Poro’i tā’āva’e o te Liahona, ’Ātete 2021

Te autahu’ara’a, ’o te mana ïa o te Atua

E ha’amaita’i te Atua ia tātou nā roto i te mana o te autahu’ara’a. Nō te tā’āto’ara’a te mau ha’amaita’ira’a o te autahu’ara’a.

Te autahu’ara’a, ’o te mana ïa o te Atua. Tē fa’a’ohipa nei ’oia i teie mana nō te ha’amaita’i i te tā’āto’ara’a o tāna mau tamari’i ’e nō te tauturu ia rātou ’ia ho’i fa’ahou e ora i pīha’i iho iāna. ’Ua hōro’a te Atua i te mana autahu’ara’a i tāna mau tamari’i i ni’a i te fenua nei. Nā roto i teie mana, e arata’i te feiā fa’atere o te autahu’ara’a i te ’Ēkālesia, ’e e rave fa’aoti te feiā e mau nei i te autahu’ara’a i te mau ’ōro’a mo’a, mai te bāpetizora’a, ’o te tauturu ia tātou ’ia ha’afātata atu ā i te Atua. Te mau tāne ’e te mau vahine ato’a ’o tei fāri’i ti’amā i te mau ’ōro’a o te autahu’ara’a ’e ’o tei ha’apa’o i te mau fafaura’a (te mau fafaura’a mo’a) e fāri’i mau rātou i te mana o te Atua.

’Ua hōro’ahia te mana autahu’ara’a ia Iosepha Semita

’A ora ai Iesu Mesia i te fenua nei, ’ua arata’i oia i tāna ’Ēkālesia ma te mana o te autahu’ara’a. ’Ua hōro’a ato’a ’oia i teie mana i tāna mau ’āpōsetolo. I te mau tenetere i muri a’e i tō rātou pohera’a, e rave rahi melo tei fa’aru’e i te ’Ēkālesia. ’Ua taui ti’a ’ore rātou i te ’evanelia ’e te huru o te terera’a o te ’Ēkālesia. ’Aita fa’ahou e vai ra te autahu’ara’a o te Atua i ni‘a i te fenua nei. I te matahiti 1829, ’ua tono Iesu ia Ioane Bāpetizo ’e i nau ’āpōsetolo Petero, Iakobo ’e Ioane nō te hōro’a i te autahu’ara’a ia Iosepha Semita. ’O Te ’Ēkālesia a Iesu Mesia i te Feiā Mo’a i te mau Mahana Hope’a nei ana’e, te fa’anahonahora’a i ni’a i te fenua nei e mau nei i teie ha’amanara’a nō ’ō mai i te Atua ra.

Te reo ’o Petero, Iakobo ’e ’o Ioane,, nā Linda Curley Christensen ’e ’o Michael T. Malm

Te mau tāviri o te autahuara’a

Te mau tāviri o te autahu’ara’a, ’o te ha’amanara’a ïa nō te arata’i i te fa’a’ohipara’a i te autahu’ara’a, mai te hōro’ara’a i te parau fa’ati’a nō te rave i te mau ’ōro’a. Tē mau nei Iesu Mesia i te mau tāviri ato’a o te autahu’ara’a. ’O te Peresideni o te ’Ēkālesia ana’e te ta’ata i ni’a i te fenua nei te nehenehe e fa’a’ohipa i te mau tāviri o te autahu’ara’a nō te fa’atere i te ‘Ēkālesia tā’āto’a. I raro a’e i tāna arata’ira’a, e nehenehe vetahi ’ē e fa’a’ohipa i te tahi mau tāviri nō te rave i te ’ohipa a te Atua. E fa’a’ohipa te feiā fa’atere mai te mau ’episekōpo ’e te mau peresideni titi i te mau tāviri o te autahu’ara’a nō te fa’atere i roto i tā rātou mau pāroita ’e i tā rātou mau titi. Nō te mea, te mau pi’ira’a nō te tāvini e mea nā roto mai ïa i te feiā fa’atere ’o tei mau i te mau tāviri o te autahu’ara’a, nō reira te mau tāne ’e te mau vahine e tāvini nei i roto i te mau pi’ira’a e fa’a’ohipa ai i te ha’amanara’a o te autahu’ara’a i roto i tā rātou mau hōpoi’a.

Te autahu’ara’a a Melehizedeka ’e te autahu’ara’a a Aarona

E piti tuha’a o te autahu’ara’a : te autahu’ara’a a Melehizedeka ’e te autahu’ara’a a Aarona. Nā roto i te autahu’ara’a a Melehizedeka, e arata’i te feiā fa’atere o te ’Ēkālesia i te ’ohipa pae vārua ato’a a te ‘’Ēkālesia, mai te ’ohipa misiōnare ’e te ’ohipa hiero. Tē ’ohipa nei te autahu’ara’a a Aarona i raro a’e i te ha’amanara’a o te autahu’ara’a a Melehizedeka. E fa’a’ohipahia te reira nō te rave i te mau ’ōro’a mai te bāpetizora’a ’e te ’ōro’a mo’a.

Te mau ha’amaita’ira’a o te autahu’ara’a

Nā roto i te mau fafaura’a ’e i te mau ’ōro’a, e hōro’a mai te Atua i te mau ha’amaita’ira’a o te autahu’ara’a i tāna mau tamari’i ato’a. Tei roto i teie mau ha’amaita’ira’a te bāpetizora’a, te hōro’a o te Vārua Maita’i, te ’ōro’a mo’a ’e te mau ’ōro’a hiero. E fāri’i te mau tāne ’e te mau vahine tei rave i tō rātou ’ōro’a hiero i te hō’ē hōro’a o te mana o te autahu’ara’a o te Atua nā roto i tā rātou mau fafaura’a. E fāri’i ato’a tātou i te mau ha’amaita’ira’a o te autahu’ara’a nō te fa’aorara’a, nō te tāmāhanahanara’a ’e nō te arata‘ira’a.

E aha tā te mau pāpa’ira’a mo’a e parau nei nō ni’a i te autahu’ara’a ?

Te autahu’ara’a tei vai na i tahito ra hō’ē ā ïa ’o tē vai nei i teienei tau (hi’o Mose 6:7).

E tauturu te mau tāviri o te autahu’ara’a ia tātou ’ia rave fa’aoti i te ’ohipa a te Fatu nā roto i te hō’ē fa’anahora’a mau (hi’o Te Parau Ha’api’ira’a ’e te mau Parau Fafau 42:11).

Te mau tāne e mau nei i te autahu’ara’a, e nehenehe rātou d fa’a’ohipa i te reira nā roto ana’e « i te parau tumu nō te parauti’a » (Te Parau Ha’api’ira’a ’e te mau Parau Fafau121:36).

Te tahi o te mau hōpoi’a a te feiā tei mau i te autahu’ara’a, ’ua fa’a’itehia ïa i roto i Te Parau Ha’api’ira’a ’e te mau Parau Fafau 20:38–67.

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, August 2021. Tahitian. 17467 895