Etinda ya Sanza ya Liahona Sanza ya motoba 2021

Bonzambe Ezali Nini?

Nzambe Tata, Yesu Klisto, mpe Molimo Mosantu bazali bato basato bakabwana na ntina moko.

Makambo uta na Limoni ya Yambo, na Jon McNaughton

Mokomi moko ya zulunale mokolo mosusu atunaki Profeta Joseph Smith maye bandimi ya Eklezia ya Yesu Klisto ya Basantu ba Mikolo mya Nsuka bandimelaka. Na eyano, Profeta akomaki masakola 13 ya boyambi tobengi Biteni ya Bondimi. Esakola ya yambo elobi, “Tondimeli Nzambe, Tata wa Seko, mpe Mwana na Ye, Yesu Klisto, mpe Molimo Mosantu” ((Biteni ya Bondimi 1:1). Misato oyo esali maye tobengi Bonzambe.

Nzambe, Tata wa Seko

Nzambe azali na nzoto esekwa ya mosuni mpe mikuwa. Azali Tata ya milimo na biso. Alingaka moko na moko ya bana na Ye ne lolenge ya malamu kokoka. Nzambe abongi nie, azali na nguya nyonso, mpe ayebi makambo nyonso. Azali sembo, ngolu, mpe boboto. Tozalaki na bomoi lokola milimo elongo na Nzambe yambo ete tobotama? Atindaki biso na mabele mpo na koyekola mpe kokola. Mposa monene mpenza ya Nzambe ezali ete moko na moko ya mwana na Ye azonga kozala na bomoi elongo na Ye lisusu nsima ya liwa na biso. Nzambe ateyi biso ete tosengeli kolanda Yesu Klisto mpo na kozonga na miso ya Nzambe.

Klisto Azali Koteya na Mokili ya Milimo, na Robert T. Barrett

Yesu Klisto

Yesu azali lisusu na nzoto moko esekwa ya mosuni mpe mikuwa. Azali Mwana mobotami ya yambo ya Nzambe. Liboso tobotama, Nzambe aponaki Ye mpo na kozala Mobikisi na biso; Oyo elingi koloba Yesu ayaki na nse mpo na kozala ndakisa mpo na biso, koteya nsango malamu na Ye, komikaba mpo na masumu na biso, mpe kobikisa biso uta na liwa. Na ntina na Yesu Klisto, tokoki kolimbisama na masumu na biso ntango toyamboli. Yesu Klisto lisusu ayokaki mpasi ya makambo mingi mpo ete Ye akokaki kososola mpe kosunga biso. Yesu Klisto akufaki mpe nsima azongaki na bomoi, kosalaka yango ekoka kosalema mpo ete moto nyonso azala na bomoi lisusu.

Foto uta na Getty Images

Molimo Mosantu

Molimo Mosantu azali moko ya Bonzambe oyo azali na nzoto ya mosuni te. Azali molimo. Molimo Mosantu azali na makoki ya kosolola mbala moko na milimo na biso. Atatolaka epai na biso ete Nzambe azali solo mpe Yesu Klisto azali Mobikisi. Molimo Mosantu asalaka lokola motindami ya Nzambe mpo na kopesa biso mayoki ya bolingo, bokambi, to libondi. Ntango tobatisami mpe tokulisami nkotisa, tozwi likabo ya Molimo Mosantu. Nsima ya libatisi na biso, Molimo Mosantu akoki ntango nyonso kotikala elongo na biso ntango tobateli mitindo ya Nzambe.

Limoni ya Yambo, na Walter Rane

Limoni ya Yambo ya Joseph Smith

Mibu kolekaka bato babulingisamaki na oyo etali Bonzambe. Bato bayokanaki te na oyo etali lolenge Nzambe, Yesu Klisto, mpe Molimo Mosantu bazali. Oyo ntina moko mpo na nini Limoni ya Yambo oyo Joseph Smith amonaki ezalaki motuya mpenza. Amonaki ete Tata ya Lola mpe Yesu Klisto bazali na banzoto mpe bazali bato mibale bakabwana.

Koyokaka, na Michael Jarvis Nelson

Kokabwana kasi Bomoko

Makomi mpe baprofeta ya sika bateyi biso ete Nzambe, Yesu Klisto, mpe Molimo mosantu bazali bato bakabwana na ntina moko: bozangi kufa na biso mpe bomoi ya seko (tala Moses 1:39). Lokola bato ya ekipi moko, Basalaka lisanga mpo na kosunga biso mikolo nyonso. Tokoki komiyoka penepene koleka na Bango ntango toyamboli masumu na biso mpe toponi malamu.

Makomi matali Bonzambe

• Tata ya Lola mpe Yesu Klisto bazali moko na ntina (tala Yoane 10:30).

• Tata ya Lola alobaki epai na Mwana na Ye (tala Matai 3:16–17).

• Yesu Klisto alobaki epai ya Tata Ye (tala Yoane 11:41).

• Yesu Klisto asambelaki mpo na biso mpo ete tokoma bomoko mokolo mosusu (tala Yoane 17:11).

• Joseph Smith amonaki Tata ya Lola mpe Yesu Klisto (tala Joseph Smith—Mambi ya Kala 1:17–17).

• Molimo Mosantu atatoli ete Yesu Klisto azali Mobikisi na biso.(tala Yoane 15:26).

© 2021 na Intellectual Reserve, Inc. All rights reserved. Ebetami na Etazini. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, June 2021. Lingala. 97925 639