Menmenbwij an Baam̧le ej Rietto ro Jibūd im Jim̧aad

Menmenbwij an Baam̧le ej kwaļo̧k im ekkatak kōn ro uwaan baam̧le eo ad. Jej barāinwōt aiintok meļeļe ko kōn rietto ro jibūd im jim̧aad bwe jen maron̄ kōm̧m̧ane jerbal in tampeļ n̄an er.

Baam̧le ko rej dilep n̄an karōk eo an Jemedwōj Ilan̄. E ekar kōpooj iaļ eo n̄an baam̧le ko n̄an wōnm̧aanļo̧k n̄an indeeo. Ilo ad kōm̧m̧ane menmenbwij an baam̧le im jerbal in tampeļ ko ad, jej jipan̄ ro ilo baamļe ko ad, jim̧or mour im mej, koba ippān doon. (“Jerbal in tampeļ” meļeļein jej bōk kain̄i ko ilo tampeļ n̄an kōj make, āinwōt n̄e em̧ōj ad liape kōj n̄an ro pāleed, im āinwōt n̄e jej kōm̧m̧ani kain̄i ko n̄an rietto ro jibūd im jim̧aad remej.)

Menmenbwij an Baam̧le im Jerbal an tampeļ

Kajjojo armej me ekar mour ak enaaj mour ilo lal in rej aikuji kain̄i ko an gospel in. Ak n̄e rietto ro jibūd im jim̧aad ekar jab wōr aer iien n̄an kōm̧m̧ane, jemaron̄ kōm̧m̧ani kain̄i ko n̄an er ilo tampeļ eo. Juon iaan kain̄i kein ej maron̄ liap n̄an ro uwaan baam̧le eo. N̄e jej “liap” meļeļein jenaaj bar maron̄ mour ijeņ ippān baam̧le ko ad n̄an indeeo eļan̄n̄e jej wānōk. Jemaron̄ liāp n̄an baam̧le ko ad ilo tampeļ eo wōt.

Kōjeraam̧m̧an ko jān Jerbal in Menmenbwij an Baam̧le

Menmenbwij an baam̧le emaron̄ jipan̄ kōj kōkajoorļo̧k jem̧jerā ko ad ippān ro uwaan baam̧le ko ad remour. Ilo ad kwaļo̧k bwebwenato ko, pija ko, im ememļo̧kjeņ ko ippān doon, jej ejaake jem̧jerā ko rekajoor an baam̧le. Jej barāinwōt kōkajoorļo̧k iakwe eo ad n̄an doon. Rikanaan ro rekar barāinwōt kallim̧ur bwe jerbale menmenbwij eo ad enaaj kepaakļo̧k kōj n̄an Jisōs Kraist.

Pukot Rietto ro Jibūd im Jim̧aad

Jemedwōj Ilan̄ ekōņaan bwe jen liap n̄an baamļe ko ad kiiō im n̄an rietto ro jibūd im jim̧aad. Mokta jān ad maron̄ liap n̄an rietto ro jibūd im jim̧aad, jej aikuj in pukot im kōjparok meļeļe ko kōn er. Menmenbwij an baam̧le eļapļo̧k jān baj kappukot āt ko, raan ko, im jikin ko. Ilo ad ekkatak kōn rietto jibūd im jim̧aad, jenaaj en̄jake an ļapļo̧k ad epaakeļo̧k er.

© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim ukook eo: 6/19. Ukok in Monthly Liahona Message December 2021. Marshallese. 17476 874