Porous ren Liahona Iteiten maram, Septemper 2021

Mwichenapen Mwichefen: Ew an Mwichefen Mwich non Unusen Fonufan

Kich sia rongorong ngeni soufos me ekkoch souemwenin Mwichefen fansoun mwichenapen mwichefen. Ra aitikich met Kot a mwochen sipwe rongorong.

Ew April me October, ewe Mwichefen a awora ew tettenin mwich a iteni mwichenapen mwichefen. Sou emwen ra aitikich me pwarata usun Jises Kraist me An kapas allim. Mwichenapen Mwichefen a fis non Salt Lake City, Utah, USA, me a tou ngeni unusen fonufan napeseni 80 sokkun kapas. Chon mwichefen meinisin me ion ekkoch aramas mi mwochen fiti ra ketiw ar repwe rongorong ngeni kewe afanafan.

Ewe Aewin an Mwichefen Mwichenap

Ewe Mwichefen a wes okotun nupwen ew mwiich a fis non April 6, 1830 (nengeni Doctrine and Covenants 20). Ewe aewin wmichenapen mwichefen a fis fan June 9, 1830. Mwirin ena, mwichenapen mwichefen a fen fis fan emwenien ewe Presetenin Mwichefen ian chok mempers ra tongeni chufengen ian. Non ekkewe1840s, souemwen ra pwopwuta ne efisi mwichenap fan ruu non ew ier.

Ifa usun Kokkotun Mwichenap Ikanai

Ewe Aewin Presetensi, ewe Mwichen ekkewe Engon me Ruemen Aposel, me ekkoch pwan souemwenin Mwichefen ra kapas fansoun mwichenapen mwichefen. Ewe Tabernacle Choir non Temple Square me ekkoch mwichen koon seni Mwichefen ra awora niketik. Ew mwichenap a wor nimu kinikinin: unungat non Ammon me ruu non Raninfel. Non April, ewe eunungatin kinikin non Ammon fan iten ekkewe mwichen Aaronic me Melchizedek Priesthood. Non October, fan iten ekkewe Fin Anisi me kewe Young Women.

Osukun an Souemwen

Non kewe maram me mwen mwichenap, souemwenin Mwichefen ra iotek fan iten met repwe afanafana. Ewe Samon a ourourer ar repwe sinei met repwe apasa. Ra osukuna ennetin ewe kapas allim me ra tungor sipwe fori an Kot kewe annuk. Ra pwan pwarata usun Jises Kraist me pesei kich ach sipwe tapweno mwirin.

Kaeo seni Mwichenap

Me mwen mwichenapen mwichefen, kich sia tongeni iotek ach sipwe rong met ewe Samon mochen kich sipwe kaeo. Nupwen sia ausening ngeni kewe pworous, ewe Ngun mi Fel a aitikich met a namot ach sipwe sinei. Mwirin mwichenap, ekkewe afanafan ra nomw won ChurchofJesusChrist.org, non ewe Gospel Library app, me non ewe Liahona. Kich sia tongeni iotekin kaeo ngeni ekkewe afanafan ach sipwe kaeo usun Jises Kraist me An ewe kapas allim.

Seni ekkewe Pukfel

Jises Kraist a aiti kich pwe sipwe mwichfengen iteiten fansoun (nengeni 3 Nifai 18:22).

Nupwen chon Mwichefen ra fel fengen, ewe Samon epwe nomw rer (nengeni Matthew 18:20).

Ewe Samon annuku ngeni chon Mwichefen repwe aiti me echueno emon me emon iir (Doctrine and Covenants 43:8).

Ren chon Mwichefen ra pwarano ar nuku non Kraist, Noun Ngunupin epwe nom rer nupwen ar chufengen (nengeni Doctrine and Covenants 44:2).

© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Monthly Liahona Message, Septemper 2021. Chuukese. 17473 901