« តើអ្វីទៅជាក្រុមព្រះ ? » លីអាហូណា ខែ មិថុនា ឆ្នាំ ២០២១
សារលិខិត លីអាហូណា ប្រចាំខែ មិថុនា ឆ្នាំ ២០២១
តើអ្វីទៅជាក្រុមព្រះ ?
ព្រះវរបិតាសួគ៌ ព្រះយេស៊ូវគ្រីស្ទ និង ព្រះវិញ្ញាណបរិសុទ្ធ ជាតួអង្គបីដាច់ដោយឡែកពីគ្នា ដែលមានព្រះរាជគោលបំណងតែមួយ ។
រឿងលម្អិតដកស្រង់ពី ការនិមិត្តដំបូង ដោយ ចន ម៉ាក់ណថុន
និពន្ធនាយកកាសែតម្នាក់ធ្លាប់បានសួរព្យាការី យ៉ូសែប ស្ម៊ីធ ពីអ្វីដែលសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជឿ ។ ជាការឆ្លើយតប ព្យាការីបានសរសេរសេចក្ដីថ្លែងការណ៍នៃជំនឿចំនួន ១៣ ដែលយើងហៅថា មាត្រានៃសេចក្ដីជំនឿ ។ សេចក្ដីថ្លែងការណ៍ទីមួយចែងថា « យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់គឺ ព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ » ( មាត្រានៃសេចក្ដីជំនឿ ១:១ ) ។ ទ្រង់ទាំងបីអង្គនេះបង្កើតជាអ្វីដែលយើងហៅថា ក្រុមព្រះ ។
ព្រះជាព្រះវរបិតា
ព្រះមានព្រះកាយជាសាច់ និងឆ្អឹងដែលបានមានព្រះជន្មរស់ឡើងវិញ ។ ទ្រង់គឺជាព្រះវរបិតាខាងវិញ្ញាណរបស់យើង ។ ព្រះមានព្រះទ័យស្រឡាញ់បុត្រាបុត្រីម្នាក់ៗរបស់ទ្រង់ដោយឥតខ្ចោះ ។ ព្រះល្អឥតខ្ចោះ ទ្រង់មានគ្រប់ទាំងព្រះចេស្តា និងត្រាស់ដឹងគ្រប់ការណ៍ទាំងអស់ ។ ទ្រង់មានយុត្តិធម៌ ប្រកបដោយក្ដីមេត្តាករុណា និងមានព្រះទ័យសប្បុរស ។ យើងបានរស់នៅជាមួយព្រះជាកូនវិញ្ញាណ មុនពេលយើងចាប់កំណើតមក ។ ទ្រង់បានបញ្ជូនយើងមកផែនដីដើម្បីរៀនសូត្រ និងរីកចម្រើន ។ ព្រះរាជបំណងដ៏ធំបំផុតរបស់ព្រះ គឺដើម្បីឲ្យបុត្រាបុត្រីម្នាក់ៗរបស់ទ្រង់ ត្រឡប់ទៅរស់នៅជាមួយទ្រង់ម្ដងទៀត បន្ទាប់ពីយើងស្លាប់ទៅ ។ ព្រះបង្រៀនយើងថា យើងត្រូវតែធ្វើតាមព្រះយេស៊ូវគ្រីស្ទ ដើម្បីត្រឡប់ទៅកាន់វត្តមានរបស់ព្រះវិញ ។
ព្រះគ្រីស្ទកំពុងផ្សាយដំណឹងល្អនៅក្នុងពិភពវិញ្ញាណ ដោយ រ៉ូបឺត ធី បារ៉ែត
ព្រះយេស៊ូវគ្រីស្ទ
ព្រះយេស៊ូវគ្រីស្ទក៏មានព្រះកាយជាសាច់ និងឆ្អឹងដែលបានមានព្រះជន្មរស់ឡើងវិញផងដែរ ។ ទ្រង់គឺជាបុត្រាទីមួយរបស់ព្រះ ។ មុនពេលយើងបានកើតមក ព្រះបានជ្រើសរើសទ្រង់ឲ្យធ្វើជាព្រះអង្គសង្គ្រោះរបស់យើង ។ នេះមានន័យថា ព្រះយេស៊ូវបានយាងមកផែនដី ដើម្បីធ្វើជាគំរូដល់យើង បង្រៀនដំណឹងល្អរបស់ទ្រង់ ធ្វើដង្វាយធួនសម្រាប់អំពើបាបរបស់យើង និងសង្គ្រោះយើងពីសេចក្ដីស្លាប់ ។ ដោយសារតែព្រះយេស៊ូវគ្រីស្ទ នោះយើងអាចទទួលបានការអភ័យទោសពីអំពើបាបរបស់យើង ពេលយើងប្រែចិត្ត ។ ព្រះយេស៊ូវគ្រីស្ទក៏បានរងទុក្ខនូវការណ៍ជាច្រើន ដើម្បីទ្រង់អាចយល់ និងជួយយើងផងដែរ ។ ព្រះយេស៊ូវគ្រីស្ទបានសុគត រួចហើយបានមានព្រះជន្មរស់ម្ដងទៀត ដែលធ្វើឲ្យមនុស្សគ្រប់គ្នាមានលទ្ធភាពដើម្បីរស់ម្ដងទៀតផងដែរ ។
រូបថតមកពី Getty Images
ព្រះវិញ្ញាណបរិសុទ្ធ
