Ol Voes blong Ol Lata-dei Sent
!I Gat Buk blong Momon long Ples Ia!
Taem mi holem Buk blong Momon long han blong mi, mi filim se ol hevi trabol blong mi oli go lus insaed long gudfala lav blong Sevya.
Foto i kam Jekob A. long Brown
Wan Satedei, long medel blong winta, waef blong mi mo mi i profite long wan dei we i gat san, be i kolkol, blong go wokbaot mo save gud ol neba blong mifala. Mifala i jes muv plante taosen mael longwe long hom blong mifala long Is Kos blong Yunaeted Stet, blong gohed blong skul mo faenem sam wok.
Mifala i disaed blong wokbaot i go long wan yunivesiti we i stap kolosap, we mitufala i neva visitim. Mitufala i wokbaot gogo mitufala i faenem bigfala laebri blong yunivesiti. Mitufala i laekem blong rid, mo waef blong mi, wan studen we i graduet, i wantem save tumas wanem risos bae hem i save faenem blong yusum long stadi blong hem. From se hem i bin stap stadi long histri blong relijin, mitufala i gotru long ol hip blong ol buk blong laebri long seksen blong relijin. Taem mifala i sakem ae long sam long ol intresting taetol ia, wan smol buk wetem wan blu kova, we mi luksave, i kasem ae blong mi.
“!I gat Buk blong Momon long ples ia!” Mi talem slo wetem bigfala glad.
Mi tekemaot buk long sef. Hem i wan olfala kopi, mo mi stap askem miwan se hamas taem nao hem i stap ia. Wanem i rili pulum tingting blong mi, i wan smol pepa we oli putum insaed long kova long fored.
Smol pepa ia i wan sot testemoni we i kam long wan kapol blong Blakfut, Aedaho, YSA. Long testemoni blong tufala, tufala i bin eksplenem wanem hem i Buk blong Momon, mo from wanem hem i impoten. Tufala i serem wan sot mo strong testemoni abaot buk ia, mo tufala i stap invaetem huia bae i rid blong prea blong save sapos buk ia i tru.
Toktok blong tufala i simpol, be mesej blong tufala i tok stret i go long hat blong mi. Maet kapol ia i minim blong olgeta we oli no gat semfala bilif oli ridim testemoni blong tufala. Maet oli bin givim kopi ia long wan we oli bin save hem. ?Huia i save se hamas taem buk ia i pas long ol defren han, mo hamas taem i travel gogo i go stap long laebri blong yunivesiti?
Taem mi stap holem buk ia insaed long han blong mi, Spirit i fulumap hat blong mi. Blong wan smol taem, mi filim se ol hevi trabol blong mi oli go lus insaed long gudfala lav blong Sevya.
Dei ia insaed long laebri i gohed blong mekem mi tingbaot ol blesing we mi bin kasem taem mi bin ridim Buk blong Momon, mo hamas i impoten blong stap serem testemoni blong mi abaot buk ia. Testemoni blong yumi, i save foldaon long “ples we i gat ston” o “long gudfala graon” (luk long Matiu 13:3–9), be hem i impoten blong yumi serem ol testemoni ia. God bae mi mekemsua se bae ol testemoni ia oli kasem man long stret taem, long stret ples, mo long ol stret pipol.