“Ti Priesthood Isu ti Bileg ti Dios,” Liahona, Agosto 2021
Binulan a Mensahe ti Liahona , Agosto 2021
Ti Priesthood Isu ti Bileg ti Dios.
Bendisionannatayo ti Dios babaen ti bileg ti priesthood. Sidadaan a magun-od ti tunggal maysa dagiti bendision ti priesthood.
Ti priesthood isu ti bileg ti Dios. Usarenna daytoy a bileg a mangbendision iti amin nga annakna ket tapno matulongan ida nga agsubli a makipagtaeng Kenkuana. Inikkan ti Dios iti bileg ti priesthood kadagiti annakna iti daga. Addaan iti daytoy a bileg, mabalin a dagiti lider ti priesthood ti mangidaulo iti Simbaan, ken mabalin dagiti priesthood holder ti mangannong kadagiti sagrado nga ordinansa, kas iti panagbuniag, a makatulong kadatayo nga umas-asideg iti Dios. Tunggal lalaki ken babai a maikari nga umawat kadagiti ordinansa ti priesthood ken agtungpal kadagiti katulagan (sagrado a kari) ket addaan iti access iti bileg ti Dios.
Naited ti Bileg ti Priesthood ken ni Joseph Smith
Idi adda iti daga ni Jesucristo, indauluanna ti Simbaanna iti bileg ti priesthood. Intedna pay daytoy a bileg kadagiti Apostolna. Kadagiti siglo kalpasan ti ipapatayda, adu a miembro ti timmallikud iti Simbaan. Sibibiddut a binaliwanda ti ebanghelio ken ti wagas a panagtrabaho ti Simbaan. Ket awanen ti priesthood ti Dios iti daga. Idi 1829, imbaon ni Jesus ni Juan Bautista ken da Apostol Pedro, Santiago, ken Juan a mangted iti priesthood ken ni Joseph Smith. Ti Simbaan ni Jesucristo dagiti Santo iti Ud-udina nga Aldaw ti kakaisuna nga organisasion iti daga nga addaan iti daytoy a turay manipud iti Dios.
Ti Timek da Pedro, Santiago, ken Juan, da Linda Curley Christensen ken Michael T. Malm
Dagiti Tulbek ti Priesthood
Dagiti tulbek ti priesthood ti turay a mangiturong iti pannakausar ti priesthood, kas iti panangted iti pammalubos a mangannong kadagiti ordinansa. Iggem ni Jesucristo ti amin a tulbek ti priesthood. Ti Presidente ti Simbaan ket isu laeng ti tao iti daga a mabalin a mangusar kadagiti tulbek ti priesthood a mangiturong iti intero a Simbaan. Babaen ti panangiturongna, mabalin nga usaren dagiti dadduma ti sumagmamano a tulbek a mangaramid iti aramid ti Dios. Usaren dagiti lider kas dagiti bishop ken stake president dagiti tulbek ti priesthood a mangidaulo kadagiti ward ken stake. Gapu ta ti awag nga agserbi aggapu manipud kadagiti lider nga addaan iti tulbek ti priesthood, dagiti lallaki ken babbai nga agserbi kadagiti awagda, aramatenda iti turay ti priesthood bayat ti panangaramidda kadagiti pagrebbenganda.
Melchizedek Priesthood ken Aaronic Priesthood
Addaan ti priesthood iti dua a paset: ti Melchizedek Priesthood ken ti Aaronic Priesthood. Babaen ti Melchizedek Priesthood, iturong dagiti lider ti Simbaan ti amin a naespirituan nga aramid ti Simbaan, a kas iti aramid ti misionario ken templo. Agserbi ti Aaronic Priesthood babaen ti turay ti Melchizedek Priesthood. Mausar daytoy a mangannong kadagiti ordinansa kas iti panagbuniag ken ti sakramento.
Dagiti Bendision ti Priesthood
Babaen dagiti katulagan ken ordinansa, aramiden ti Dios a sidadaan a magun-od dagiti bendision ti priesthood iti amin nga annakna. Mairaman kadagitoy a bendision ti panagbuniag, ti sagut ti Espiritu Santo, ti sakramento, ken dagiti ordinansa iti templo. Umawat dagiti lallaki ken babbai a ma-endow iti templo iti maysa a sagut ti bileg ti priesthood ti Dios babaen kadagiti katulaganda. Kasta met a maawattayo dagiti bendision ti priesthood iti pannakapaimbag, pannakaliwliwa, ken pannakatarabay.
Ania ti Kuna dagiti Nasantuan a Kasuratan maipapan iti Priesthood?
Ti priesthood nga adda kadagidi nagkauna nga aldaw ket isu met laeng ti adda ita (kitaen iti Moises 6:7).
Makatulong dagiti tulbek ti priesthood a mangsigurado a maipatungpaltayo ti aramid ti Apo iti siuurnos a wagas (kitaen iti Doktrina ken Katulagan 42:11).
Mabalin dagiti lallaki nga agik-ikut iti priesthood nga usarenda laeng daytoy “kadagiti pagbatayan ti kinalinteg” (Doktrina ken Katulagan 121:36).
Sumagmamano kadagiti pagrebbengan dagiti addaan iti priesthood a nailadawan iti Doktrina ken Katulagan 20:38–67.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, August 2021. Ilokano. 17472 864