Ol Voes blong Ol Lata-dei Sent
Stap Blesem Ol Bubu blong Mi
Taem mi bin kasem petriakel blesing blong mi, hat blong mi i fulap long lav long ol bubu blong mi.
Foto i kam long Richard M. Romney
Mi bin bon long Kamerun, graon blong ol bubu blong mi. Afta, mi muvaot i go stap long Franis, long ples ia, mi stap laef long hem, skul mo wok olsem wan nes long ol defdefren hospital long Paris. Naoia mi stap long Montereal, ples ia, mi stap wok yet olsem wan nes.
Mi bin stap lukaotem tru Jos Ia blong Jisas Kraes blong plante yia. Taem mi bin mitim ol misinari long Paris, Tabu Spirit i bin testifae long mi, se naoia, mi faenem wanem we mi bin stap lukaotem—Jos Ia blong Jisas Kraes blong Ol Lata-dei Sent. !Mi bin fulap long bigfala glad mekem se mi ting se mi stap finis long heven! Mi bin tingting strong blong laef fulwan folem gospel.
Mi bin kasem tijing blong lukaotem ol bubu blong mi mo blong mekem ol odinens long bihaf blong olgeta insaed long tempol. Taem mi kasem petriakel blesing blong mi, i talem long mi se bae mi save kam wan sevya long Bigfala Hil Saeon mo karem fasin blong sevem man i kam long famli blong mi. Hat blong i fulap long lav long olgeta; mi no save lego olgeta i go lus. Stat long taem ia, mi bin traehad blong wok long famli histri mo stadi blong famli laen.
Oltaem mi bin save se mi bon long wan famli we i kamaot long famli laen blong wan king we i blong Kamerun, Bamoun famli. Ol stori long kastom mo histri i talem se ol pipol ia oli bin kam long Asaria mo oli bin miks wetem ol narafala pipol taem we ol man oli stap muvaot blong go stap laef long wan narafala ples. Oli bin kipim ol famli laen histri blong olgeta mo raetemdaon ol histri blong olgeta stat long 1300 AKD. Ol pepa ia oli stap insaed long laebri blong haos blong king. Wetem plante narafala histri, oli talem stori blong bigfala bubu man long saed blong mama we nem blong hem, Fon-gouhouo, we i rul stat long 1818 kasem 1863.
Mi bin save kasembak homgraon blong mi, mo olsem wan memba blong Bamoun famli, oli givim raet long mi blong save luk ol pepa ia. Mi bin visitim king tu, mitim ol narafala ofisa long gavman mo toktok long ol bigbigman abaot Jos mo intres blong Jos long saed blong famli histri. Mi mi glad se, tangkyu long gospel we i bin kambak, mi save mekem pat blong mi blong blesem homgraon blong mi mo ol bubu blong mi.