Buluhaton sa Templo

Ang mga templo balay sang Ginuo. Mahimo kita makabaton sang mga ordinansa kag maghimo sang mga kasugtanan upod sa Iya sa sulod sang mga templo. Makahikot man kita sang mga ordinansa sa templo para sa aton mga katigulangan.

Litrato

templo

Litrato sang Templo sang Barranquilla Colombia iya ni Bruno Lima

Sa bilog nga kasaysayan, ang Ginuo nagsugo sa Iya katawhan nga magpatindog sang templo. Ang mga templo balaan nga mga lugar kon sa diin mahimo naton mabatyagan ang pagpalangga sang Dios, makabaton sang mga ordinansa, kag maghimo sang mga promisa upod sa Iya. Ang Simbahan nagapatindog sang mga templo sa bilog nga kalibutan para mas madamo pa gid nga mga tawo ang makabaton sining mga bugay.

Litrato

babayi sa atubang sang templo

Litrato sang babayi sa atubang sang Templo sang Oquirrh Mountain Utah iya ni Nexeo kag Matthew Reier

Ang Endowment

Ang mga miyembro sang Simbahan nga nagapangabuhi sing matarong nagakadto sa templo agud magbaton sang mga ordinansa kag maghimo sang mga kasugtanan, ukon mga promisa, upod sa Dios. Isa ka ordinansa nga mabaton naton sa templo amo ang endowment. Ang tinaga nga endowment nagakahulugan sang “regalo.” Ang endowment sa templo isa ka regalo sang Dios. Sa sini nga ordinansa matun-an naton ang plano sang Amay nga Langitnon para sa aton kaluwasan, kag nagahimo kita sang mga kasugtanan nga tumanon ang mga kasuguan sang Dios. Kon tampad kita sa mga kasugtanan nga aton ginhimo, bugayan kita sang Dios.

Litrato

mag-asawa sa atubang sang templo

Litrato sang mag-asawa nga nagalakat sa tupad sang Templo sang Manila Philippines iya ni Cristina Smith

Pagselyo sang mga Pamilya

Ang kasal sa templo ginatawag man nga pagselyo. Kon ang mag-asawa ginselyohan sa templo kag ila ginatuman ang ila mga kasugtanan, mangin kasado sila tubtob sa katubtuban. Kon may mga kabataan sila, inang mga kabataan maselyohan man sa ila. Ang mga ginikanan nga ginselyohan pagkatapos nga makaangkon sang kabataan mahimo nga maghikot sang pagselyo sang ila kabataan sa ila. Kon nagapangabuhi sila sing matarong, mangin isa sila ka pamilya sa wala katapusan.

Litrato

tulugmawan sang Templo sang Lisbon Portugal

Litrato sang tulugmawan sang Templo sang Lisbon Portugal iya ni Leslie Nilsson

Ang Buluhaton sa Templo para sa Tanan nga Anak sang Dios

Nagahikot kita sang buluhaton sa family history para makilala ang aton mga katigulangan. Pagkatapos ginahikot naton ang buluhaton sa templo para sa ila. Ginahikot naton para sa ila ang mga ordinansa nga kinahanglan sang mga buhi: bunyag, kumpirmasyon, pagbaton sang priesthood (para sa mga lalaki), endowment, kag pagselyo. Mahimo sila dayon magpili kon batunon nila ining mga ordinansa. Sa sini nga paagi, ang tanan nga anak sang Dios mahimo nga makabaton sang mga bugay sang ebanghelyo.

Litrato

pamilya sa atubang sang templo

Litrato sang pamilya sa atubang sang Templo sang Philadelphia Pennsylvania iya ni Cody Bell

Mga Bugay sang Buluhaton sa Templo

Kon tumanon naton ang mga kasugtanan nga aton ginahimo sa templo, pagabugayan, pagaamligan, kag pagapabakuron kita. Mangin kaupod naton ang gahum sang priesthood. Magaululupod ang aton mga panimalay tubtob sa katubtuban.

Ang templo isa man ka lugar sang katawhay kag rebelasyon. Kon himuon naton ang buluhaton sa templo, makabaton kita sang espirituhanon nga giya kag mabatyagan ang pagpalangga sang Dios

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, October 2021. Hiligaynon. 17474 861