« Family History Helps Our Ancestors »Liahona ខែ ធ្នូ ឆ្នាំ ២០២១
សារលិខិត លីអាហូណា ប្រចាំខែធ្នូ ឆ្នាំ២០២១
កិច្ចការពង្សប្រវត្តិជួយបុព្វការីជនរបស់យើង
កិច្ចការពង្សប្រវត្តិគឺជាការស្វែងយល់ និងរៀនអំពីសមាជិកគ្រួសាររបស់យើង ។ យើងក៏ប្រមូលព័ត៌មានអំពីបុព្វការីជនរបស់យើង ដើម្បីយើងអាចធ្វើកិច្ចការព្រះវិហារបរិសុទ្ធសម្រាប់ពួកលោកផងដែរ។
គ្រួសារជាផ្នែកដ៏សំខាន់មួយនៅក្នុងផែនការរបស់ព្រះវរបិតាសួគ៌ ។ ទ្រង់បានរៀបចំផ្លូវដើម្បីក្រុមគ្រួសារអាចបន្តជារៀងរហូត ។ នៅពេលយើងធ្វើកិច្ចការពង្សប្រវត្តិ និងកិច្ចការព្រះវិហារបរិសុទ្ធរបស់យើង នោះយើងជួយនាំសមាជិកគ្រួសាររបស់យើង ទាំងអ្នកនៅរស់ និងទាំងអ្នកស្លាប់ ឲ្យរួបរួមគ្នា ។ ( « កិច្ចការព្រះវិហារបរិសុទ្ធ » មានន័យថាការទទួលពិធីបរិសុទ្ធនៃព្រះវិហារបរិសុទ្ធសម្រាប់ខ្លួនយើង ដូចជាត្រូវបានផ្សារភ្ជាប់ទៅនឹងស្វាមី ឬភរិយារបស់យើង ក៏ដូចជាការធ្វើពិធីបរិសុទ្ធនានានៅក្នុងព្រះវិហារបរិសុទ្ធសម្រាប់បុព្វការីជនទាំងឡាយរបស់យើងផងដែរ ) ។
កិច្ចការពង្សប្រវត្តិ និងកិច្ចការព្រះវិហារបរិសុទ្ធ
បុគ្គលគ្រប់រូបដែលបានរស់នៅ ឬនឹងរស់នៅលើផែនដីនេះ ត្រូវការពិធីបរិសុទ្ធទាំងឡាយនៃដំណឹងល្អ ។ ប៉ុន្តែបើសិនជាបុព្វការីជនរបស់យើងមិនមានឱកាសនោះទេ យើងអាចធ្វើពិធីបរិសុទ្ធទាំងនោះជូនពួកលោកនៅក្នុងព្រះវិហារបរិសុទ្ធបាន ។ ពិធីបរិសុទ្ធមួយក្នុងចំណោមពិធីបរិសុទ្ធទាំងនោះគឺផ្សារភ្ជាប់ជាមួយសមាជិកគ្រួសារ ។ ត្រូវបាន « ផ្សារភ្ជាប់ » មានន័យថា យើងអាចរស់នៅជាមួយក្រុមគ្រួសាររបស់យើងជារៀងរហូត ប្រសិនបើយើងសុចរិត ។ យើងអាចផ្សារភ្ជាប់ជាមួយក្រុមគ្រួសារយើងបានតែនៅក្នុងព្រះវិហារបរិសុទ្ធប៉ុណ្ណោះ ។
ពរជ័យទាំងឡាយនៃពង្សប្រវត្តិ
ពង្សប្រវត្តិអាចជួយយើងពង្រឹងនូវទំនាក់ទំនងរបស់យើងជាមួយនឹងសមាជិកគ្រួសាររបស់យើង ។ នៅពេលដែលយើងចែកចាយដំណើររឿង រូបថត និងអនុស្សាវរីយ៍ផ្សេងៗទៀតជាមួយគ្នាទៅវិញទៅមក នោះយើងបង្កើតនូវចំណងគ្រួសារ ។ យើងក៏ពង្រឹងនូវសេចក្ដីស្រឡាញ់ដែលយើងមានចំពោះគ្នាទៅវិញទៅមកផងដែរ ។ ព្យាការីក៏បានសន្យាផងដែរថា ការធ្វើការលើពង្សប្រវត្តិរបស់យើងនឹងនាំយើងឲ្យខិតកាន់តែជិតព្រះយេស៊ូវគ្រីស្ទ ។
សូមស្វែងរកបុព្វការីជនរបស់យើង
ព្រះវរបិតាសួគ៌មានព្រះទ័យចង់ឲ្យយើងផ្សារភ្ជាប់ជាមួយក្រុមគ្រួសារបច្ចុប្បន្នរបស់យើង និងជាមួយបុព្វការីជនរបស់យើង ។ ពីមុនពេលយើងអាចផ្សារភ្ជាប់ជាមួយនឹងបុព្វការីជនរបស់យើងបាន យើងត្រូវស្វែងរក និងបន្ទាប់មករក្សាព័ត៌មានអំពីពួកគាត់ទុក ។ ប៉ុន្តែពង្សប្រវត្តិ គឺលើសពីការគ្រាន់តែស្រាវជ្រាវឈ្មោះ កាលបរិច្ឆេទ និងទីកន្លែងទៅទៀត ។ នៅពេលយើងរៀនអំពីបុព្វការីជនរបស់យើងនោះយើងនឹងមានអារម្មណ៏កាន់តែជិតស្និទ្ធជាមួយពួកគាត់ ។
© 2021 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ សារលិខិតលីអាហូណាប្រចាំខែធ្នូ ឆ្នាំ២០២១ ។ Cambodian. 17476 258