“Prishud I Paoa blong God,” Liahona, Ogis 2021
Liahona Mesej blong Evri Manis, Ogis 2021
Prishud I Paoa blong God
God i blesem yumi tru long paoa blong prishud. Ol blesing blong prishud oli stap blong evriwan.
Prishud hem i paoa blong God. Hem i yusum paoa ia blong blesem evriwan long ol pikinini blong Hem, mo blong helpem yumi blong gobak stap laef wetem Hem. God i givim prishud paoa long ol pikinini blong Hem long wol ia. Wetem paoa ia blong prishud, ol prishud lida oli stap lidim Jos, mo olgeta we oli gat prishud oli save mekem ol tabu odinens, olsem baptaes, we i helpem yumi kam kolosap moa long God. Evri man mo evri woman, we i klin inaf blong kasem ol odinens blong prishud, mo oli kipim ol kavenan (ol tabu promes), hem i save yusum paoa ia blong God.
Oli bin Givim Prishud Paoa long Josef Smit
Taem Jisas Kraes i bin stap long wol ia, Hem i lidim Jos blong Hem wetem paoa blong prishud. Hem i bin givim paoa tu long Ol Aposol blong Hem. Long plante handred yia bifo afta we Ol Aposol ia oli ded, fulap memba oli nomo kam long Jos. Oli wokem sam jenis we i no stret long gospel, mo long fasin we Jos i wok folem. Prishud paoa blong God i nomo stap long wol. Long 1829, Jisas i sendem Jon Baptaes mo Ol Aposol ia, Pita, Jemes mo Jon blong oli givim prishud long Josef Smit. Jos Ia blong Jisas Kraes blong Ol Lata-dei Sent, i wan oganaesesen ia nomo long wol we i gat prishud atoriti ia we i kam long God.
Voes blong Pita, Jemes mo Jon,i kam long Linda Kurley Christensen mo Michael T. Malm
Ol Ki blong Prishud
Ol ki blong prishud oli givim raet mo atoriti blong daerektem fasin blong yusum prishud, olsem blong givim raet blong mekem ol odinens. Jisas Kraes i holem evri ki blong prishud. Presiden blong Jos, i wan man ia nomo long wol we i save yusum ol prishud ki ia blong daerektem ful Jos. Anda long daereksen blong hem, i gat sam narafala man we oli save yusum samfala ki blong mekem wok ia blong God. Ol lida, olsem ol bisop mo stek presiden, oli yusum ol prishud ki ia blong lidim wok insaed long wod mo stek we oli stap long hem. From se ol koling blong givim seves oli kam long ol lida we oli kasem ol prishud ki ia, ol man mo ol woman we i stap givim seves long ol koling, oli stap yusum prishud atoriti ia taem oli stap mekem ol diuti blong olgeta.
Melkesedek Prishud mo Aronik Prishud
Prishud i gat tufala pat: Melkesedek Prishud mo Aronik Prishud. Tru long atoriti blong Melkesedek Prishud, ol lida blong Jos oli daerektem mo lukaotem evri wok blong Jos long saed blong spirit, olsem misinari mo tempol wok. Aronik Prishud i wok anda long atoriti blong Melkesedek Prishud. Atoriti ia, oli yusum blong mekem ol odinens olsem baptaes mo sakramen.
Ol Blesing blong Prishud
Tru long ol kavenan mo ol odinens blong prishud, God i mekem ol bigfala blesing oli stap blong evriwan long ol pikinini blong Hem. Ol blesing ia, i gat baptaes, presen ia we i Tabu Spirit, sakramen mo ol odinens long tempol. Ol man mo woman we oli kasem endaomen insaed long tempol, oli kasem presen ia we i prishud paoa blong God, tru long ol kavenan we oli mekem insaed long tempol. Yumi save kasem tu ol prishud blesing blong kam oraet bakegen long sik, blong kamfot, mo blong Hem i soem rod long yumi.
?Wanem Nao Ol Skripja Oli Stap Talem Abaot Prishud?
Semmak prishud paoa ia we i bin stap bifo, i stap semwan i we i stap naoia (luk long Moses 6:7).
Ol ki blong prishud oli meksua se yumi save mekem wok blong Lod i stap hapen long wan fasin we i gat oda long hem (luk long Doktrin mo Ol Kavenan 42:11).
Ol man we oli gat prishud ia, oli save yusum paoa ia folem “ol prinsipol blong stret mo gud fasin” (Doktrin mo Ol Kavenan 121:36).
Sam long ol diuti blong olgeta we oli gat prishud, oli tokbaot long Doktrin mo Kavenan 20:38–67.
© 2021 i kam long Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly Liahona Message, August 2021. Bislama. 17472 852