iTukutuku Vakavula ni Liaona, Okotova 2021

Cakacaka ni Valetabu

Na valetabu era Nona vale na Turaga. Sa rawa ni da ciqoma na cakacaka vakalotu ka veiyalayalati kei Koya ena valetabu. Eda rawa talega ni cakava na cakacaka vakalotu ena valetabu me baleti ira na noda qase eliu.

iTaba ni Valetabu e Barranquilla Colombia mai vei Bruno Lima

Ena itukutuku makawa taucoko, sa vakarota na Turaga vei ira na Nona tamata me ra tara valetabu. Na valetabu era sa vanua tabu ka rawa ni da vakila kina na loloma ni Kalou, ciqoma na cakacaka vakalotu, ka caka yalayala vata kei Koya. Sa tara tiko na Lotu na veivaletabu e veiyasai vuravura me levu sara na tamata e rawa ni nodra na veivakalougatataki oqo.

iTaba ni marama ena mata ni Valetabu e Oquirrh Mountain Utah mai vei Nexeo kei Matthew Reier

Na Edaumeni

O ira na lewe ni Lotu era bula savasava era lako ki na valetabu me ra ciqoma na cakacaka vakalotu ka caka veiyalayalati, se yalayala, vata kei na Kalou. E dua na cakacaka vakalotu eda ciqoma ena loma ni valetabu sai koya na edaumeni. Na vosa edaumeni e kena ibalebale “e dua na isolisoli.” Na edaumeni ni valetabu e isolisoli mai vua na Kalou. Ena cakacaka vakalotu oqo eda vulica kina na ituvatuva ni Tamada Vakalomalagi me baleta na noda vakabulai, ka da cakava na veiyalayalati me da maroroya na ivakaro ni Kalou. Kevaka eda sa yalodina tiko ki na veiyalayalati eda cakava, ena vakalougatataki keda na Kalou.

Kedrau itaba na veiwatini erau taubale tiko mai na Valetabu e Manila Philippines mai vei Cristina Smith

Vauci Vata ni Matavuvale

Na vakamau ena valetabu e vakatokai talega me veivauci. Ni rau sa vauci e dua na veiwatini ena valetabu ka rau maroroya na nodrau veiyalayalati, erau na vakamau me tawamudu. Kevaka erau vakaluveni, era na vauci talega vei rau na gone oya. Na itubutubu era vauci ni sa oti na nodra vakaluveni sa rawa ni vauci vei rau na luvedrau. Kevaka era bula dodonu, era na yaco me dua na matavuvale tawamudu.

iTaba ni tobu ni papitaiso ni Valetabu e Lisbon Potukali mai vei Leslie Nilsson

Na Cakacaka ni Valetabu Baleti Ira Kece na Luve ni Kalou

Eda cakava na cakacaka ni tuva kawa meda kilai ira kina na noda qase eliu. Eda qai cakava na cakacaka ni valetabu ena vukudra. Eda vakayacora vei ira na cakacaka vakalotu kece sara e gadrevi vei ira na bula tiko: papitaiso, veivakadeitaki, ciqomi ni matabete (vei ira na tagane), edaumeni, kei na veivauci. Era na qai rawa ni digitaka kevaka era vinakata me ra ciqoma na veicakacaka vakalotu oqo. Ena sala oqo, sa rawa kina vei ira kece na luve ni Kalou me ra marautaka na veivakalougatataki ni kosipeli.

iTaba ni matavuvale ena mata ni Valetabu e Philadelphia Pennsylvania mai vei Cody Bell

Veivakalougatataki ni Cakacaka ni Valetabu

Kevaka eda maroroya na veiyalayalati eda cakava ena valetabu, eda na vakalougatataki, taqomaki, ka vaqaqacotaki. Ena tiko vei keda na kaukauwa ni matabete. Ena tawamudu na noda matavuvale.

Na valetabu e vanua talega ni vakacegu kei na ivakatakila. Ni da cakava na cakacaka ni valetabu, sa rawa ni da ciqoma na veidusimaki vakayalo ka vakila na loloma ni Kalou.

Mai na iVolanikalou

Era sa vakaroti na tamata ni Turaga me ra tara valetabu (raica na Vunau kei na Veiyalayalati 124:39).

Na cakacaka e vakayacori ena valetabu e oka kina na nodra vauci vata na matavuvale (raica na Vunau kei na Veiyalayalati 138:47–48).

Na cakacaka vakalotu eda cakava e vuravura sa vauci mai lomalagi (raica na Maciu 16:19; Vunau kei na Veiyalayalati 132:46).

© 2021 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Okotova 2021. Fijian. 17474 858