Bulanan nga Mensahe sa Liahona, Septyembre 2021

Pangkabilogan nga Komperensya: Isa ka Pangbug-os-Kalibutan nga Miting sang Simbahan

Nagapamati kita sa mga propeta kag iban pa nga mga lider sang Simbahan sa tion sang pangkabilogan nga komperensya. Ginatudloan nila kita sang luyag sang Dios nga aton mabatian.

Sa gwa sang Conference Center

Kada Abril kag Oktubre, ang Simbahan nagahiwat sang sunodsunod nga mga miting nga ginatawag nga pangkabilogan nga komperensya. Ang mga lider nagatudlo kag nagapamatuod parte kay Jesucristo kag sa Iya ebanghelyo. Ang pangkabilogan nga komperensya ginahiwat sa Salt Lake City, Utah, USA, kag ginawaragwag sa bug-os nga kalibutan sa masobra 80 ka lenggwahe. Ang tanan nga miyembro kag iban pa nga interesado nga mga tawo ginaagda nga magpamati sa mga pamulongpulong.

Sa sulod sang Conference Center

Ang Una nga mga Komperensya sang Simbahan

Ang Simbahan opisyal nga naorganisar sa tion sang isa ka miting sang Abril 6, 1830 (tan-awa sa Doktrina kag mga Kasugtanan 20). Ang una nga pangkabilogan nga komperensya ginhiwat sang Hunyo 9, 1830. Sumugod sadto, ang pangkabilogan nga mga komperensya ginahiwat sa idalom sang direksyon sang Pangulo sang Simbahan sa bisan diin nga ang mga miyembro sarang makatipon. Sang mga tinuig sang 1840, ang mga lideres nagsugod sa paghiwat sang komperensya duha ka beses sa kada tuig.

Si Pangulong Nelson sa pulpito

Paano Ginaorganisar ang mga Komperensya sa Karon

Ang Unang Panguluhan, ang Korum sang Dose ka Apostoles, kag iban pa nga mga lider sang Simbahan nagahambal sa tion sang pangkabilogan nga komperensya. Ang Tabernacle Choir at Temple Square kag iban pa nga mga koro sang Simbahan nagahatag sang musika. Ang kada komperensya may lima ka sesyon: tatlo kon Sabado kag duha kon Domingo. Kon Abril, ang ikatatlo nga sesyon sa Sabado para sa mga miyembro sang mga korum sang Aaronic kag Melchizedek Priesthood. Kon Oktubre, para ini sa mga miyembro sang Relief Society kag Young Women.

Mga Panudlo sang mga Lider

Sa binulan antes sang komperensya, ang mga lider sang Simbahan nagapangamuyo parte sa kon ano ang itudlo. Ang Ginuo nagainspirar sa ila agud ila mahibal-an kon ano ang ila ihambal. Ila ginatudlo ang mga kamatuoran kag ginaagda kita nga tumanon ang mga kasuguan sang Dios. Sila nagapamatuod man parte kay Jesucristo kag nagapaisog sa aton nga sundon Sia.

Pagtuon Halin sa Komperensya

Antes sang pangkabilogan nga komperensya, mahimo kita magpangamuyo agud mabatian kon ano ang luyag sang Ginuo nga aton matun-an. Samtang nagapamati kita sa mga pamulongpulong, ang Espiritu magatudlo sa aton kon ano ang kinahanglang naton mahibal-an. Pagkatapos sang komperensya, ang mga pamulongpulong makita sa ChurchofJesusChrist.org, sa Gospel Library app, kag sa Liahona. Mahimo kita magtuon sang balaan nga mga kasulatan sing mapinangamuyuon agud makatuon pa gid parte kay Jesucristo kag sa Iya ebanghelyo.

Gikan sa Balaan nga mga Kasulatan

Si Jesucristo nagtudlo nga dapat kita magtililipon sing tingob sa masunson (tan-awa sa 3 Nefi 18:22).

Kon ang mga miyembro sang Simbahan magsimba sing tingob, ang Ginuo magaupod sa ila (tan-awa sa Mateo 18:20).

Ang Ginuo nagsugo sa mga miyembro sang Simbahan nga “tudloan kag palig-onon ang tagsa-tagsa” (Doktrina kag Kasugtanan 43:8).

Kon ang mga miyembro sang Simbahan magpakita sang pagtuo kay Cristo, ang Iya Espiritu igabubo sa ila kon sila magtipon (tan-awa sa Doktrina kag mga Kasugtanan 44:2).

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, September 2021. Hiligaynon. 17473 861