Milwol ni Ngan Thapeg ko biney e Pul nifan e Liahona ko July 2021

Chitamangdad nibay u Tharmiy e Ba’adag ni Ngad Falfalan’gad

Nap’an gadad ra pugoran fare falfalan’ ko tonom rok Got, ma rayag ni ka gadad ra pire’eg e falfalan’ ko ngiyal’ nib gel e gafgow ulan e yafos rodad.

Somm’on nin gargelegdad nga fayleng, ud moyed rok e Chitamangdad nibay u Tharmiy ni gadad bugi ya’al ni pi fak. Dag ba tonom ko rogon ni nge ayuweg pi fak ni ngar filed mi yad mon’og. Ko biney e tonom, ma rayag ni ngad boded Ir ma rayag ni ngad thapegned e falfalan’ ni gubinfen. Biney e tonom e rayag ni ngan thapeg ni bachan Fak Got, ni Yesus Kristus, ni yib nga fayleng ngabi gafgow ni fan ko pi denen rodad, ba gafgow ni yibi tay ni ka nog e Bayul ngay.

Biney e tonom ko Chitamangdad nibay u Tharmiy e ka nog e tonom ko

• falfalan’ ngay (mu guy ko Alma 42:8),

• thapeg (mu guy ko Moses 6:62),

• bayul (mu guy ko Jacob 6:8), fa

• murunguy (mu guy ko Alma 42:15).

Ni wod e tiney nge ku boch e chep nib thothup ni ke dag, ni Chitamangdad nibay u Tharmiy e ba’adag ni ngad boded Ir, ma gadad sul Ngak, min thapeg e bin nriyul’ e falfalan’ (mu guy ko Moses 1:39).

Kad Bad nga Fayleng ni ngan Fil min Mon’og

Got e pi’ dad nga fayleng, ko gin nrayag ni ngad thapegned e dowef riy (mu guy ko Genesis 1:26–27). Btu’uf ni ngayag e dowef ni nge ayuwegdad ko biney e yafos u fayleng.

Manang Got ni gathi gubin ngayal’ ma gadadra par ni gadad bfalfalan’. Gadadra thamiy e kirban’, a’mith, nge yam’. Machane ufithik e magawon ni ma buch ulan e yafos rodad, Chitamangdad nibay u Tharmiy e bayi fil me ayuwegdad ngad mon’ogad.

Ke pi’ Got mot’wondad ni ngan mel’eg, u thilin e tin nib kireb fa tin nib mangil. Ke pi’ motwon ngodad ni ngad mel’egned e tin ni ngad rrin’ed nge tin ni ngad tafney niged. Ke pi’ ngodad fapi chep nib thothup nge pi profet nib fos ni nge ayuwegdad ngad filed min mel’eg e tin nib mat’aw (mu guy ko Abraham 3:25).

Gay Rogon ni Ngan bod Yesus Kristus

De pi’ dad Got nga fayleng nde dag rogon ngodad (mu guy ko John 13:15). Ke pi’ Fak, ni Yesus Kristus, ni nge dag ngodad fare pi’ i kanawo’. Ra ngan fil rogon ni ngan leak, rayag ni ngad be’eged fapi chep nib thothup ni ngan nang ko mini’ e chaney nge n’en ni ke rrin’ napan ni i moy u fayleng. Krayag ni ngad boded Kristus ko rogon ni gadad be fol ku Got nge tu’ufeg e gidii’.

Napan ni gadadra oloboch, ma gadad fith ni ngan n’ag fan e kireb rodad u dakean e gelingin fare Bayul rok Yesus Kristus ni nge ayuwegdad ngan thil. Rayag ni ngad falfalan’gad napan ni gadadra gay rogon ni gubin e rran ni ngad boded Ir.

Yam’ e Gathi Ireram Tomuren

Napan ni gadadra yim’, ma ya’al rodad e bayi yan ko fare tofen e ya’al. Ko gin’em ma bay da ul’ul’gad ngad filed min fal’ag rogoy ko fare Foskoyam’.

Napan e Foskoyam’, ma dogur nge ya’al rodad e bay ki sul nga ta’abang. Dowef rodad ni bayi par nib poloʼ, ma dakuriy biʼid ni ran gafgow ko yamʼ fa urngin mit e mʼar ni ma tay e dagur (mu guy ko Alma 11:44–45). Ni wod rogon ni yimʼ Yesus Kristus me fos ko yam biyay, gadad gubin ni gadad ra fos biyay.

Napan nra pufthin nagdad Got, ma ra pufthin nagdad ko rogon e pi ngongol nge tin ni gadad be arar nag. Faʼanra kad gayed rogon ni ngan fol ko fapi motochiyel rok nge fapi mʼag ni kad michegned ngak e Chitamangdad nibay u Tharmiy, ma aram nrayag ni ngad pired Rokʼ biyay.

Rogon e Yafos ni yibe Par rok Got nge Gathon e Tabinaw rodad u Tharmiy

Gadadra par rok Got nge Yesus Kristus, ulan fare bin thʼabi tolang e yirir rok Got. Gadadra par u rom nib muʼun fapi gathon e tabinaw rodad ngay nib manechubog ni faʼanra kan seal nagdad nga taʼabang. Ma gadadra pireʼeg e gapas, falfalanʼ, nge tofan (mu guy ko Mosiah 2:41).

Yafos rodad u fayleng e bay nib momawʼ boch i ngiyalʼ, machane faʼanra gadadra leak Yesus Kristus, ma rayag ni ngad pireʼeg e falfalanʼ ko biney e yafos nge falfalanʼ ni manemus ko bin migid e yafos ni bay ki yib.

Mang e ma yog e Chep nib Thothup ni mornga’agen fare Tonom ko Falfalanʼ?

Rogon ni gadad be dugliy e yafos rodad e rib gaʼfan. Got e ra pufthin nagdad ko rogon e pi ngongol nge tafney rodad (mu guy ko Alma 41:3).

Mo’oniyan’ e ir e to’ogor ko falfalan’ rodad. Ma pi’ e lumel ni nge gathay e yafos rodad u fayleng min denen. Be gay rogon ni nge gubin e gidiiʼ me kirbaenʼ ni boed ir (mu guy ko 2 Nephi 2:27).

Napan nra michan’dad ko tonom rok Got, ma rayag e gapas ngodad ndemtrug gelngin e mo’owar ni be yib ngodad. Rayag ni nge pagan’dad ni gadad ra par rok Got ni manechubog (mu guy ko Doctrine and Covenants 59:23).

© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Mulwol ni Ngan Thapeg ko biney e Pul nifan e Monthly Liahona Message, July 2021. Yapese. 17471 905.

Gubin e art riy ni ke yib rok i J. Kirk Richards