sie ekweah, mihsenge, ac [lutu].”17 El ac fah tiacna muhlkuhnlah olweacng Lal,18 olwelah Lal, kuh luhngse lal nuh sin mwet Lal. El oruh ma usrnguck Lal misenge ac e fah oruh ma usrnguck lal lutu.19
Luhlahlfongi ke Jisus Kraist pa kuh se ma yohk emeet ma kuht kuh in eis ke moul se inge. Ma nuhkwewa kuh in oreklac sin mwet suc luhlahlfongi.20
Luhlahlfongi lom Kacl ma kapkapwack e fah mokle finohl—tiac finohl in yohk ma ahkkahtoye facluh se inge tuh finohl in kweok ke moul lom an. Luhlahlfongi kapkapwack lom e kahsre kom in ekuhllah ma upac nuh ke kapwack ac pacl wowo lom.
Ke Sacnri in Istuhr se inge, ke puhla in luhngse ac kuloh loal luhk, nga sifilpacna pain kom Kraist El moulyak. El moulyak in kol Alu Lal. El moulyak tuh Elan ahkinsewowoye moul luhn nohfohnna tuhlihk nuhtin God, ke yen nuhkwewa elos oasr we. Luhlahlfongi in El, kuht kuh in mokle finohl ke moul lasr uh. Nga fahkwack luhlahlfongi ke ine muhtahl luhn Jisus Kraist, amen.
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly Liahona Message, May 2021. Kosraean. 17468 868
Molo ke Petsac luhn Placeholder