Porous ren Liahona Iteiten maram, January 2022

Ewe Turutiw Mi Chiechien An Kot Kokkot

Pokiten ewe Turutiw, sia tufichin feito ngeni fonufan me eu ran sia tongeni niwin ach sipwe nonnom ren Samach non Nang.

Adam me Eve non ewe Tannipi Eden, seni Robert T. Barrett

Non ewe Tannipi Eden, Kot a annuku ngeni Adam me Eve pwe resap ochei ewe foun uwaan ewe iran mirititi minne mi och me mi ngaw. Mwirin A urenir, “Oua tongeni fini ren ami pwisin finata, … nge, chechemeni pwe Ua pinei” (Moses 3:17). Setan a sotuni Eve an epwe ochei foun uwaan ewe ira. A ureni, Oupwe usun ekkewe kot, ne sinei och me ngaw (Moses 4:11). Neminewe a ochei uwaan ewe ira me mwirin a ngeni Adam. Kot a tinireu seni ewe Tannipi Eden.

Ewe Turutiw

Adam me Eve ra Katuru seni ewe Tannipi, seni Gary L. Kapp, esap tongeni kapini

Nupwen Adam me Eve ra suseni ewe Tannipi Eden, rese chiwen nom fan mesen Kot. Ei keimufesen seni Kot a iteni manon ngun. Ar suseni ewe tannipi a pwan wewen pwe Adam me Eve ra winiti aramas me ra tufichin mano. Inamo ika Adam me Eve rese chiwen nom ren Kot me ra winiti aramas mi tongeni mano, ir mi pwapwa me apinukunuk nupwen ra kuna pwe ir mi tongeni fefeita (nengeni Moses 5:10–11). “Adam a turutiw pwe aramas repwe manau; iwe aramas ra manau, pwe repwe tongeni mefi pwapwa.”(2 Nephi 2:25).

Eu Fansoun Sossot

Nupwen sia uputiw, sia towaw seni Kot, usun chok Adam me Eve mwirin ewe Turutiw. Setan a sotuni kich ach sipwe finata mi ngaw. Ekkei sossot ra mut ngeni kich ach sipwe weri sossot me fini nefinen pung me muan (nengeni Alma 12:24). Iteiten fansoun sia tipis me sise aier, sia atowawa kicheno seni Samach non Nang. Nge ika sia aier, sia arapakan ngeni Samach non Nang.

Mano non Pekin Inis

Ewe fonufan a foruta fan itach (nengeni 1 Nifai 17:36). Ewe Turutiw a atufichu an Adam me Eve repwe apwonueta an Kot kewe annuk an epwe wor nour semirit, mut ngeni kich ach sipwe feito ngeni fonufan non eu inis aion. Inisich kewe repwe mano non eu ran, nge ngunuch repwe soposopono ne manau. Inisich me ngunuch repwe chusefan nupwen sia manausefan.

Ngaseno me ren Jises Kraist

Ewe Manausefan, seni Harry Andersen

Seni ewe manamanen achasefan an Jises Kraist, sia tongeni akkufu manon inis me ewe manon ngun. Pokiten Kraist a manausefanita, aramas meinisin mi uputiw won fonufan repwe manausefanita me manau feinfeino. Me pokiten Kraist a riaffou fan iten ach tipis, sia tongeni aier me musono pwe sipwe tongeni nom sefan ren Samach non Nang.

© 2021 ren Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porouse ren Liahona Iteiten Maram, January 2022. Chuukese. 17467 901