“Wanem hem i Godhed?,” Liahona, Jun 2021
Evri Manis Liahona Mesej, Jun 2021
?Wanem Hem I Godhed?
Papa long Heven, Jisas Kraes, mo Tabu Spirit oli tri defren man wetem wan stamba tingting.
Infomesen blong peinting ia Fas Visen, i kam long Jon McNaughton
Wan man blong raetem niuspepa, wan taem i askem Profet Josef Smit wanem ol memba blong Jos Ia blong Jisas Kraes blong Ol Lata-dei Sent oli biliv long hem. Olsem ansa long hemia, Profet i raetem 13 toktok blong bilif we oli singaotem Ol Toktok blong Bilif. Fas toktok hem i talem, “Mifala i biliv long God Papa we I No Save Finis mo long Pikinini blong Hem, Jisas Kraes, mo long Tabu Spirit” (Ol Toktok blong Bilif 1:1 Olgeta tri ia ol mekemap wanem oli singaotem Godhed.
God, Papa We I No Save Finis
God i gat wan bodi blong mit mo bun we bin kasem laef bakegen long ded. Hem i Papa blong spirit blong yumi. Hem i lavem wanwan long ol pikinini blong hem long stret fasin. God i stret evriwan, gat evri paoa, mo save evri samting. Hem i stret, gat sore, mo kaen. Yumi laef olsem ol spirit wetem God bifo yumi bin bon i kam long wol ia. Hem i sendem yumi kam long wol ia blong lan mo gro. Wanem we God i wantem tumas long yumi wanwan ol pikinini blong Hem, i blong gobak stap wetem Hem, afta we yumi ded. God i tijim yumi, se bae yumi mas folem Jisas Kraes blong gobak blong stap long ples blong God.
Kraes I Stap Prij long Spirit Wol, i kam long Robert T. Barrett
Jisas Kraes
Jisas Kraes i gat wan bodi blong mit mo bun we bin kasem laef bakegen long ded. Hem i fas bon Pikinini boe blong God. Bifo we yumi bon, God i jusum Hem blong i Sevya blong yumi. Hemia i minim se Jisas i kam long wol blong i stap olsem wan eksampol long yumi, tijim gospel blong Hem, ded from ol sin blong yumi, sevem yumi long ded. From Jisas Kraes, yumi save kasem fogivnes from ol sin blong mi. Jisas Kraes i safa from fulap samting, mekem se Hem i save andastanem mo helpem yumi. Jisas Kraes i ded mo i laef bakegen, mo i mekem i posibol blong evriwan i save laef bakegen.
Foto i kam long Getty Images
Tabu Spirit
Tabu Spirit i nambatri memba blong Godhed we i nogat bodi blong mit mo bun. Hem i wan spirit. Tabu Spirit i save toktok stret long spirit blong yumi. Hem i testifae se God i ril mo Jisas Kraes i Sevya blong yumi. Tabu Spirit i olsem wan mesenja blong God, blong givim filing blong lav long yumi, lidim yumi, mo kamfotem yumi. Taem yumi kasem baptaes mo konfemesen, yumi kasem presen ia we i Tabu Spirit. Afta long baptaes blong yumi, Tabu Spirit bae i stap oltaem wetem yumi taem yumi kipim ol komanmen blong God.
Fas Visen, i kam long Walter Rane
Fas Visen blong Josef Smit
Truaot long taem, ol pipol oli stap konfius abaot Godhed. Pipol oli no agri long wanem God, Jisas Kraes, mo Tabu Spirit i luk olsem wanem. Hemia risen, from wanem Fas Visen blong Josef Smit i impoten tumas. Hem i luk Papa long Heven mo Jisas Kraes tufala i gat bodi mo tufala i tu defren man.
Stap Lisin, i kam long Maekel Javis Nelson
Seperet be Wan Oltaem
Sam skripja mo ol profet blong tedei i tijim se God, Jisas Kraes, Tabu Spirit olgeta oli defren man wetem wan stamba tingting: fasin blong no save ded mo laef we i no save finis blong yumi (luk long Moses 1:39). Olsem ol memba blong wan tim, Olgeta oli wok tugeta blong helpem yumi evri dei. Yumi kam kolosap moa long Olgeta, taem yumi sakem sin blong yumi mo blong jusum raet.
Ol skripja abaot Godhed
-
Papa long Heven mo Jisas Kraes tufala i wan long stamba tingting (luk long Jon 10:30).
-
Papa long Heven i toktok long Pikinini Boe blong Hem (luk long Matiu 3:16–17).
-
Jisas Kraes i toktok long Papa blong Hem (luk long Jon 11:41).
-
Jisas Kraes i prea blong yumi kam wan, wan dei (luk long Jon 17:11).
-
Josef Smit i bin luk Papa long Heven mo Jisas Kraes (luk long Josef Smit—Histri 1:17).
-
Tabu Spirit i testifae se Jisas Kraes i Sevya blong yumi (luk long Jon 15:26).
© 2021 i kam long Intellectual Reserve, Inc. Oli holem evri raet Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly Liahona Message, June 2021. Bislama. 17470 852