Asɔfodzi No Yɛ Nyankopɔn No Tum

Nyankopɔn nam asɔfodzi tum do hyira hɛn. Asɔfodzi tum nhyira horow no wɔ hɔ ma obiara.

Asɔfodzi no yɛ Nyankopɔn no tum. Ɔdze tum yi hyira Ne mba nyina na ɔaboa hɔn ma wɔasan nye No atsena bio. Nyankopɔn dze asɔfodzi tum ama Ne mba wɔ asaase do. Wɔdze tum yi no, asɔfodzi baanodzifo tum dzi Asɔr no baano, na hɔn a wokitsa asɔfodzi tum no yɛ ayɛdze krɔnkrɔn ahorow, tse dɛ enuma, a ɔboa hɛn ma yɛbɛn Nyankopɔn ara yie. Banyin anaa basia biara a ɔfata gye asɔfodzi ayɛdze horow na osie ahyɛmudzi horow no (anohoba ahorow a ɔyɛ krɔnkrɔn) wɔ kwan wɔ Nyankopɔn no tum no ho.

Wɔdze Asɔfodzi Tum Maa Joseph Smith

Ber a Jesus Christ wɔ asaase do no, Ɔdze asɔfodzi tum dzii N’Asɔr ne kan. Ɔdze tum yi so maa N’Esuafo. Wowui mfe aha pii ekyir no, asɔrmba pii fii Asɔr no mu. Wɔ kwan a ɔnntsen do no, wɔsesãa asɛmpa no nna mbrɛ Asɔr no si dzi dwuma. Nna Nyankopɔn N’asɔfodzi no nnyi asaase no do bio. Afe 1829 mu no, Jesus somaa John Onumanyi na Asomafo Peter, James, na John dɛ wɔmfa asɔfodzi no mbɛma Joseph Smith. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye kuw kortoo wɔ asaase do a okitsa tumdzi yi fi Nyankopɔn hɔ.

Asɔfodzi no ne Nsaafee

Asɔfodzi nsaafee nye tumdzi a wɔdze ma kwankyerɛ fa asɔfodzi dwumadzi ho, tse dɛ wɔrema kwan ma wɔayɛ ayɛdze horow. Jesus Christ kitsa asɔfodzi no ne nsaafee nyina. Asɔr ne President nye nyimpa kortoo wɔ asaase do a obotum dze asɔfodzi nsaafee nyina ama kwankyerɛ wɔ Asɔr no nyina mu. N’akwankyerɛ ase no, binom botum dze nsaafee no bi ayɛ Nyankopɔn n’edwuma. Baanodzifo tse dɛ bishopfo na stake presidentfo dze asɔfodzi nsaafee dzi hɔn ward na stake horow enyim. Ɔnam dɛ ɔfrɛ dɛ yɛnsom fi baanodzifo a wokitsa asɔfodzi nsaafee hɔn hɔ ba no ntsi, mbanyin na mbaa a wɔsom wɔ ɔfrɛ mu no, dze asɔfodzi tumdzi yɛ edwuma wɔ hɔn ndwuma mu.

Melchizedek Asɔfodzi na Aaronic Asɔfodzi

Asɔfodzi no gu mu afã ebien: Melchizedek Asɔfodzi no na Aaronic Asɔfodzi no. Ɔnam Melchizedek Asɔfodzi do, Asɔr mpanyimfo ma kwankyerɛ wɔ Asɔr no no sunsum mu ndwuma nyina mu, tse dɛ asɛmpasomafo ndwuma na temple edwuma. Aaronic Asɔfodzi no dzi dwuma wɔ Melchizedek Asɔfodzi no tumdzi ase. Wɔdze yɛ ayɛdze horow tse dɛ enuma na sacrament.

Asɔfodzi no ho Nhyira horow

Ɔnam ahyɛmudzi na ayɛdze horow do, Nyankopɔn ma Ne mba nyinara wɔ asɔfodzi ho nhyira horow ho kwan. Enuma, Sunsum Krɔnkrɔn no n’akyɛdze, sacrament no, na temple ayɛdze horow no kã nhyira horow yinom ho. Mbanyin na mbaa a wɔagye endowment wɔ temple no nya Nyankopɔn N’asɔfodzi tum ho akyɛdze horow a ɔnam hɔn ahyɛmudzi horow no do. Yebotum so enya asɔfodzi nhyira a ɔyɛ ayarsa, awerɛkyekyer, na akwankyerɛ.

Ebɛn Asɛm na Kyerɛwsɛm no Kã fa Asɔfodzi no ho?

Asɔfodzi no a ɔwɔ hɔ tsetse ber do no ɔnoara na ɔwɔ hɔ seisei (hwɛ Moses 6:7).

Asɔfodzi nsaafee boa ma yɛhwɛ yɛ Ewuradze n’edwuma esiado esiado kwan do (hwɛ Nkyerɛkyerɛ na Ahyɛmudzi 42:11).

Mbanyin a wokitsa asɔfodzi no botum dze edzi dwuma a nna “gyedɛ wɔnam tsenenee fapem kwan do” (Nkyerɛkyerɛ na Ahyɛmudzi 121:36).

Asɛdze binom a odzi wɔ hɔn a wokitsa asɔfodzi no wɔakyerɛkyerɛ mu wɔ Nkyerɛkyerɛ na Ahyɛmudzi 20:38–67.

© 2021 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, August 2021 ne nkyerɛasee. Fante. 17472 502