’Ohipa hiero

E mau fare nō te Fatu te mau hiero. E nehenehe tātou e fāri’i i te mau ’ōro’a ’e e rave i te mau fafaura’a ’e ’ōna i roto i te mau hiero. E nehenehe ato’a tātou e rave i te mau ōro’a nō tō tātou mau tupuna i roto i te hiero.

I te roara’a o te tau, ’ua fa’aue te Fatu i tōna mau ta’ata ’ia patu i te mau hiero. E mau vāhi mo’a te mau hiero i reira tātou e ’ite ai i te here o te Atua ’e e fāri’i ai i te mau ’ōro’a ’e e rave ai i te mau fafaura’a ’e ’ōna. Tē patu nei te ’Ēkālesia i te mau hiero nā te ao nei, ’ia rahi atu ā te mau ta’ata e nehenehe e fāri’i i teie mau ha’amaita’ira’a.

Te ’ōro’a hiero

Tē haere nei te mau melo ora parauti’a o te ’Ēkalesia i te hiero nō te fāri’i i te mau ’ōro’a ’e nō te rave i te mau fafaura’a, ’aore rā, i te mau parau fafau ’e te Atua. Hō’ē ’ōro’a tā tātou e fāri’i i roto i te hiero ’o te ’ōro’a hiero ïa [dotation nā roto i te reo farāni]. Te aura’a o te ’ōro’a hiero [dotation] « e hōro’a » ïa. E hōro’a nō ’ō mai i te Atua ra. I roto i teie ’ōro’a e ha’api’i mai tātou nō ni’a i te ’ōpuara’a a te Metua i te ao ra nō tō tātou fa’aorara’a, ’e e rave tātou i te mau fafaura’a ’ia ha’apa’o i te mau fa’auera’a a te Atua. Mai te mea e ha’apa’o maita’i tātou i te mau fafaura’a tā tātou i rave, e ha’amaita’i mai te Atua ia tātou.

Tā’ati ’āmui i te mau ’utuāfare

’Ua pi’i-ato’a-hia te fa’aipoipora’a i roto i te hiero, e tā’atira’a. ’Ia tā’atihia nā ta’ata fa’aipoipo i roto i te hiero ’e ’ia ha’apa’o rāua i tā rāua mau fafaura’a, e vai fa’aipoipo rāua ē a muri noa atu. Mai te mea e fānau rāua i te tamari’i, ’ua tā’ati-ato’a-hia ïa te reira mau tamari’i ia rāua. Te mau metua tei tā’atihia i muri a’e i te fānaura’a i te tamari’i, e nehenehe tā rātou mau tamari’i e tā’atihia ia rātou. Mai te mea e ora parauti’a noa rātou, e vai noa rātou e ’utuāfare ē a muri noa atu.

Te vāhi bāpetizora’a nō te hiero nō Lisbon (Pōtītī)

’Ohipa hiero nō te mau tamari’i ato’a a te Atua

Tē rave nei tātou i te ’ohipa ’ā’amu ’utuāfare nō te ’ite mai i tō tātou mau tupuna. I muri iho, e rave tātou i te ’ohipa hiero nō rātou. Tē rave nei tātou nō rātou i te mau ’ōro’a ato’a e tītauhia i te feiā ora : te bāpetizora’a, te ha’amaura’a, te fāri’ira’a i te autahu’ara’a (nō te mau tāne), te ’ōro’a hiero ’e te tā’atira’a. I muri iho nā rātou e mā’iti mai te mea e hina’aro rātou e fāri’i i teie mau ’ōro’a. Nā roto i te reira, e nehenehe te mau tamari’i ato’a a te Atua e fāna’o i te mau ha’amaita’ira’a o te ’evanelia.

Mau ha’amaita’ira’a nō te ’ohipa hiero

Mai te mea e ha’apa’o tātou i te mau fafaura’a tā tātou i rave i roto i te hiero, e ha’amaita’ihia tātou, e pāruruhia tātou ’e e ha’apūaihia tātou. E roa’a ia tātou te mana o te autahu’ara’a. E vai tō tātou ’utuāfare ē a muri noa atu.

’Ua riro ato’a te hiero ’ei vāhi nō te hau ’e te heheura’a. ’A rave ai tātou i te ’ohipa hiero, e nehenehe tātou e fāri’i i te arata’ira’a pae vārua ’e ’ia ’ite i te here o te Atua.

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, October 2021. Tahitian. 17474 895