Etinda mpo na Liahona Sanza ya mitano 2021

Klisto Asekwi; Bondimi kati na Ye Ekotombola Bangomba

Na Mokambi Russell M. Nelson

Mokambi ya Eklezia ya Yesu Klisto ya Bansantu ba Mikolo mya Nsuka

Bondimi kati na Yesu Klisto ezali nguya monene koleka mpenza tozali na yango na bomoi oyo. Makambo nyonso ezali pete epai na baoyo bandimaka.

Bandeko na ngai ya mibali mpe basi ya bolingo, nazali na botondi mpo na libaku ya koloba na bino na Eyenga oyo ya Pasika.¹ Libonza ya bomikabi mpe Lisekwa ya Yesu Klisto ebongolaki moko na moko ya bomoi na biso mpo na libela. Tolingi Ye mpe tosambeli Ye mpe Tata na biso na Lola na botondi.

Na basanza motoba oyo eleki, tokobaki konyokwama na bokono oyo ya mokili mobimba. Nasepeli na bompikiliki mpe makasi ya molimo na bino liboso ya bokono, bato bobungisi mpe kotiama mosika na bato basusu. Nasambeli ntango nyonso ete, na nzela ya makambo nyonso, bokoyoka bolingo ezanga ndelo ya Nkolo mpo na bino. Soki boyanolaki na mikakatano na bino na makasi mpenza ya kimoyekoli, mobu oyo eleki ekokaki kozala ya mpamba te.

Na ntongo oyo, toyekoli uta na bakambi ya Eklezia baoyo bawuti na mikili nyonso oyo ezali na bato likolo ya mabele. Ya solo mpenza, mapamboli ya nsango malamu ezali mpo na loposo, lokota, mpe mabota nyonso . Eklezia ya Yesu Klisto ezali eklezia ya mokili mobimba . Yesu Klisto azali mokambi na biso.

Na botondi nyonso, kutu bokono ekokaki te kolembisa bokeyi liboso ya bosolo na Ye te. Nsango malamu ya Yesu Klisto ezali yango nde esengeli na mokili oyo ya mobulungano, ya bondongwani, mpe ya botau.

Mwana moko na moko ya Nzambe azali na libaku ya koyoka mpe kondima libiki, nsango ya bosikoli ya Yesu Klisto. Nsango mosusu te ezali motuya koleka mpo na bomoi na biso—sikawa mpe mpo na libela.² Nsango mosusu te ezali ya kotondisama koleka na elikya. Nsango mosusu te ekoki kolongola boswani kati na lisanga na biso.

Bondimi kati na Yesu Klisto ezali moboko ya boyambi nyonso mpe ezalela ya nguya ya bonzambe. Engebene na Apostolo Paulo, “Kozanga bondimi ezali mpasi mpo na kosepelisa [Nzambe]: mpo ete oyo ayei epai na Nzambe asengeli kondima ete azali, mpe ete azali mopesi makabo na baoyo bakoluka ye na lombango.”³

Eloko nyonso ya malamu na bomoi—lipamboli nyonso ya ntina ya seko—ebandi na bondimi. Kotika Nzambe akonza bomoi na biso ebandi na bondimi ete Ye azala na bolingi ya kokamba biso. Boyamboli ya solo ebandi na bondimi ete Yesu Klisto azali na nguya ya kopetola, kobikisa, mpe kolendisa biso.⁴

“Koboya nguya ya Nzambe te,” profeta Moroni asakolaki, “mpo ye asalaka na nguya, engebene na bondimi ya bana na bato.”⁵ Ezali bondimi na biso nde efungoli nguya ya Nzambe kati na bomoi na biso .

Kosalela bondimi ekoki komonana lokola mosala ya makasi mingi. Ntango mosusu tokoki koluka koyeba soki tokoki kosangisa bondimi ekoka mpo na kozwa mapamboli oyo tozali na yango mposa mpenza. Na yango, Nkolo atiaki bobangi wana efanda na nzela ya maloba ya Alma profeta ya Buku ya Mormon.

Alma asengi biso kaka tomeka liloba mpe “tosalela eteni moko ya bondimi, iyo, atako soki [biso] tokoki te kozala na eloko mosusu koleka mposa ya kondimela.”⁶ Liloba “eteni ya bondimi” ekundolisi ngai elaka ya Nkolo na biblia ete soki biso tozali na bondimi lokola mbuma ya nkona ya seneve,” tokozala na makoki ya “kolobela ngomba oyo, Longwa awa, kende esika mosusu; mpe ekolongwa; mpe eloko moko te ekozala mpasi epai na [biso].”⁷

Nkolo ayebi bolembu na biso ya nzoto. Biso nyonso tobetaka libaku ntango mosusu. Kasi Ye mpe ayebi lisusu monene ya makoki na biso. Nkona ya seneve ebandaka moke mpenza kasi ekomaka nzete monene mpenza mpo bandeke batonga zala kati na bitape na yango. Nkona ya seneve emonisi bondimi ya moke kasi oyo ekolaka .⁸

Nkolo asengisi te bondimi ya kobonga nie mpo na biso tozwa nguya na Ye ebonga nie . Kasi Asengi na biso tondimela.

