« កិច្ចការព្រះវិហារបរិសុទ្ធ » លីអាហូណា ខែ តុលា ឆ្នាំ ២០២១
សារលិខិត លីអាហូណា ប្រចាំខែ តុលា ឆ្នាំ ២០២១
កិច្ចការព្រះវិហារបរិសុទ្ធ
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។ យើងអាចទទួលពិធីបរិសុទ្ធ និងធ្វើសេចក្ដីសញ្ញាជាមួយទ្រង់នៅក្នុងព្រះវិហារបរិសុទ្ធ ។ យើងក៏អាចធ្វើពិធីបរិសុទ្ធនៅក្នុងព្រះវិហារបរិសុទ្ធសម្រាប់បុព្វការីជនរបស់យើងបានផងដែរ ។
រូបថតនៃព្រះវិហារបរិសុទ្ធ បារ៉ាហ្គីឡា កូឡុំប៊ី ដោយ ប៊្រូណូ លីម៉ា
នៅទូទាំងប្រវត្តិសាស្ត្រ ព្រះអម្ចាស់បានត្រាស់បង្គាប់រាស្ត្ររបស់ទ្រង់ឲ្យសាងសង់ព្រះវិហារបរិសុទ្ធ ។ ព្រះវិហារបរិសុទ្ធគឺជាទីកន្លែងបរិសុទ្ធដែលយើងអាចទទួលអារម្មណ៍នៃសេចក្ដីស្រឡាញ់របស់ព្រះ ទទួលពិធីបរិសុទ្ធនានា និងធ្វើការសន្យាជាមួយទ្រង់ ។ សាសនាចក្រកំពុងសាងសង់ព្រះវិហារបរិសុទ្ធនៅជុំវិញពិភពលោក ដើម្បីឲ្យមនុស្សកាន់តែច្រើនឡើងអាចមានពរជ័យទាំងនេះ ។
រូបថតស្រ្តីនៅខាងមុខព្រះវិហារបរិសុទ្ធ អូគា ម៉ោនថិន យូថាហ៍ ដោយ និខហ្សីអូ និង ម៉ាថាយ រៀ
អំណោយទានពិសិដ្ឋ
សមាជិកនៃសាសនាចក្រដែលកំពុងរស់នៅដោយសុចរិត ទៅព្រះវិហារបរិសុទ្ធដើម្បីទទួលពិធីពិសិដ្ឋនានា និងចុះសេចក្ដីសញ្ញា ឬការសន្យា ជាមួយនឹងព្រះ ។ ពិធីបរិសុទ្ធមួយដែលយើងទទួលនៅក្នុងព្រះវិហារបរិសុទ្ធ គឺជាអំណោយទានពិសិដ្ឋ ។ ពាក្យ អំណោយទានពិសិដ្ឋ មានន័យថា « អំណោយមួយ » ។ អំណោយទានពិសិដ្ឋនៃព្រះវិហារបរិសុទ្ធគឺជាអំណោយមួយមកពីព្រះ ។ នៅក្នុងពិធីបរិសុទ្ធនេះ យើងរៀនអំពីផែនការរបស់ព្រះវរបិតាសួគ៌សម្រាប់សេចក្ដីសង្គ្រោះរបស់យើង និងចុះសេចក្ដីសញ្ញាដើម្បីរក្សាបទបញ្ញត្តិរបស់ទ្រង់ ។ ប្រសិនបើយើងស្មោះត្រង់ចំពោះសេចក្ដីសញ្ញាដែលយើងធ្វើទាំងនោះ នោះព្រះអម្ចាស់នឹងប្រទានពរយើង ។
រូបថតនៃគូស្វាមីភរិយាកំពុងដើរនៅក្បែរព្រះវិហារបរិសុទ្ធ ម៉ានីល ហ្វីលីពីន ដោយ គ្រីស្ទីណា ស្ម៊ីធ
ការផ្សារភ្ជាប់គ្រួសាររួមគ្នា
