Poro’i tā’āva’e nō te Liahona, Tītema 2021

E tauturu te ’ā’amu ’utuāfare i tō tātou mau tupuna

Te ’ā’amu ’utuāfare, ’o te ’itera’a ïa ’e te ’apora’a mai i te parau nō ni’a i te mau melo o tō tātou ’utuāfare. Tē ha’aputuputu ato’a nei tātou i te mau parau nō ni’a i tō tātou mau tupuna ’ia ti’a ia tātou ’ia rave i te ’ohipa hiero nō rātou.

’O te mau ’utuāfare te pū nō te fa’anahora’a nō te ’oa’oa a te Metua i te ao ra. ’Ua fa’aineine ’oia i te hō’ē rāve’a ’ia vai noa te mau ’utuāfare ē a muri noa atu. ’Ia rave tātou i tā tātou ’ohipa ’ā’amu ’utuāfare ’e te ’ohipa hiero, tē tauturu ra ïa tātou i te ha’aputuputu mai i te mau melo o tō tātou ’utuāfare, te feiā ora ’e ’e tei pohe. (« Te ’ohipa hiero » ’o te fāri’ira’a ïa i te mau ’ōro’a nō te hiero nō tātou iho, mai te tā’atira’a i te hoa fa’aipoipo, ’e te ravera’a i te mau ’ōro’a i roto i te hiero nō tō tātou mau tupuna.)

Te ’ohipa ’ā’amu ’utuāfare ’e te ’ohipa hiero

Tītauhia te mau ’ōro’a nō te ’evanelia nō te ta’ata ato’a tei ora na ’aore rā ’o tē ora mai i ni’a i te fenua nei. Mai te mea ’aita tō tātou mau tupuna i fāna’o i te rāve’a nō te reira, e nehenehe tā tātou e rave i te mau ’ōro’a nō rātou i roto i te hiero. Hō’ē o te reira mau ’ōro’a, ’o te tā’atira’a ïa i te mau melo o te ’utuāfare. Te aura’a ’ia « tā’atihia » ’oia ho’i e ti’a ia tātou ’ia ora ē a muri noa atu ’e tō tātou ’utuāfare mai te peu e mea parauti’a tātou. E nehenehe tātou e tā’atihia i tō tātou ’utuāfare, i roto noa rā i te mau hiero.

Te mau ha’amaita’ira’a nō te ’ohipa ’ā’amu ’utuāfare

E nehenehe te ’ā’amu ’utuāfare e tauturu ia tātou ’ia ha’apūai i tō tātou tā’amura’a i te mau melo o te ’utuāfare e ora nei. ’Ia fa’ati’a tātou i te mau ’ā’amu, ’ia fa’a’ite tātou i te mau hōho’a ’e te tahi atu mau ha’amana’ora’a i te tahi ’e te tahi, tē ha’amau nei ïa tātou i te mau tā’amura’a ’utuāfare. Tē ha’apūai ato’a nei tātou i tō tātou here nō te tahi ’e te tahi. ’Ua parau fafau ato’a te mau peropheta ē, e riro te ravera’a i te ’ā’amu ’utuāfare i te ha’afātata atu ā ia tātou ia Iesu Mesia.

’Imi i tō tātou mau tupuna

’Ua hina’aro te Metua i te ao ra ’ia tā’atihia tātou i tō tātou nei mau ’utuāfare ’e tō tātou mau tupuna. Hou tātou ’a tā’atihia ai i tō tātou mau tupuna, tītauhia ia tātou ’ia ’imi ’e ’ia fa’aherehere i te mau parau nō ni’a ia rātou. Terā rā, ’ua hau atu te ’ā’amu ’utuāfare i te ’imira’a i te mau i’oa, te mau tai’o mahana ’e te mau vāhi. ’A ha’api’i mai ai tātou nō ni’a i tō tātou mau tupuna, e rahi atu ā tō tātou tū’atira’a ia rātou.

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, December 2021. Tahitian. 17476 895