Poadoapoad en Peneinei kin Sewese Atail Keinek kan

Poadoapoad en Peneinei iei dihdiarada oh esehla duwen atail peneinei kan koaros. Kitail pil kin kihpene koasoiepen atail peneinei kan pwe kitail en kak wia arail doadoahk en tehnpas sarawi.

Peneinei me wia poahson en sapwellimen Sahm Nanleng pilahn en peren soutuk. E kaunopadahr ahl ehu ong peneinei kan en mihmipene kohkohlahte. Ni atail kin wia doadoahk en poadoapoad en peneinei oh doadoahk en tehnpas sarawi, kitail kin sawas kihpene atail peneinei kan, me momour oh me mehlahr kan koaros. (“Doadoahk en Tehnpas Sarawi” wewehki alehdi tiahk sarawi kan en tehnpas sarawi ong kitail, me wewehki katengeteng ong atail pwoud akan, pil duwehte atail wiaiong atail keinek kan arail tiahk sarawi kan en tehnpas sarawi.)

Poadoapoad en Peneinei oh Doadoahk kan en Tehnpas Sarawi

Aramas koaros me momour ehr de me pahn mour pohn sampah anahne alehdi tiahk sarawi kan en rongamwahuo. Ma atail keinek kan sohte alehdi ansou mwahu wet, kitail kak welian irail di oh wia tiahk sarawi kan nan tehnpas sarawi. Ehu tiahk sarawi kan iei en katengeteng ohng tohn peneinei kan. En “katengetengdi” wewehki me kitail pahn kak kouson pene rehn atail peneinei kan kohkohlahte ma kitail pahn momourki me pwung. Kitail kak katengeteng ong atail peneinei kan nan tehnpas sarawi kelehpw.

Kapai kan en Doadoahk en Poadoapoad en Peneinei

Poadoapoad en peneinei kak sewese kakehlaka atail ehuong tohn atail peneinei kan me momour. Ni atail ehukipene soai kan, kilel kan, oh soahng kesempwal tohto teikan ong emen emen, kitail kin kalaudehla ehupene en peneinei. Kitail pil kin kakehlakala limpoak me kitail ahneki ong emen emen. Soukohp kan pil inoukiong kitailehr me doadoahk en poadoapoad en peneinei pahn kin waikitaildo en karaniala Sises Krais.

Raparapahki Atail Keinek kan

Sahm Nanleng kupwurki kitail en katengeteng ong atail peneinei kan oh keinek kan koaros. Mwohn atail pahn kak katengeteng ong atail keinek kan, kitail anahne diar irail da oh koledi mwahu audepen irail. Ahpw poadoapoad en peneinei kaidehk te ken raparapahki ahd, rahn akan, oh wasah kan. Ni atail pahn kin esehda atail keinek kan, kitail kin ahneki pepehm me kitail karanih irail.

© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan nan Liahona, Tihsempe 2021. Pohanpeian. 17476 885