Ang Family History Nagabulig sa Aton mga Katigulangan

Ang family history amo ang pagdiskubre kag pagtuon parte sa mga miyembro sang aton pamilya. Nagatipon man kita sang mga impormasyon parte sa aton mga katigulangan agud makahimo kita sang buluhaton sa templo para sa ila.

Ang mga pamilya sentro sa plano sang kalipayan sang Amay nga Langitnon. Naghanda Sia sang paagi para sa mga pamilya nga magpadayon sa katubtuban. Kon aton ginahimo ang family history kag buluhaton sa templo, ginabuligan naton nga matipon ang mga miyembro sang aton pamilya, pareho nga mga buhi kag mga patay. (Ang “buluhaton sa templo” nagakahulugan sang pagbaton sang mga ordinansa sa templo para sa aton mga kaugalingon, pareho sang maselyo sa aton bana ukon asawa, amo man ang paghikot sang mga ordinansa sa templo para sa aton mga katigulangan.)

Family History kag Buluhaton sa Templo

Ang tagsa ka tawo nga nagkabuhi ukon magakabuhi sa kalibutan nagakinahanglan sang mga ordinansa sang ebanghelyo. Kon ang aton mga katigulangan wala sing amo sina nga tsansa, mahimo naton hikoton ang mga ordinansa para sa ila sa templo. Isa sinang mga ordinansa amo ang maselyo sa mga miyembro sang pamilya. Ang “maselyo” nagakahulugan nga mahimo kita magkabuhi sing wala katubtuban upod sa aton mga pamilya kon matarong kita. Sa mga templo gid lamang nga mahimo kita maselyo sa aton mga pamilya.

Mga Bugay sang Buluhaton sa Family History

Ang family history makabulig sa aton nga mapabakod ang aton relasyon sa buhi nga mga miyembro sang aton pamilya. Sa pagpaambit naton sang mga istorya, litrato, kag iban pa nga mga handurawan sa isa kag isa, nagapahamtang kita sing suod nga mga kaangtanan sa pamilya. Ginapabakod man naton ang pagpalangga naton sa isa kag isa. Ang mga propeta nagpromisa man sa aton nga ang paghikot sang aton family history mas magapalapit sa aton kay Jesucristo.

Pagpangita sang Aton mga Katigulangan

Luyag sang Amay nga Langitnon nga maselyo kita sa aton mga pamilya sa karon kag sa aton mga katigulangan. Antes kita maselyo sa aton mga katigulangan, kinahanglan anay naton sila pangitaon kag dayon magtipon sang mga impormasyon parte sa ila. Pero ang family history masobra pa sa pagpangita lang sang mga ngalan, mga petsa, kag mga lugar. Sa pagtuon naton parte sa aton mga katigulangan, labi kita nga magabatyag sing suod nga kaangtanan sa ila.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, December 2021. Hiligaynon. 17476 861