អាពាហ៍ពិពាហ៍មួយនៅក្នុងព្រះវិហារបរិសុទ្ធក៏ត្រូវបានហៅថា ការផ្សារភ្ជាប់ផងដែរ ។ ពេលដែលគូស្វាមីភរិយាមួយគូត្រូវបានផ្សារភ្ជាប់នៅក្នុងព្រះវិហារបរិសុទ្ធ ហើយពួកគេរក្សាសេចក្ដីសញ្ញារបស់ពួកគេ នោះពួកគេនឹងរៀបការជានិរន្តរ ។ ប្រសិនបើពួកគេមានកូន នោះកូនៗទាំងនោះក៏នឹងផ្សារភ្ជាប់នឹងពួកគេផងដែរ ។ ឪពុកម្ដាយដែលបានផ្សារភ្ជាប់បន្ទាប់ពីពួកគេមានកូនហើយ អាចឲ្យកូនៗរបស់ពួកគេផ្សារភ្ជាប់នឹងពួកគេបាន ។ ប្រសិនបើពួកគេរស់នៅដោយសុចរិត នោះពួកគេនឹងជាគ្រួសារដ៏នៅអស់កល្បជានិច្ច ។
រូបថតនៃអាងជ្រមុជទឹកនៃព្រះវិហារបរិសុទ្ធ លីសបោន ព័រទុយហ្គាល់ ដោយ លេសលី នីលសុន
កិច្ចការព្រះវិហារបរិសុទ្ធសម្រាប់បុត្រាបុត្រីគ្រប់រូបរបស់ព្រះ
យើងធ្វើកិច្ចការពង្សប្រវត្តិដើម្បីស្វែងយល់បន្ថែមទៀតពីបុព្វការីជនរបស់យើង ។ បន្ទាប់មក យើងធ្វើកិច្ចការព្រះវិហារបរិសុទ្ធជំនួសពួកគេ ។ យើងធ្វើពិធីបរិសុទ្ធទាំងអស់ដែលអ្នកនៅរស់ត្រូវការសម្រាប់ពួកគេ ៖ បុណ្យជ្រមុជទឹក ពិធីបញ្ញាក់ ការទទួលបព្វជិតភាព ( សម្រាប់បុរស ) អំណោយទានពិសិដ្ឋ និងពិធីផ្សារភ្ជាប់ ។ បន្ទាប់មក ពួកគាត់អាចជ្រើសរើសថាបើពួកគេចង់ទទួលយកពិធីបរិសុទ្ធទាំងនោះ ។ តាមរបៀបនេះ បុត្រាបុត្រីទាំងអស់របស់ព្រះអាចរីករាយនឹងពរជ័យនៃដំណឹងល្អបាន ។
រូបថតគ្រួសារនៅខាងមុខព្រះវិហារបរិសុទ្ធ ហ្វីឡាដែលហ្វៀ ផែនសីលវេញ៉ា ដោយ ខូប៊ី បិល
ពរជ័យនៃកិច្ចការព្រះវិហារបរិសុទ្ធ
ប្រសិនបើយើងរក្សាសេចក្ដីសញ្ញាទាំងឡាយ ដែលយើងធ្វើនៅក្នុងព្រះវិហារបរិសុទ្ធ នោះយើងនឹងទទួលពរជ័យ ការការពារ និងត្រូវបានពង្រឹង ។ យើងនឹងមានអំណាចនៃបព្វជិតភាពជាមួយយើង ។ គ្រួសាររបស់យើងនឹងនៅជាមួយគ្នាជានិរន្តរ ។
ព្រះវិហារបរិសុទ្ធក៏ជាកន្លែងនៃភាពសុខសាន្ត និងវិវរណៈផងដែរ ។ កាលដែលយើងធ្វើកិច្ចការព្រះវិហារបរិសុទ្ធ យើងអាចទទួលបានការណែនាំខាងវិញ្ញាណ និងទទួលអារម្មណ៍នៃសេចក្ដីស្រឡាញ់របស់ព្រះ ។
© 2021 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, October 2021. Cambodian. 17474 258