Paset ti Plano ti Dios ti Pannakatnag

Gapu iti Pannakatnag, umaytayo iti daga ken iti maysa nga aldaw makasublitayo nga agnaed iti denna ti Amatayo iti Langit.

Iti Minuyongan ti Eden, binilin ti Dios da Adan ken Eva a saanda a mangan iti bunga ti kayo ti pannakaammo ti naimbag ken dakes. Kalpasanna kinuna kadakuada, “Siwawayaka a mangpili iti kayatmo … ngem, laglagipem nga iparitko” (Moises 3:17). Sinulisog ni Satanas ni Eva a mangan iti bunga ti kayo. Kinunana kenkuana, “Agbalinkayo a kas kadagiti Dios, a makaammo iti naimbag ken dakes” (Moises 4:11). Nangan iti bunga ket imbinglayna daytoy ken ni Adan. Pinapanaw ti Dios ida iti Minuyongan ti Eden.

Ti Pannakatnag

Idi pinanawan da Adan ken Eva ti Minuyongan ti Eden, awandan iti imatang ti Dios. Maawagan iti naespirituan nga ipapatay daytoy a pannakaisina iti Dios. Ti ipapanaw iti minuyongan kaipapananna pay a nagbalin a mortal da Adan ken Eva ket ngarud kabaelanda ti matay. Nupay awanen da Adan ken Eva iti denna ti Dios ken nagbalindan a mortal, naragsakda ken mangnamnamada iti makitada a mabalinda ti dumur-as (kitaen iti Moises 5:10–11). “Natnag ni Adan tapno adda tao; ket ti panggep dagiti tao, ket tapno maaddaanda iti ragsak” (2 Nephi 2:25).

Maysa a Panawen ti Pannakasubok

No mayanaktayo, agbiagtayo nga adayo iti Dios, kas met iti naaramid kada Adan ken Eva kalpasan ti Pannakatnag. Sulisogennatayo ni Satanas nga agaramid kadagiti dakes a pili. Dagitoy a pannulisog ti mangipalubos kadatayo tapno masubok ken agpili iti umno ken biddut (kitaen iti Alma 12:24). Tunggal kanito nga agbasoltayo ket saantayo nga agbabawi, ad-adda nga umad-adayotayo iti nailangitan nga Ama. Ngem no agbabawitayo, ad-adda nga umas-asidegtayo iti Amatayo iti Langit.

Ipapatay ti Bagi

Naparsua ti daga para kadatayo (kitaen iti 1 Nephi 17:36). Ti Pannakatnag ti nangaramid a posible kada Adan ken Eva tapno maipatungpalda ti bilin ti Dios a maaddaan kadagiti annak, a mangipalubos kadatayo nga umay iti daga nga addaan iti pisikal a bagi. Iti maysa nga aldaw matayto dagiti bagitayo, ngem agtultuloy nga agbiag dagiti espiritutayo. Agtiponto dagiti bagi ken espiritutayo no agungartayo.

Maisalakan babaen ken ni Jesucristo

Babaen ti panangsubbot a bileg ni Jesucristo, mabalintayo a parmeken ti pisikal ken naespirituan nga ipapatay. Gapu ta nagungar ni Jesucristo, agungarto ti amin a mayanak ditoy daga ket agbiagdanto nga agnanayon. Ken gapu ta nagsagaba ni Cristo gapu kadagiti basbasoltayo, makapagbabawitayo ken mapakawantayo tapno makapagnaedtayo manen iti denna ti Amatayo iti Langit.

© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, January 2022. Ilokano. 18295 864