“Mudimu wa Ntempelu,” Liahona, Ngondo wa Dikumi 2021
Mukenji wa ku Ngondo wa Liahona Ngondo wa Dikumi 2021
Mudimu wa Ntempelu
Ntempelu idi nzubu ya Mukalenga. Tudi mua kupeta milulu ne kuenza bipungidi Nenda mu ntempelu. Tudi kabidi mua kuenza milulu mu ntempelu bua bankambua betu.
Mu bikondu bia kala, Mukalenga wakelela bantu Benda mukenji bua kuibaka ntempelu. Ntempelu idi miaba ya tshijila itudi mua kumvua dinanga dia Nzambi, kupeta milulu, ne kuenza malaya Nenda. Ekelezia udi wibaka ntempelu mu buloba bujima bua bantu babungi bapeta mabenesha aa.
Foto wa mamu kumpala kua Ntempelu wa Oquirrh Mountain Utah kudi Nexeo ne Matthew Reier
Dotation
Bidimba bia Ekelezia bidi bikala ne moyo muakana, bidi biya ku ntempelu bua kupeta milulu ne kuenza bipungidi, anyi malaya ne Nzambi. Mululu umua utudi tupeta mu ntempelu udi muikala dotation. Muaku dotation udi umvuija “dipa.” Dotation wa ku ntempelu udi dipa dia kudi Nzambi. Mu mululu ewu, tudi tulonga pa bulongolodi bua Tatu wa mu Diûlu bua lupandu luetu, ne tudi tuenza bipungidi bua kulama mikenji ya Nzambi. Patudi ne lulamatu ku bipungidi bitudi tuenza, Nzambi neatubenesha.
Foto wa bantu babidi benda ku luseka lua Ntempelu wa Manila Philippines kudi Cristina Smith
Disuika dia Mêku Pamua
Dibaka dia mu ntempelu didi dibikidibua kabidi ne; disuikibua. Padi bantu babidi basuikibua mu ntempelu ne balama bipungidi biabu, nebikala basedibua bua kashidi. Bobu bikala ne bana, bana abu nebikala basuikibua kabidi nabu. Baledi badi basuikibua panyima pa bamana kuikala ne bana, badi mua kusuikibua ne bana babu. Bobu bikala ne mioyo miakana, nebikala dîku dia tshiendelela.
Foto wa tshitambuishidi tshia Ntempelu wa Lisbon Portugal kudi Leslie Nilsson
Mudimu wa Ntempelu bua Bana Bonsu ba Nzambi
Tudi tuenza mudimu wa muyuki wa dîku bua kumanya bankambua betu. Tudi tuenza nanku mudimu wa ntempelu buabu. Tudi tubakumbajila milulu yonsu idi badi ne moyo nayi dijinga: ditambula, dijadikibua, kupeta buakuidi (bua bantu baluma), dotation, ne disuikibua. Pananku badi mua kusungula pikalabu basua kuitaba milulu eyi. Mu mushindu ewu, bana bonsu ba Nzambi badi mua kusanka ne mabenesha a lumu luimpa.
Foto wa dîku kumpala kua Ntempelu wa Philadelphie Pennsylvanie kudi Cody Bell
Mabenesha a Mudimu wa Ntempelu
Tuetu balama bipungidi bitudi tuenza mu ntempelu, netubeneshibua, netukubibua, ne netukankamishibua. Netuikala ne bukola bua buakuidi netu. Mêku etu neikala pamua kashidi.
Ntempelu udi kabidi muaba wa ditalala ne dibululuila. Patudi tuenza mudimu wa ntempelu, tudi mua kupeta buludiki bua mu nyuma ne kumvua dinanga dia Nzambi.
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, October 2021. Tshiluba. 17474 760