iTukutuku Vakavula ni Liaona, Okosita 2021

Na Matabete Na Kaukauwa ni Kalou.

E vakalougatataki keda na Kalou ena kaukauwa ni matabete. Sa vakarautaki tu ki na tamata kecega na veivakalougatataki ni matabete.

Na Matabete Na Kaukauwa ni Kalou. E vakayagataka na kaukauwa oqo me vakalougatataki ira kece kina na Luvena ka vukei ira me ra lesu ka laki bula vata kei Koya. Sa solia tu na Kalou na kaukauwa ni matabete vei ira na Luvena e vuravura. Ena kaukauwa oqo, sa rawa kina vei ira na iliuliu ni matabete me ra liutaka na Lotu, ka rawa vei ira na lewe ni matabete me ra vakayacora na cakacaka tabu vakalotu, me vaka na papitaiso, ka na vukei keda me da toro voleka yani vua na Kalou. Na tagane kei na yalewa kece era ciqoma ena bula kilikili na cakacaka vakalotu ni matabete ka maroroya na veiyalayalati (yalayala tabu) era na rawata na kaukauwa ni Kalou.

Na Kaukauwa ni Matabete A Soli vei Josefa Simici

Ni a bula voli o Jisu Karisito e vuravura, e liutaka o Koya na Nona Lotu ena kaukauwa ni matabete. A solia talega na kaukauwa oqo vei iratou na Nona Apositolo. Ena veisenitiuri ni oti na nodratou mate, e vuqa na lewenilotu era a lutu tani mai na Lotu. Era a veisautaka cala na kosipeli kei na sala a cakacaka kina na Lotu. Sa mai yali kina na matabete ni Kalou e vuravura. Ena 1829, a talai Joni na Dauveipapitaisotaki o Jisu kei iratou na Apositolo o Pita, Jemesa, kei Joni me ratou solia vei Josefa Simici na matabete. Na Lotu i Jisu Karisito ni Yalododonu Edaidai sa isoqosoqo duadua ga e vuravura e tiko kina na lewa oqo mai vua na Kalou.

Na Domo i Pita, Jemesa, kei Joni, mai vei Linda Curley Christensen kei Michael T. Malm

iDola ni Matabete

Na idola ni matabete sai koya na lewa me dusimaka na vakayagataki ni matabete, me vaka na soli ni veivakadonui me vakayacori kina na cakacaka vakalotu eso. E taura tu o Jisu Karisito na idola taucoko ni matabete. Na Peresitedi ni Lotu sa ikoya duadua ga na tamata e vuravura e rawa ni vakayagataka na idola ni matabete me dusimaka kina na Lotu raraba. Ena nona veidusimaki, sa rawa ni ra vakayagataka eso na idola eso tale me ra cakava kina na cakacaka ni Kalou. O ira na iliuliu me vakataki ira na bisopi kei na peresitedi ni iteki era vakayagataka na idola ni matabete mera veiliutaki kina ena nodra tabanalevu kei na iteki. Baleta ni veikacivi me veiqaravi e lako mai vei ira na iliuliu ena idola ni matabete, o ira na turaga kei na marama era veiqaravi ena veikacivi era vakayagataka na lewa ni matabete ni ra cakava na nodra itavi.

Matabete i Melikiseteki kei na Matabete i Eroni

E rua tiko na tikina ni matabete: na Matabete i Melikiseteki kei na Matabete i Eroni. Mai na Matabete i Melikiseteki, era liutaka kina na iliuliu ni Lotu na cakacaka vakayalo kece sara ni Lotu, me vakataka na cakacaka ni kaulotu kei na valetabu. Na Matabete i Eroni e cakacaka ena ruku ni lewa ni Matabete i Melikiseteki. E dau vakayagataki me vakayacori kina na cakacaka vakalotu me vaka na papitaiso kei na sakaramede.

Veivakalougatataki ni Matabete

Mai na veiyalayalati kei na cakacaka vakalotu eso, sa vakarautaka kina na Kalou na veivakalougatataki ni matabete vei ira taucoko na Luvena. Na veivakalougatataki oqo e oka kina na papitaiso, na isolisoli ni Yalo Tabu, na sakaramede, kei na cakacaka vakalotu ni valetabu. Era ciqoma na turaga kei na marama era sa edaumeni ena valetabu e dua na isolisoli ni kaukauwa ni matabete ni Kalou mai na nodra veiyalayalati. E rawa talega ni da ciqoma na veivakalougatataki ni matabete ni veivakabulai, veivakacegui, kei na veituberi.

Na Cava e Tukuna na iVolanikalou me baleta na Matabete?

Na matabete e tu ena gauna makawa sa ikoya vata ga e tu ena gauna oqo (raica na Mosese 6:7).

Na idola ni matabete e veivuke me vakadeitaka ni da sa vakayacora tiko na cakacaka ni Turaga ena kena ivakarau dodonu (raica na Vunau kei na Veiyalayalati:42:11).

O ira na tagane era taura tu na matabete e rawa ni ra vakayagataka “ena ivakavuvuli duadua ga ni buladodonu” (Vunau kei na Veiyalayalati 121:36).

Eso na nodra itavi o ira era taura tu na matabete e vakamacalataki tu ena Vunau kei na Veiyalayalati 20:38–67.

© 2021 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. Vakadewa ni Tukutuku Vakavula ni Liaona, Okosita 2021. Fijian. 17467 858