Porous ren Liahona Iteiten maram, August 2021

Ewe Pristut An Kot Manaman

Kot a efeiochukich ren ewe manamanen ewe pristut. Feiochun Pristut a wor fan iten meinisin.

Ewe pristut ewe manamanen Kot. A aea ei manaman an epwe efeiochu Noun kewe semirit me anisir ne niwin ar repwe nonnom ren I. Kot a ngeni Noun kewe won fonufan ewe manamanen pristut. Ren ei manaman, sou emwenin pristut ra tongeni emweni ewe Mwichefen, me ekkewe a wor rer ewe pristut ra tongeni fori ekkewe angangepin, ussun papatais, minne a anisikich ach sipwe kan ngeni Kot. Meinisin mwan me fefin ir mi unusoch ra angei ekkewe angangepin an pristut me aponueta ekkewe (annuk mi pin) a wor ren ewe aan ngeni ewe manamanen Kot.

Manamanen Pristut a fen No ngeni Joseph Smith

Nupwen Jises Kraist a nom won fonufan, I a emweni An Mwichefen ren manamanen pristut. I a pwan ngeni Noun kewe Aposel ei manaman. Non ekkewe fansoun mwirin ra mano, chommong chon Mwichefen ra morukono seni ewe Mwichefen. Ra amwenono ne siwini ewe kapas allim me nappanapen angangen ewe Mwichefen. Ewe pristutun Kot ese chiwen nom won fonufan. Non 1829, Jises a tinano John soun Papatais me ekkewe Aposel Peter, James me John ar repwe ngeni Joseph Smith ewe pristut. Ewe Mwichefenin Jises Kraist ren Aramas mi Pin Non Fansoun Soponon ina chok ewe mwich won fonufan mi wor ren ei mumuta seni Kot.

Ewe Mongungun Peter, James, me John, seni Linda Curley Christensen me Michael T. Malm.

Kewe kien ewe Pristut

Kewe kien Pristut ir kewe mumuta ne emweni ewe aean ewe pristut, ussun awora mumuta ne fori angangepin. Jises Kraist a omochu meinisin kewe kien ewe pristut. Ewe Presetenin ewe Mwichefen inai chok ewe emon won fonufan a tongeni aea kewe kien pristut ne emweni unusen ewe Mwichefen. Fan an emwen, ekkoch ra pwan tongeni aea ekkoch sokkun ki ne fori an Kot angang. Sou emwen ren pisop me presetenin steik ra aea kewe kien pristut ne emwen non ar wart me steik. Pokiten kokkon wis ne angang ra feitto seni kewe sou emwen mi wor rer kewe ki, mwan me fefin ion mi angang non kokkon wiser ra omokutu ewe mumutan pristut nupwen ra fori wiser kewe.

Melkesitik Pristut me Aaronik Pristut

Ewe pristut a wor ruu kinikinin: ewe Melkesitik Pristut me ewe Aaronik Pristut. Seni ewe Melkesitik Pristut, kewe sou emwenin Mwichefen ra emweni meinisin kewe angang non pekin ngun ren ewe Mwichefen, ren misineri me angangen non tempel. Ewe Aaronik Pristut a mokutukut fan ewe mumuta meren ewe Melkesitik Pristut. A aea ne fori kewe angangepin ussun papatais me ewe sakrament.

Efeiochun ewe Pristut

Seni ekkewe pwonepin me angangepin, Kot a fori kewe efeiochun pristut epwe kawor ngeni meinisin noun kewe semirit. Ekkei efeioch a pachenong papatais, ewe nifangen ewe Ngun mi Fel, ewe sakrament, me kewe angangepin non tempel. Mwan me fefin ion mi efeioch non ewe tempel a angei ew niffangen manamanen an Kot ewe pristut seni ar kewe pwon. Sia pwan tongeni angei kewe efeiochun echikara, ekinamwei, me emwen seni ewe pristut.

Met Kewe Pukefel ra Apasa usun ewe Pristut?

Ewe pristut mi wor non fansoun nom mi nonnon chok me ewe mi wor iei (nengeni Moses 6:7).

Kewe kien Pristut ra aninis ne nengenochu pwe kich mi awesano an ewe Samon angang non tetenochun (nengeniDoctrine and Covenants 42:11).

Kewe mwan mi wor rer ewe pristut ra tongeni aea” won chok ekkewe nongonongun wenechar” (Doctrine and Covenants 121:36).

Ekkoch me nein ekkewe wis ren ekkana a wor rer ewe pristut ra awewetiw non Doctrine and Covenants 20:38–67.

© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Monthly Liahona Message, August 2021. Chuukese. 17472 901