Bandeko na ngai ya mibali mpe basi ya bolingo, libiangi na ngai epai na bino na ntongo ya Pasika oyo ezali ya kobanda lelo na komatisa bondimi na bino. Na nzela ya bondimi na bino, Yesu Klisto akomatisa makoki na bino ya kotombola bangomba na bomoi na bino,⁹ atako mikakatano na bino moko ekoki kozala monene koleka ngomba ya Mont Everest.

Bangomba na bino ekoki kozala bokabwani, ntembe, bokono, to makambo mosusu ya bino moko. Bangomba na bino ekozala ya ndenge na ndenge, kasi eyano na mikakatano na bino moko na moko ezali ya komatisa bondimi na bino. Yango esengi mosala. Bayekoli ya botau mpe bayekoli ya goigoi bakobunda ntango nyonso mpo na kozwa kutu mwa eteni moko ya bondimi.

Mpo na kosala eloko songolo malamu esengaka kosala makasi. Kokoma moyekoli ya solo ya Yesu Klisto eponi moto te. Komatisa bondimi na bino mpe elikya na Ye esengeli kosala makasi. Nakoki kopesa makanisi mitano mpo na kosunga bino bokolisa bondimi mpe elikya wana.

Ya yambo, boyekoli. Koma moyekoli oyo asila komipesa. Mikotisa yo mobimba kati na makomi mpo na kososola malamu etinda mpe mosala ya Klisto. Yeba malongi ya Klisto mpo ete ososola nguya na yango mpo na bomoi na yo. Kotisa bosolo ete Bomikabi ya Yesu Klisto ezali mpo na yo. Azwaki likolo na Ye moko ya yo bolozi, ya yo mabunga, ya yo bolembu, mpe ya yo masumu. Afutaki motuya ya ntalo esengeli mpe apesaki yo nguya mpo ete otombola ngomba nyonso oyo okokutana na yango. Ozwi nguya wana na bondimi, elikya, mpe bolingi na yo ya kolanda Ye.

Kotombola bangomba na yo ekoki kosenga likamwisi moko. Yekola na ntina ya makamwisi. Makamwisi eyaka engebene na bondimi na yo kati na Nkolo. Ya motuya na bondimi wana ezali kolikya na bolingi mpe manaka na Ye—lolenge nini mpe ntango nini Ye akopambola yo na lisalisi ya likamwisi oyo ozali na yango mposa. Bobele se ya yo kozangabondimi ekopekisa Nzambe apambola yo na makamwisi ya kotombola bangomba na kati ya yo bomoi.¹⁰

Mingi koleka ozali koyekola na ntina ya Mobikisi, ekozalela yo pete mpo na kotia elikya na mawa na Ye, na bolingo na Ye ezanga nsuka, mpe na nguya na Ye elendisaka, ebikisaka, mpe esikolaka. Mobikisi azalaka ata mokolo moko te pene na yo koleka ntango ozali kokutana to komata ngomba na bondimi.

Ya mibale, pona kondimela Yesu Klisto. Soki ozali na ntembe na oyo etali Nzambe Tata mpe Mwna na Ye ya Bolingo to motuya ya Bozongisi to bosolo ya libiangi ya bonzambe ya Joseph Smith lokola profeta, pona kondimela¹¹ mpe tikala sembo. Mema mituna na yo epai ya Nkolo mpe na bato mosusu ya sembo. Yekola na mposa ya kondimela koleka elikya ete okoki komona mbeba kati ya bomoi ya profeta songolo to mabunga na kati ya makomi. Tika komatisa ntembe na yo na kozongelaka yango elongo na bato mosusu ya ntembe. Pesa Nkolo ndingisa ya kokamba yo na mobembo na yo ya bokundoli ya molimo.

Ya misato, sala na bondimi. Olingaki kosala nini soki ozalaki na bondimi mingi ? Kanisa na ntina na yango. Koma na ntina na yango. Nsima zwa ebele ya bondimi na kosalaka eloko songolo oyo esengi ebele ya bondimi.

Ya minei, zwa makuli ya bule na bolongobani. Makuli efungolaka nguya ya Nzambe mpo na bomoi na yo.¹²

Mpe ya mitano, senga lisalisi, epai ya Tata na yo na Lola, na nkombo na Yesu Klisto.

Bondimi esengi mosala. Kozwa emoniseli esengi mosala. Kasi “moto nyonso oyo asengi, akozwa; mpe ye oyo aluki akokuta; mpe na ye oyo abeti, ekofungolelama.”¹³ Nzambe ayebi oyo ekosalisa kokolisa bondimi na yo. Senga, mpe senga lisusu nsima.

