“Lub Tuam Rooj Sab Laj: Lub Koom Txoos Kev Sib Ntsib Thoob Ntiaj Teb,” Phau Liyahaunas, Cuaj Hli Ntuj 2021
Zaj Lus hauv Liyahaunas Txhua Hli, Cuaj Hli Ntuj 2021
Lub Tuam Rooj Sab Laj: Lub Koom Txoos Kev Sib Ntsib Thoob Ntiaj Teb
Peb mloog cov yaj saub thiab lub Koom Txoos lwm cov thawj coj thaum lub tuam rooj sab laj. Lawv qhia peb tej yam uas Vajtswv xav kom peb hnov.
Txhua lub Plaub Hli Ntuj thiab Kaum Hli Ntuj, lub Koom Txoos muaj kev sib ntsib hu ua lub tuam rooj sab laj. Cov thawj coj qhia thiab hais lus pov thawj txog Yexus Khetos thiab Nws txoj moo zoo. Lub tuam rooj sab laj nyob hauv Salt Lake City, Utah, USA, thiab tshaj tawm thoob plaws lub ntiaj teb siv tshaj 80 yam lus. Txhua tus mej zeej thiab lwm cov uas xav tau caw los mloog cov lus.
Thawj lub Rooj Sab Laj hauv lub Koom Txoos
Lub Koom Txoos los ua raug cai ua ib lub koom haum thaum muaj kev sib ntsib lub Plaub Hlis Ntuj hnub tim 6, xyoo 1830 (saib Lus Qhuab Qhia thiab Kev Khi Lus 20). Thawj lub tuam rooj sab laj yog lub Rau Hli Ntuj 9, 1830. Txij thaum ntawd, tus Thawj Tswj Hwm ntawm lub Koom Txoos tau coj lub tuam rooj sab laj txawm cov mej zeej sib sau ua ke qhov twg los xij. Hauv tej xyoo 1840, cov thawj coj pib tuav lub tuam rooj sab laj ob zaug txhua xyoo.
Cov Tuam Rooj Sab Laj Coj Li Cas Hnub No
Thawj Pawg Thawj Tswj Hwm, Pawg Kaum Ob tug Thwj Tim, thiab lub Koom Txoos lwm cov thawj coj hais lus hauv lub tuam rooj sab laj. Lub Tsev Kheej Pawg Hu Nkauj ntawm Tshav Tuam Tsev thiab lub Koom Txoos lwm pawg hu nkauj rau peb mloog. Txhua lub tuam rooj sab laj muaj tsib tuas: hnub Saturday muaj peb tuas thiab hnub Sunday muaj ob tuas. Thaum lub Plaub Hlis Ntuj, tuas thib peb nyob hnub Saturday yog rau cov mej zeej uas tuav lub Pov Thawj Hwj Aloos thiab lub Pov Thawj Hwj Mekhixedes. Thaum lub Kaum Hli Ntuj, yog rau mej zeej ntawm Koom Haum Niam Tsev thiab Koom Haum Ntxhais Hluas.
Cov Thawj Coj tej Lus Qhia
Lub caij ua ntej lub tuam rooj sab laj, lub Koom Txoos cov thawj cov thov Vajtswv seb lawv yuav qhia dab tsi. Tus Tswv tshoov lawv lub siab kom lawv paub hais li cas. Lawv qhia cov lus tseeb ntawm txoj moo zoo thiab caw peb los ua raws li Vajtswv cov lus txib. Lawv hais lus tim khawv txog Yexus Khetos thiab yaum kom peb coj raws li Nws.
Kawm Los ntawm lub Tuam Rooj Sab Laj
Ua ntej lub tuaj rooj sab laj, peb muaj peev xwm thov Vajtswv thiab hnov tej uas tus Tswv xav kom peb kawm. Thaum peb mloog cov lus, tus Ntsuj Plig yuav qhia peb tej uas peb yuav tsum paub. Tom qab lus tuam rooj sab laj, yuav muaj tej zaj lus nyob hauv ChurchofJesusChrist.org, nyob hauv qhov app Txoj Moo Zoo cov Ntawv, thiab nyob hauv phau Liyahaunas. Peb thov Vajtswv kawm ntawm tej zaj lus kom thiaj li kawm ntxiv txog Yexus Khetos thiab Nws txoj moo zoo.
Los ntawm cov Vaj Lug Kub
Yexus Khetos qhia tias peb yuav tsum sib ntsib ua ke ntau zaus (saib 3-Nifais 18:22).
Thaum lub Koom Txoos cov mej zeej teev tiam Vajtswv ua ke, tus Tswv nyob nrog nraim lawv (saib Mathais 18:20).
The Tswv tau txib lub Koom Txoos cov mej zej kom lawv “ib leeg … qhia thiab txhawb ib leeg” (Lus Qhuab Qhia thiab Kev Khi Lus 43:8).
Thaum lub Koom Txoos cov mej zeej ntseeg Khetos, Nws tus Ntsuj Plig yuav nyob nrog lawv thaum lawv sib ntsib (saib Lus Qhuab Qhia thiab Kev Khi Lus 44:2).
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, September 2021. Hmong 17473 295