“Fori ewe Mettoch mi Mak,” Ren ewe Pochokunen Sarafo, July 2021, 18–19.
Porous Iteiten maram Ren Pochokunen Serafo July 2021
Fori ewe Mettoch mi Mak
Makketiw met ka ekieki nupwen ka kaeo noum kewe pukefel a tongeni anisuk ne kaeo.
“Iteiten fansoun ua poputa ne annea ekkewe pukefel, Ua anut!” emon misineri a ereni noun we presetenin misineri. “Usun nge ekkewe pukefel ir safeen anut!”
Noun we preseten a ponueni, “En mi kan makketiw mettoch nupwen ka aneani?”
“Apw,” ewe misineri a apasa.
“A mecheres om kopwe anut ika mut ngeni ekiekum epwe morukono ika pwe kechok aneani,” ewe preseten a apasa, “nge kose tongeni anut ika pwe ke apachata om kopwe mak!”
Ewe pesepes ei presetenin misineri a ngeni noun we misineri akan weires ne kaeo a fokkun watte ekkesiwinin. Iwe ika pwe ke kukkuta eu minefon anen an epwe apochokuna om kaeo pukefel, sotuni ei. Nupwen kopwe makkei usun met ka aneani, kopwe tongeni kuna met epwe kuu manauom me ennetin kaeo seni, pwan.
Ikei ekkoch mettoch sia kuna ammen namot.
Brother Steven Lund:
Ua tumunu ochu epwe wor toropwe iteitan nupwen ua anea. Nupwen ewe Ngun mi Fel epwe aiti ngeni ei nupwen ua kaeo, ua makketiw met ua mefi.
Ua angei ei ekiek seni Elter Richard G. Scott (1928–2015) seni ewe Mwichen Engon me Ruemon Aposel, ewe a apasa: “Makketiw non eu neni epwe tumun ekkewe auchean mettoch ka kaeo seni ewe Ngun. Kopwe kuna pwe nupwen ka makketiw auchean met om memef, napengeni chommong epwe pwan fis. Pwan, ewe sine a nonnom reom epwe nom non unusen manauaom” (“To Acquire Knowledge and the Strength to Use It Wisely,” Ensign, June 2002, 32).
Ua sinei ekkena kapas mi pung. Nupwen ua amonata afanafan me nesen, use chok no ngeni ekkewe pukefel nge pwan ngeni met ua makketiw nupwen ua anneanir.
Brother Ahmad Corbitt:
Ua sani ai upwe kaeo ren pekin itenap. Ua aneani ekkewe pukefel seni nepoputan ngeni nesoponon, nge ua pwan sani ai upwe mwetefetan me kaeo itenap. Ren awewe, Ua aea ewe Emwenin Itenap ne kutta ekkewe uwekisin won nuku ika ewe ochufengenin Israel. Iwe use chok makketiw met ua kaeo, nge ua makketiw met ua kaeo pwe upwe nengen fichi ika ua fokkun weweiti. Ua men mwar itetan ren ukukun ai weweochuti mettoch nupwen ua fori ei. Ua pwan fini ekkoch uwokisin upwe chechemeni.
Brother Bradley Wilcox:
Ua komoch eu puken kaeo nupwen ua makkei ekkewe uwekisin non pusin ai kapas. Ren awewe, “Ren ewe inisin aramas i ewe chon koum ngeni Kot” (Mosiah 3:19) a winiti “Pun ewe tipeforean me siwinimangen mwan a finata an epwe koum ngeni Kot, nge Kot ese oputa i. Kot i chiechian mi murino.”
Ua pwan makketiw kapas eis. Ir mi tongeni ekkewe kapas eis ua ekieki me mwen ai annea, ika ra tongeni kapas eis minne ua ekieki nupwen ua anea. Eu me nein, a anisi ei ne ekiek.
Ewe Manamanen Makketiw met Ka Ekieki
Emon me emon non am ei presetensi a sokofesen am keao ekkewe pukefel , nge aua mak nupwen aua kaeo!
Annea a anisi kich ach sipwe amwochunuku ach ekiek me memef. A auchea ei. Me nupwen sia kapas ika mak, sia kuna me awateno ach ekiek me memef seni non netipach. Aua mefi pwe a anisi kem ne manaueni ennetin ewe kapas allim.
Emon anuon a pusin kuna ei ennet nupwen a kefin an epwe afanafan non ew mwichen sakrament. A kan rongorong chommong aramas nupwen ra afanafan nge ese chechemeni tichikin. Ei fansoun a sokono. Nupwen a makketiw ew tettenin mak ren pusin an afanafan, ese chok anisi an epwe atoura me ateteni an we afanafan, nge a chechemeni non fansoun nakatam.
Ei chok epwe pwan fis non om kaeo pukefel. Ika pwe ka anutono nupwen ka suki noum we pukefel, iei fansoun kopwe pwaata. Sotuni ne wau efoch pin, pen, fon, ika kampiuter me makkei. Kopwe fokkun mwar ren ewe ekkesiwin epwe fis!
© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Monthly For the Strength of Youth Message, July 2021. Chuukese. 17471 901