Ania ti Kinadios?

Ti Nailangitan nga Ama, ni Jesucristo, ken ti Espiritu Santo ket tallo a nagsisina a kinatao nga addaan iti maymaysa a panggep.

Ladawan

Umuna a Parmata

Detalye manipud iti Umuna a Parmata, ni Jon McNaughton

Maysa nga editor ti pagiwarnak ti nagsaludsod naminsan ken ni Propeta Joseph Smith no ania ti patien dagiti miembro ti Ti Simbaan ni Jesucristo dagiti Santo iti Ud-udina nga Aldaw. Kas sungbat, insurat ti Propeta ti 13 a palawag iti pammati nga awagantayo iti Pagannurotan ti Pammati. Dakamaten ti umuna a pagannurotan ti pammati, “Mamatikami iti Dios, ti Agnanayon nga Ama, ken iti Anakna, ni Jesucristo, ken iti Espiritu Santo” (Pagannurotan ti Pammati 1:1). Dagitoy tallo ti mangbukel iti awagantayo iti Kinadios.

Dios, ti Agnanayon nga Ama

Addaan ti Dios ti nagungar a bagi a nagtagilasag ken nagtagitulang. Isuna ti Ama dagiti espiritutayo. Ay-ayatenna a naan-anay ti tunggal anakna. Ti Dios ket naan-anay, addaan iti amin a bileg, ken ammona ti amin a banag. Isuna ket patas, manangngaasi, ken naanus. Nagbiagtayo a kadua iti Dios kas espiritu sakbay a nayanaktayo. Imbaonnatayo iti daga tapno makasursuro ken dumur-as. Ti kaindaklan a tarigagay iti Dios para iti tunggal maysa kadagiti annakna ket agsubli a makipagtaeng manen Kenkuana kalpasan ti ipapataytayo. Isuronatayo ti Dios a nasken a sumurot ken ni Jesucristo tapno makasubli iti sidong ti Dios.

Ladawan

Ni Jesucristo a Mangaskasaba iti Lubong ti Espiritu

Ni Cristo a Mangaskasaba iti Lubong ti Espiritu, ni Robert T. Barrett

Jesucristo

Ni Jesucristo ket addaan met ti nagungar a bagi a nagtagilasag ken nagtagitulang. Isu ti inauna nga Anak ti Dios. Sakbay a nayanaktayo, pinili ti Dios Isuna nga agbalin a Mangisalakantayo. Kaipapanan daytoy a ni Jesus ket immay iti daga tapno agbalin a pagwadan para kadatayo, a mangisuro iti ebangheliona, a mangsubbot kadagiti basbasoltayo, ken mangispal kadatayo manipud iti patay. Gapu ken ni Jesucristo, mapakawantayo kadagiti basbasoltayo no agbabawitayo. Ni Jesucristo ket nagsagaba pay iti adu a banag tapno mabalin a maawatan ken makatulong kadatayo. Ni Jesucristo ket natay ken kalpasanna nagbiag manen, tapno tunggal maysa ket mabalinnanto ti agbiag manen.

Ladawan

pannakaitanem ni Cristo

Panangiladawan manipud iti Getty Images

Ti Espiritu Santo

Ti Espiritu Santo ti maysa a miembro ti Kinadios nga awanan iti pisikal a bagi. Isu ket espiritu. Ti Espiritu Santo kabaelanna ti direkta a makisarita kadagiti espiritutayo. Paneknekanna kadatayo a napaypayso ti Dios ken ni Jesucristo ti Mangisalakantayo. Agakem ti Espiritu Santo kas mensahero ti Dios tapno mangted kadatayo iti rikna ti ayat, pannarabay, wenno liwliwa. No mabuniagan ken makumpirmaantayo, awatentayo iti sagut ti Espiritu Santo. Kalpasan ti panagbuniag, ti Espiritu Santo ket kanayon a kaduatayo bayat ti panagtungpaltayo kadagiti bilin ti Dios.

Ladawan

Umuna a Parmata

Umuna a Parmata, ni Walter Rane

Umuna a Parmata ni Joseph Smith

Iti adu a panawen dagiti tao ket natikaw maipapan iti Kinadios. Nagsususik dagiti tao maipapan iti no ania ti langa ti Dios, ni Jesucristo, ken ti Espiritu Santo. Daytoy ti maysa a rason no apay a napateg unay iti Umuna a Parmata ni Joseph Smith. Nakitana a ti Nailangitan nga Ama ken ni Jesucristo ket addaanda iti bagi ken dua a nagsina a kinatao.

Ladawan

Panagdengngeg

Ti Panagdengngeg, ni Michael Jarvis Nelson

Nagsina ngem Nagkaykaysa

Dagiti nasantuan a kasuratan ken kabaruanan a propeta ket mangisuro kadatayo a ti Dios, ni Jesucristo, ken ti Espiritu Santo ket nagsisina a kinatao nga addaan maymaysa a panggep: dagiti saan nga ipapatay ken agnanayon a biag (kitaen iti Moises 1:39). Kas miembro ti isu met laeng a timpuyog (team), Agtrabahoda a sangkamaysa tapno tulongandatayo iti inaldaw. Mariknatayo ti as-asideg Kadakuada no agbabawitayo kadagiti basbasoltayo ken pilien ti rumbeng.

Dagiti Nasantuan a Kasuratan maipapan ti Kinadios

Ti Nailangitan nga Ama ken ni Jesucristo ket maymaysa iti panggep (kitaen iti Juan 10:30).
Nagsarita ti Nailangitan nga Ama iti Anakna (kitaen iti Mateo 3:16–17).
Nagsarita ni Jesucristo iti Amana (kitaen iti Juan 11:41).
Ni Jesuscristo inkararagannatayo nga agkaykaysa iti maysa nga aldaw (kitaen iti Juan 17:11).
Nakita ni Joseph Smith ti Nailangitan nga Ama ken ni Jesuscristo (kitaen iti Joseph Smith—Pakasaritaan 1:17).
Paneknekan ti Espiritu Santo a ni Jesucristo ti Mangisalakantayo (kitaen iti Juan 15:26).

© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, June 2021. Ilokano. 17470 864