ព្រះវិញ្ញាណបរិសុទ្ធជាសមាជិកមួយអង្គនៃក្រុមព្រះ ដែលពុំមានព្រះកាយទេ ។ ទ្រង់គឺជាវិញ្ញាណ ។ ព្រះវិញ្ញាណបរិសុទ្ធអាចទាក់ទងជាមួយនឹងវិញ្ញាណរបស់យើងដោយផ្ទាល់ ។ ទ្រង់ថ្លែងទីបន្ទាល់ដល់យើងថា ព្រះគឺពិត ហើយថា ព្រះយេស៊ូវគ្រីស្ទជាព្រះអង្គសង្គ្រោះរបស់យើង ។ ព្រះវិញ្ញាណបរិសុទ្ធដើរតួជាសារទូតរបស់ព្រះ ដើម្បីប្រទានអារម្មណ៍នៃសេចក្ដីស្រឡាញ់ ការណែនាំ ឬការលួងលោមដល់យើង ។ ពេលយើងទទួលបុណ្យជ្រមុជទឹក និងពិធីបញ្ជាក់ នោះយើងទទួលបានអំណោយទាននៃព្រះវិញ្ញាណបរិសុទ្ធ ។ បន្ទាប់ពីបុណ្យជ្រមុជទឹករបស់យើង នោះព្រះវិញ្ញាណបរិសុទ្ធអាចគង់នៅជាមួយយើងជានិច្ច កាលដែលយើងរក្សាបទបញ្ញត្តិរបស់ព្រះ ។
ការនិមិត្តដំបូង ដោយ វលធើរ រេន
ការនិមិត្តដំបូងរបស់យ៉ូសែប ស្ម៊ីធ
យូរៗទៅ មនុស្សមានការយល់ច្រឡំអំពីក្រុមព្រះ ។ មនុស្សមានការមិនយល់ស្របថា ព្រះ ព្រះយេស៊ូវគ្រីស្ទ និងព្រះវិញ្ញាណបរិសុទ្ធ មានលក្ខណៈយ៉ាងណា ។ នេះជាមូលហេតុមួយដែលការនិមិត្តដំបូងដែល យ៉ូសែប ស្ម៊ីធ បានមានសារៈសំខាន់ខ្លាំងណាស់ ។ លោកបានឃើញថា ព្រះវរបិតាសួគ៌ និងព្រះយេស៊ូវគ្រីស្ទមានព្រះកាយ ហើយជាអង្គពីរដាច់ដោយឡែកពីគ្នា ។
ការស្ដាប់ ដោយ ម៉ៃឃល ចាវីស ណិលសុន
ដាច់ដោយឡែក ប៉ុន្តែរួបរួម
ព្រះគម្ពីរ និងព្យាការីសម័យទំនើបបង្រៀនយើងថា ព្រះ ព្រះយេស៊ូវគ្រីស្ទ និងព្រះវិញ្ញាណបរិសុទ្ធ ជាអង្គដាច់ដោយឡែកពីគ្នាដែលមានព្រះរាជគោលបំណងតែមួយ ៖ អមតភាព និងជីវិតដ៏នៅអស់កល្បជានិច្ចរបស់យើង ( សូមមើល ម៉ូសេ ១:៣៩ ) ។ ដូចជាសមាជិកនៃក្រុមតែមួយដែរ ពួកទ្រង់ធ្វើកិច្ចការរួមគ្នាដើម្បីជួយយើងជារៀងរាល់ថ្ងៃ ។ យើងអាចមានអារម្មណ៍កាន់តែជិតនឹងពួកទ្រង់ ពេលយើងប្រែចិត្តពីអំពើបាបរបស់យើង ហើយជ្រើសរើសអ្វីដែលត្រឹមត្រូវ ។
បទគម្ពីរអំពីក្រុមព្រះ
-
ព្រះវរបិតាសួគ៌ និងព្រះយេស៊ូវគ្រីស្ទមានព្រះរាជគោលបំណងតែមួយ ( សូមមើល យ៉ូហាន ១០:៣០ ) ។
-
ព្រះវរបិតាសួគ៌មានព្រះបន្ទូលទៅកាន់ព្រះរាជបុត្រាទ្រង់ ( សូមមើល ម៉ាថាយ ៣:១៦–១៧ ) ។
-
ព្រះយេស៊ូវគ្រីស្ទមានព្រះបន្ទូលទៅកាន់ព្រះវរបិតារបស់ទ្រង់ ( សូមមើល យ៉ូហាន ១១:៤១ ) ។
-
ព្រះយេស៊ូវគ្រីស្ទបានអធិស្ឋានដើម្បីឲ្យយើងក្លាយទៅជាតែមួយ នៅថ្ងៃណាមួយ ( សូមមើល យ៉ូហាន ១៧:១១ ) ។
-
យ៉ូសែប ស្ម៊ីធ បានឃើញព្រះវរបិតាសួគ៌ និងព្រះយេស៊ូវគ្រីស្ទ ( សូមមើល យ៉ូសែប ស្ម៊ីធ––ប្រវត្តិ ១:១៧ ) ។
-
ព្រះវិញ្ញាណបរិសុទ្ធថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្គ្រោះរបស់យើង ( សូមមើល យ៉ូហាន ១៥:២៦ ) ។
© 2021 by Intellectual Reserve, Inc. All rights reserved. បោះពុម្ពនៅ ស.រ.អា ។ អនុមតិជាភាសាអង់គ្លេស ៖ ៦/១៩ ។ អនុមតិឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, June 2021. Cambodian. 17470 258