Toeni Luhlahp: Toeni luhn Alu uh Ma Facluh Nohfohn Wi

Kuht lohng mwet pahluh ac mwet kol sahyac ke Alu uh ke pacl luhn toeni luhlahp uh. Elos luti ma God El luhngse kuht in lohng.

Kais sie Eprel ac Ohktohpa, Alu uh oruh miting ma pahngpahng toeni luhlahp. Mwet kol uh luti ac fahkwack kacl Jisus Kraist ac ke wosasuc Lal. Toeni luhlahp uh orek fin acn Salt Lake Siti, Utah, fin acn Macrike, ac suhpwacyuhklac nuh fin facluh nohfohn ahluhkwelah kahs 80. Mempucr nuhkwewa ac mwet luhngse pac sahyac ma luhngse lohng suliyuhck in lohng sramsram inge.

Toeni Emet luhn Alu uh

Alu uh tuh oreklac ke miting se ke Eprel 6, 1830 (liye Doctrine and Covenants 20). Toeni luhlahp se emet orek ke Jun 9, 1830. Ke pacl sac fahruh uh, toeni luhlahp uh muhta orek ye kohkoh luhn Prestuhn ke Alu uh ke oacna sie acn ma mempucr uh kuh in fahsrweni we. Ke 1840 kuhtuh ah, mwet kol uh muhtwacwacack oruh toeni inge pacl luo ke yac se.

Toeni uh Oreklac Fuhkah Misenge

Prestuhnsi Se Met, Mwet Kahsruh Luhn Mwet Sap Singucul Luo, ac mwet kol sahyac ke Alu uh sramsram ke toeni luhlahp uh. Tabernacle Choir ke Temple Square ac choir sahyac ke Alu oruh puhsrwen mwe on. Kais sie toeni uh oasr miting limekohsr kac: tolu ke Sactte ac luo ke Sacnri. Ke Eprel, miting ahktolu ke Sactte uh ma nuh sin mempucr ke Aaronic ac U ke Melchizedek pristut. Ke Ohktohpa, ma nuhsin Rilif Sosaiti ac Muhtwacn Fuhsr.

Mwe Luti luhn Mwet Kol

Ke mahlwem met liki toeni se inge, mwet kol ke Alu uh pruhe in etuh lah meac elos ac luti uh. Leum El moklwelos in etuh ma elos enenuh in fahk. Elos luti ma pwacye ke wosasuc ac suli kuht in liyacacng masap luhn God. Elos oacyacpac fahkwack ke Jisus Kraist ac ahkkweye kuht in fahsr Tohkohl.

Lutlut ke Toeni an

Met liki toeni luhlahp se inge, kuht kuh in pruhe in lohng ma Leum El kena tuh kuht in lotwelah. Ke kuht lohng sramsram inge, Nguhn ac fah luti kuht ke ma kuht enenuh in etuh. Tukun toeni luhlahp uh, sramsram inge ac oan ke ChurchofJesusChrist.org, ke Gospel Library ahp, ac ke Liahona. Kuht kuh in pruhe ac riti sramsram inge in lotwelah yohk ke kacl Jisus Kraist ac wosasuc Lal.

Ke Ma Suhmuhslah uh

Jisus Kraist El luti lah kuht enenuh in muhta wacna fahsrweni (liye 3 Nephi 18:22).

Ke mempucr ke Alu uh tuhkweni alu nuh sel Leum uh, Leum Elac fah weluhlos (liye Matthew 18:20).

Leum El sapkihn mempucr ke Alu uh in ”luti ac ahkkweye kais sie sin sie” (Doctrine and Covenants 43:8).

Ke mempucr ke Alu uh ahkkahlwemye luhlahlfongi lalos kacl Kraist, Nguhn Lal tuhfah weluhlos ke elos fahsrweni uh (liye Doctrine and Covenants 44:2).

© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Mwe Fahkwack ke Liahona Mahlwem Nuhkwewa, Septempuh 2021. Kosraean.17473 868