Mozangi bondimi akoki koloba ete bondimi ezali mpo na bato na bolembu. Kasi liloba oyo esengeli te kobosana nguya ya bondimi. Bayekoli ya Mobikisi basengelaki bakoba koteya malongi na Ye nsima ya liwa na Ye, na likama ya bomoi na bango, soki batielaki Ye ntembe?¹⁴ Ekokaki Joseph mpe Hyrum Smith konyokwama liwa ya bamartiru na kobatelaka Bozongisi ya Eklezia ya Nkolo soki bazalaki te na litatoli ya sikisiki ete yango ezalaki solo? Esengelaki pene na Basantu 2000 bakufa na nzela ya bapionie¹⁵ soki bazalaki na ntembe ete nsango malamu ya Yesu Klisto ezongisamaki? Ya solo mpenza, bondimi ezali nguya oyo epesi likoki na oyo ekoki kozala bongo te ekokisa oyo ekoki kozala yango te.

Komona mpamba te bondimi oyo osili kozala na yango. Esengi bondimi mpo na kokota na Eklezia mpe kotikala sembo. Esengi bondimi mpo na kolanda baprofeta na esika ya banganga mayele mpe bilobaloba ya bato. Esengi bondimi mpo na kosala misio na ntango ya bokono ya mabe. Esengi bondimi mpo na kobika bomoi ya bopeto ntango mokili ezali konganga ete mobeko ya Nzambe ya bopeto esila ngala sikawa. Esengi bondimi mpo na koteya nsango malamu na bana na mokili ya lelo. Esengi bondimi mpo na kobondela mpo na bomoi ya molingami moko mpe kutu kozala na bondimi koleka mpo na kondima eyano ya kolembisa nzoto.

Mibu mibale eleki, Ndeko mwasi Nelson mpe ngai tokendaki kotala Samoa, Tonga, Fiji, mpe Tahiti. Moko na moko ya bikolo ya bisanga oyo ekutanaka na mvula ya makasi kobeta mikolo ebele. Bandimi bakilaki mpe basambelaki mpo ete mayangani na bango ya libanda ekoka kobatelema na mvula.

Na Samoa, Fiji, mpe Tahiti, kaka se ntango mayangani ebandaki, mvula ekatanaki. Kasi na Tonga, mvula ekatanaki te. Kasi Basantu ya sembo 13.000 bayaki bangonga liboso mpo na kokanga bisika, bazelaki na motema kokita kati na bonoki, mpe nsima bafandaki kati na liyangani moko ya malili ya bangonga mibale.

Tomonaki bondimi makasi na mosala kati ya moko na moko ya bato ya bisanga wana—bondimi ekoka mpo na kopekisa mvula, mpe bondimi ya koyika mpiko ntango mvula ekatanaki te.

Bangomba na kati ya bomoi na biso elongwaka ntango nyonso te na lolenge to ntango tokolinga elongwa. Kasi bondimi na biso ntango nyonso ekopusa biso liboso. Bondimi ntango nyonso ematisi nkonzo na biso na nguya ya bonzambe.

Tosengi oyeba ete: soki eloko songolo mpe moto nyonso na mokili oyo otielaka motema ekoki kokweya, Yesu Klisto mpe Eklezia na Ye mokolo moko te bakokweyisa yo. Nkolo animbaka ata mokolo moko te, to mpe Alalaka te.¹⁶ “Azali se moko lobi eleki, lelo, mpe [lobi ekoya].”¹⁷ Akotika mayokani na Ye,¹⁸ bilaka na Ye, to bolingo na Ye mpo na bato na Ye. Asali makwamisi lelo mpe akosala makamwisi lobi.¹⁹

Bondimi kati na Yesu Klisto ezali nguya monene koleka mpenza tozali na yango na bomoi oyo. Makambo nyonso ezali pete epai na baoyo bandimeli.²⁰

Bondimi na bino makasi kati na Ye ekotombola bangomba—bangomba ya mabanga te oyo epesi bonzenga na mabele kasi bangomba ya mpasi na bomoi na bino. Ya bino bondimi ya makasi ekosalisa bino bobongola mikakatano ekoma esengo mpe libaku malamu.

Na Eyenga oyo ya Pasika, na mayoki na ngai ya mozindo ya bolingo mpe botondi, nasakoli litatoli na ngai ete ya solo Yesu Klisto asekwi. Asekwi mpo na kokamba Eklezia na Ye. Asekwi mpo na kopambola bomoi ya bana nyonso ya Nzambe, bisika nyonso oyo bafandi. Na bondimi kati na Ye, tokoki kotombola bangomba kati na bomoi na biso. Natatoli bongo na nkombo ya bule ya Yesu Klisto, amene.

© 2021 na Intellectual Reserve, Inc. All rights reserved. Ebetami na Etazini. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, May 2021. Lingala. 17468 639

Eteni ya Esika ya Elilingi