“Tempol Wok,” Liahona, Oktoba 2021
Liahona Mesej blong Evri Manis, Oktoba 2021
Tempol Wok
Ol Tempol oli ol haos blong Lod. Yumi save kasem ol odinens mo mekem ol kavenan wetem Hem insaed long ol tempol. Yumi save mekem ol odinens insaed long tempol long bihaf blong ol bubu blong yumi.
Foto blong Barankuila Kolombia Tempol i kam long Bruno Lima
Stat long bifo i kam, Lod i givim oda long ol pipol blong Hem blong oli bildim ol tempol. Ol tempol oli ol tabu ples we yumi save filim lav blong Papa long Heven insaed long hem, kasem ol odinens mo mekem ol promes wetem Hem. Jos i stap bildim ol tempol raon long wol blong mekem se plante moa pipol oli save kasem olgeta blesing ia.
Foto blong wan woman long fored blong Okuirh Hil Yuta Tempol i kam long Nexeo mo Matthew Reier
Endaomen
Ol memba blong Jos we oli gat wan stret mo gud laef, oli go long tempol blong kasem ol odinens mo mekem kavenan o promes wetem God. Wan long olgeta odinens we yumi kasem insaed long tempol, hem i endaomen. Toktok ia endaomen i minim “wan presen.” Tempol endaomen i wan presen we i kam long God. Long odinens ia, yumi lanem abaot plan blong Papa long Heven blong sevem yumi, mo yumi mekem ol kavenan blong stap obei ol komanmen blong Hem. Sapos yumi stap fetful long ol kavenan we yumi mekem , God bae i blesem yumi.
Foto blong kapol we i wokbaot i kam long Manila Filipin Tempol, i kam long Kristina Smet
Silim Ol Famli Tugeta
Wan mared insaed long tempol oli singaotem se wan siling. Taem wan kapol i sil long tempol mo tufala i kipim kavenan blong tufala, bae tufala i mared blong taem we i no save finis. Sapos tufala i gat ol pikinini, bae ol pikinini ia tu bae oli sil wetem tufala. Ol papa mo mama we oli sil afta we oli gat ol pikinini, oli save sil wetem ol pikinini blong tufala afta. Sapos oli stap laef stret mo gud, bae oli stap olsem wan famli blong taem we i no save finis.
Foto blong ples blong mekem baptaes long Lisbon Potugal Tempol, i kam long Lesli Nilson
Tempol Wok I blong Evri Pikinini blong God
Yumi mekem famli histri wok taem yumi lanem abaot ol bubu blong yumi. Yumi stap mekem tempol wok long bihaf blong olgeta. Yumi mekem, blong olgeta, evri odinens, we man we i stap laef i nidim: baptaes, konfemesen, kasem prishud (sapos hem i wan man), endaomen mo siling. Afta, oli save disaed blong olgetawan sapos oli wantem akseptem ol odinens ia. Long wei ia, evriwan long ol pikinini blong God oli save kasem glad we i kamaot long ol blesing blong gospel.
Foto blong wan famli long fored blong Filadelfia Pensilvania Tempol, i kam long Cody Bell
Ol Blesing blong Tempol Wok
Sapos yumi kipim ol kavenan we yumi mekem insaed long tempol, bae yumi kasem ol blesing, proteksen mo moa paoa. Bae yumi gat paoa ia blong prishud i stap wetem yumi. Famli blong yumi bae i stap tugeta blong taem we i no save finis.
Tempol tu i wan ples blong pis mo revelesen. Taem yumi stap mekem tempol wok, yumi save kasem help long saed blong spirit mo filim lav blong God.
© 2021 i kam long Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly Liahona Message, October 2021. Bislama. 17474 852