Bosoom Bosoom Liahona Amandzɛɛbɔ, Obiradzi 2021

Nyametsir no nye ebɛn?

Ɔsor Egya, Jesus Christ, na Sunsum Krɔnkrɔn no yɛ abɔdze baasa a wɔwɔ botae kor.

Dza ɔda edzi yie wɔ First Vision [Enyido-adzehu a Odzi Kan], mu a Jon McNaughton yɛɛ nsaano mfonyin no

Ber bi dawurbɔ krataa samufo bi bisaa Nkɔnhyɛnyi Joseph Smith dza Jesus Christ N’Asɔr a ɔwɔ hɔ ma Nda a Odzi Ekyir Ahotseweefo gyedzi wɔ mu. Nyiano mu no, Nkɔnhyɛnyi yi kyerɛkyerɛɛw asɛnka 13 a yɛgye dzi a yɛfrɛ no Gyedzi ho Nsɛmpɔw. Asɛnkã a odzi kan no ka dɛ, “ Yɛgye Nyankopɔn, Onnyiewiei Egya no, na Ne Ba, Jesus Christ, na Sunsum Krɔnkrɔn no dzi” (Gyedzi ho Nsɛmpɔw 1:1). Baasa yinom na yɛfrɛ hɔn Nyame Tsir no.

Nyankopɔn, Onnyiewiei Egya no

Nyankopɔn wɔ nyimpadua su a ɔyɛ honam na mbiew a oewu na ɔasoɛr. Ɔyɛ hɛn sunsum mu Egya. Ɔdɔ ne mba nyinara emudzi mu. Nyankopɔn dzi mu, Ɔwɔ tum nyinara, na Onyim biribiara. Ɔyɛ pɛrpɛr, ehumbɔbɔr na ayamuyie. Yɛnye Nyankopɔn tsenaa ase dɛ esunsum ansaana wɔrowoo hɛn. Ɔsoma hɛn baa asaase dɛ yembosũa adze na yenyin. Nyankopɔn ne pɛ kɛse nye dɛ Ne ba biara bɛsan akɔ nye No akɛtsena wɔ hɛn wu ekyir. Nyankopɔn kyerɛkyerɛ hɛn dɛ yendzi Jesus Christ n’ekyir ama yeetum asan akɔ Ne nkyɛn.

Jesus Christ Preaching in the Spirit World [Jesus Christ Rekã Asɛmpa no wɔ Sunsum Wiadze], Robert T. Barrett yɛɛ nsaano mfonyin no

Jesus Christ

Jesus Christ so wɔ nyimpadua su a ɔyɛ honam na mbiew a oewu na ɔasoɛr. Ɔno nye Nyankopɔn N’abakan Ba. Nyankopɔn saan mu yii No dɛ Ɔmbɛyɛ hɛn Agyenkwa ansaana wɔrowoo hɛn. Iyi kyerɛ dɛ Jesus baa wiadze bɛyɛɛ fasusu maa hɛn, bɛkyerɛkyerɛɛ hɛn asɛmpa no, bɔɔ hɛn bɔn ho werdam, na ɔbɛgye hɛn fi owu mu. Osian Jesus Christ ntsi, sɛ yenu hɛnho a yebotum enya hɛn bɔn ho bɔnfakyɛ. Jesus Christ so hun ndzɛmba beberee mu amandze ama Oeetum aatse hɛn ase na Ɔaboa hɛn. Jesus Christ wuii na ɔtsenaa ase bio, ama obiara so atsena ase bio.

Mfonyin no fi Getty Images hɔ.

Sunsum Krɔnkrɔn

Sunsum Krɔnkrɔn no yɛ Nyame Tsir no mu kor a onnyi nyimpadua. Ɔyɛ sunsum. Sunsum Krɔnkrɔn no tum nye hɛn esunsum ankasa dzi nkitahodzi. Ɔgye dase kyerɛ hɛn dɛ Nyankopɔn wɔ hɔ ampara na Jesus Christ nye hɛn Agyenkwa. Sunsum Krɔnkrɔn no dzi dwuma dɛ Nyankopɔn no somafo a ɔma hɛn ɔdɔ, kwankyerɛ na awerɛkyekyer ho atsenkã. Sɛ wonuma hɛn na wosi hɛn pi a, yenya Sunsum Krɔnkrɔn N’akyɛdze no. Hɛn enuma ekyir no, yedzi Nyankopɔn ne mbrasɛm no do a Sunsum Krɔnkrɔn no nye hɛn tsena aber biara.

First Vision [Enyido-adzehu a Odzi Kan], Walter Rane yɛɛ nsaano mfonyin no

Josepɔh Smith n’Enyido-adzehu a Odzi Kan

Mber pii na nkorɔfo adwen mu ayɛ hɔn konsee wɔ Nyame Tsir no ho. Nkorɔfo nngye mbrɛ Nyankopɔn, Jesus Christ na Sunsum Krɔnkrɔn no tse nnto mu. Iyi nye siantsir kor a Enyido-adzehu a Odzi Kan a Joseph Smith Nyae no ho hia dodow. Ohun dɛ Ɔsor Egya na Jesus Christ wɔ honandua na wɔyɛ abɔdze ankorankor beenu.

Listening [Ntsiei], Michael Jarvis Nelson yɛɛ nsaano mfonyin no

Ankorankor mbom Wɔyɛ Kor

Kyerɛwsɛm na ndɛ mber yi mu nkɔnhyɛfo kyerɛ hɛn dɛ Nyankopɔn, Jesus Christ na Sunsum Krɔnkrɔn no mu biara yɛ soronko a wɔwɔ botae kor: hɛn bɛkyebo na onnyiewiei nkwa (hwɛ Moses 1:39). Tse dɛ kuw kor mu mba, Wɔbɔ mu dzi dwuma dze boa hɛn da biara. Sɛ yenu hɛnho fi hɛn bɔn ho na yɛyɛ dza ɔtsen a yɛtse dɛ yɛabɛn Hɔn.

Kyerɛwsɛm a ɔfa Nyame Tsir no ho

• Ɔsor Egya na Jesus Christ yɛ kor wɔ botae mu (hwɛ John 10:30).

• Ɔsor Egya kasaa kyerɛɛ Ne Ba (hwɛ Matthew 3:16–17).

• Jesus Christ kasaa kyerɛɛ N’Egya (hwɛ John 11:41).

• Jesus Christ bɔɔ mpaa ma hɛn dɛ dabi yɛbɛyɛ kor (hwɛ John 17:11).

• Joseph Smith hun Ɔsor Egya na Jesus Christ (hwɛ Joseph Smith—History 1:17).

• Sunsum Krɔnkrɔn no gye dase dɛ Jesus Christ nye hɛn Agyenkwa (hwɛ John 15:26).

© 2021 by Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, June 2021 ne nkyerɛasee. Fante. 17470 502