“Wiahda Mwahu Pein Kowe,” Ong Kakehlepen me Pwulopwul Kan, Septempe 2021, 6-7.
Padahk en Sounpwong kan Ong Kakehlepen me Pwulopwul kan, Septempe 2021
Wiahda Mwahu Pein Kowe
Wiepe limau me kin wiahda ehu mour en peren oh popohl.
Kasansal kan sang Juliet Percival
Ansou me Kauno ketin mahsanihong Joseph Smith en kauwada Tehnpas Sarawi en Kirtland, E sohte ketin mweidohng ohlo en pein wiahda doadoahko. E ketin kasalehda pilahn ehu me pahn kaweidada doadoahko.
“Tehnpaso sohte pahn kokouda nin duwen wiepe kan en sampah,” Kauno ketin mahsani. “E pahn kokouda nin duwen wiepe me I pahn kasalehda” (Doctrine and Covenants 95:13–14). Kauno eri ketikihda mengihtik kan me pid kokoudahn tehnpas sarawio (tehk Doctrine and Covenants 95:15–17).
Paiamwahu, pwe Kauno ketin kasalehiongehr kitail me laudsang wiepen kawada tehnpas sarawi kan. E pil ketin ketikihongehr kitail wiepe kan pwehn sewesei kitail en wiahla aramas me keieu mwahu. Ni atail kin idawehn wiepe pwukat, kitail pahn kauwada atail mour kan “kaidehn nin duwen wiepen sampah” ahpw nin duwen wiepe me Kauno ketin koasoanedier.
Iet wiepe limau me kak wiahda ehu mour en peren oh popohl me poahsoanki Sises Krais.
Kawada ehu Poahsoan Kehlail
Sohte lipilipil sounpilahne ihmw de sounkawada ihmw pahn ndahiong uhk me sohte lipilipil ihmw kin anahne ehu poahsoan kehlail. Helaman padahngki me poahsoan me keieu mwahu ong atail mour kan iei “poahsoan en atail Soundoaro, iei Krais, Iehros en Koht” (Helaman 5:12). Kitail kak wiahkihla Krais atail poahsoan ni atail kin kohdo Reh oh ideidawehn Sapwellime padahk kan. Ia mwomwen omw kilang ahmw mour ni omw kin wiahkihla Krais poahsoan en ahmw mour?
Papah Mehteikan
Presiden Dieter F. Uchtdorf nda ansou me e wia Sounsawas Keriau nan Presedensi Keieu me ehu wiepe mwahu en kamwahuih atail mour kan kin miehda ansou me “kitail kin kohseli papah Kauno oh mehn mpatail kan.”1 Ni ansou me kumwail kin papah mehteikan, kumwail kin wiewia dahme Sises ketin wiahier oh sukusukuhlki en duwehla Ih. Oh kumwail sohte kin kapaiada mour en aramas akan me kumwail kin papah, ahpw kumwail pil pahn diar kapai.
Kawada ehu Koasoandi Mehlel en Kapakap oh Onopiki Pwuhk Sarawi
Pil ehu wiepen kawada mour kaperen ehu iei en kin kaukaule ehuiong Sahm Nanleng oh Sises Krais. Ehu wiepe kaselel en wia met iei sang ni kapakap oh onopiki pwuhk sarawi.
Preseden Uchtdorf nda: “Pwehn kakehlailih atail miniminiong Koht, kitail anahne ansou mwahu en kin kelehpwla Reh. Rahn koaros kin nennenla kapakap oh onopiki pwuhk sarawi… pahn wia mehkot katapan ong atail ansou oh mwekid ni atail kin karkaranih Samatail Nanleng.”2
Kapakap wia ansou mwahu ehu pwehn sekere Samatail me ketiket Nanleng. E ketin mwahngih kitail, poakohng kitail, oh kupwuriki kapaidoke kitail! Ni atail kin kapakap ngidingid, e wia atail kalahngan, oh peki mehkan me kitail anahne, E ketin kapaidoke oh ninlimehda ansou koaros nin duwen Sapwellime koasoandi.
Sohte ehu ansou mwahu me koasoandi ohng onopiki pwuhk sarawi. Ihme keieu kesempwal iei en oudahte wia! Preseden Russell M. Nelson padahngkiher, “Wadek mahsen en Koht rahn koaros inenen kesempwal ohng mour en palingehn.”3 Wadwadek pwuhk sarawi rahn koaros pahn, ni mehlel, sewese kumwail en kawada ehu mour en pwoson oh kehlail.
Kapelkin Uhk Aramas Me Kin Nsenohki Ken Wia Me Mwahu
Sahm Nanleng ketin kupwurki kitail en patehng oh ehuiong mehteikan—mehlel atail peneinei oh kempoakpatail kan. Kitail kin kalapw duwehla irail kan me kitail kin patehng. Ma irail wia tohn Mwomwohdisoht de soh, kumwail anahne kapelkin kumwail aramas me kin sewesei kumwail en momourki rongamwahuo, kolokol kosonned akan en Kauno, oh wiahla emen aramas mwahu. Kumwail pil kak sewese mehn mpamwail kan en wia soahngohte. Mehnia nan pwungen kempoakepahmw kan me kin seweseiuk en kawada ahmw poahson pohn me pwung kan?
Diar Popohl ni Ahmw Kaukawada Ahmw Poahson
Mie pil wiepe teikan me komw kak kawada ni palingenomw en kehlail oh ahneki popohl, iangahki ieiang sarawi oh alahle kamadipw sarawi, wiahda oh kolokol inou kan, oh ideidawehn kaweid en soukohp momour kan.
E kesempwal en tamataman me mepwukat koaros kin anahne doadoahk oh ansou. Ansou koaros mie anahnepen kawada oh kasukuhl kin wiawi, ahpw komw sohte anahne wia kelehpw. Kauno pahn ketin seweseiuk rahn koaros ni ahmw kin song uwen ahmw kak en kawada ehu mour me komwi oh Ih kak pohlaulki oh kin kihong komwi popohl.
© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwepen Padahk en Sounpwong kan Ong Kakehlepen me Pwulopwul kan, Septempe 2021. Mahsen. 17473 885