Na Tuva Kawa e sa Vukei Ira na Tubuda

Na tuva kawa sai koya na dikevi kei na vulici ni veika baleta na lewe ni noda matavuvale. Eda vakasokumuna talega na itukutuku baleti ira na tubuda me rawa ni da cakava na cakacaka ni valetabu ena vukudra.

Na matavuvale sa usutu ni tuvatuva ni bula marau ni Tamada Vakalomalagi. Sa vakarautaka tu o Koya na sala me ra veitomani tikoga kina vakadua na matavuvale. Ni da cakava na noda tuva kawa kei na cakacaka ni valetabu, eda sa vukea na nodra kau vata mai na noda lewe ni matavuvale, o ira na bula kei ira na mate. (Na “cakacaka ni valetabu” e kena ibalebale na ciqomi ni cakacaka vakalotu ni valetabu me baleti keda, me vaka na vauci tu vei ira na watida, vakakina na vakayacori ni cakacaka vakalotu ena valetabu me baleti ira na tubuda.)

Cakacaka ni Tuva Kawa kei na Valetabu

Sa gadreva na tamata yadua e sa bula se na mai bula e vuravura na cakacaka vakalotu ni kosipeli. Kevaka e sega na madigi oqori vei ira na tubuda, sa rawa ni da vakayacora na cakacaka vakalotu ena vukudra ena valetabu. E dua vei ira na cakacaka vakalotu oqori na vauci tu vei ira na lewe ni matavuvale. Na “vauci” tu e kena ibalebale ni sa rawa ni da bula vakaoti vata kei na noda matavuvale kevaka eda buladodonu. Sa rawa ni da vauci ki na noda matavuvale ena valetabu duadua ga.

Veivakalougatataki ni Cakacaka ni Tuva Kawa

Na tuva kawa e rawa ni vukei keda ni vaqaqacotaka na noda veimaliwai kei ira na lewe ni noda matavuvale era bula tiko. Ni da veiwaseitaka na italanoa, itaba, kei na ivakananumi tale eso, eda sa tauyavutaka na ivau ni matavuvale. Eda sa vaqaqacotaka talega na noda veilomani vakai keda. Era sa yalataka talega na parofita ni na kauti keda vakavoleka vei Jisu Karisito na cakacakataki ni noda tuva kawa.

Vakaraici Ira na Tubuda

Sa vinakata na Tamada Vakalomalagi me da vauci ki na noda matavuvale ena gauna oqo kei ira na tubuda. Ni bera ni da vauci vei ira na tubuda, sa gadrevi me da vakaraica ka maroroya na itukutuku e baleti ira. Ia na tuva kawa e levu cake mai na kena vakadikevi na yaca, tikinisiga, kei na vanua. Ni da vulica na veika e baleti ira na tubuda, eda na vakila na bibi ni noda veisemati.

© 2021 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Monthly Liahona Message, December 2021. Fijian. 17476 858