“Txoj Kev Poob Yog Ib Feem ntawm Vajtswv txoj Hau Kev,” Liyahaunas, Ib Hlis Ntuj 2022
Zaj Lus hauv phau Liyahaunas Txhua Hli, Ib Hlis Ntuj 2022
Txoj Kev Poob Yog Ib Feem ntawm Vajtswv txoj Hau Kev
Vim muaj Txoj Kev Poob, peb muaj cib fim los rau hauv lub ntiaj teb no thiab ib hnub peb mam li rov mus nrog peb Leej Txiv Saum Ntuj Ceeb Tsheej nyob.
Adas thiab Evas nyob lub Vaj Edees, los ntawm Robert T. Barrett
Nyob hauv lub Vaj Edees, Vajtswv txib kom Adas thiab Evas tsis txhob noj cov txiv ntawm tsob ntoo ntawm kev paub qhov zoo thiab qhov phem. Ces Nws qhia nkawd, “Neb xaiv tau rau neb tus kheej, … tiam sis, nco ntsoov hais tias kuv txwv tsis pub ua li ntawd” (Mauxes 3:17). Dab Ntxwg Nyoog ntxias Evas kom nws noj cov txiv ntawm tsob ntoo. Nws qhia nws, “Neb yuav zoo li tej vaj tswv, paub qhov zoo thiab qhov phem” (Mauxes 4:11). Nws noj cov txiv thiab muab rau Adas noj. Vajtswv txib nkawd tawm ntawm lub Vaj Edees.
Txoj Kev Poob
Adas thiab Evas Raug Ntiab Tawm ntawm lub Vaj, los ntawm Gary L. Kapp, tsis pub luam
Thaum Adas thiab Evas tawm ntawm lub Vaj Edees, nkawd tsis nyob hauv Vajtswv lub xub ntiag lawm. Qhov kev sib cais ntawm Vajtswv hu ua kev tuag ntawm sab ntsuj plig. Thaum Adas thiab Evas tawm ntawm lub vaj, txhais tias nkawd yog neeg tuag thiab yuav tuag. Txawm tias Adas thiab Evas tsis nrog Vajtswv nyob lawm thiab nkawd yog neeg tuag, nkawd zoo siab thiab cia siab thaum nkawd pom tias nkawd muaj cib fim vam meej (saib Mauxes 5:10-11). “Adas poob xwv kom yuav muaj taus tib neeg; thiab muaj tib neeg xwv kom lawv yuav muaj kev xyiv fab” (2 Nifais 2:25).
Ib lub Sij Hawm Sim Peb lub Siab
Thaum peb yug los, peb nyob deb ntawm Vajtswv, ib yam li Adas thiab Evas tom qab Txoj Kev Poob. Dab Ntxwg Nyoog ntxias peb kom xaiv yuam kev. Tej kev ntxias no cia peb raug sim siab thiab xaiv tej yam yog los sis tej yam tsis yog (saib Amas 12:24). Txhua zaus peb ua txhaum thiab tsis hloov siab lees txim, peb txav mus deb ntawm Leej Txiv Saum Ntuj Ceeb Tsheej. Tiam sis yog peb hloov siab lees txim, peb yuav loj hlob thiab txav ze ntawm peb Leej Txiv Saum Ntuj Ceeb Tsheej.
Kev Tuag ntawm Sab Cev Nqaij Daim Tawv
Vajtswv tau tsim lub ntiaj teb no rau peb (saib 1-Nifais 17:36). Txoj Kev Poob ua rau Adas thiab Evas muaj peev xwm ua raws li Vajtswv tej lus txib kom yug me nyuam, ua kom peb los rau hauv lub ntiaj teb muaj ib lub cev. Muaj ib hnub peb lub cev yuav tuag, tiam sis peb tus ntsuj plig yuav muaj txoj sia nyob. Peb lub cev thiab tus ntsuj plig yuav rov qab los koom ua ke thaum peb sawv rov los.
Cawm los ntawm Yexus Khetos
Txoj Kev Sawv Rov Los, los ntawm Harry Andersen
Los ntawm lub hwj chim ntawm Yexus Khetos txoj kev theej txhoj, peb yuav kov yeej txoj kev tuag ntawm sab cev nqaij daim tawv thiab sab ntsuj plig. Vim Yexus Khetos tau sawv rov los, txhua tus uas yug los hauv lub ntiaj teb no yuav sawv rov los thiab nyob mus ib txhis. Thiab vim Yexus Khetos raug txom nyem rau peb tej kev txhaum, peb yuav hloov siab lees txim thiab txais kev zam txim kom peb thiaj li nyob nrog peb Leej Txiv Saum Ntuj Ceeb Tsheej dua.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, January 2022. Hmong. 18295 295