“Ekkewe Pwon mi pin ra Achufengenikich ngeni Kot,” Liahona, February 2022
Iteiten Maram Liahona Message, February 2022
Ekkewe Pwon mi pin ra Achufengenikich ngeni Kot
Fori me aponueta ekkewe pwon mi pin a uweato ekkewe feioch.
Ew pwon mi pin ina ew pwon nefinen Samach Non Lang me Neun semirit. I a fori koukun ewe pwon mi pin kich sia fori ngeni I. Nupwen sia fori met A tingorekich, kich sia angei chommong feioch. Me kich sise chok angei ekkewe feioch won fonufan—nupwen kich sia fori me aponueta ach kewe pwon mi pin, kich sipwe niwinsefaniti ne nomw ren Kot me ach kewe famini non lang fan ew.
Ekkewe Pwon mi Pin me Angangepin
Kich sia fori pwon mi pin fansoun ekkoch angangepin. Kich sipwe angei kana angangepin me aneasochisi kewe pwon mi pin ren ach sipwe tongeni niwin me nomw ren Kot. Kewe angangepin ra kawor meren kewe mi nomw rer wisen pristut. Kana angangepin a pachenong papatais me epinipin, angei ewe Melchizedek Pristut (ren mwan), me kewe angangepin sia angei non tempel. Fansoun ewe sakrament, chon Mwichefen ra asofosafani kewe pwon ra fen fori ngeni Kot (nengeni Doctrine and Covenants 20:77, 79).
Kewe Pwon Mi Pin ra Anisi Kich Ach Sipwe Manauoch
Otun papatais, kich sia pwon pwe sipwe tapweno mwirin Jises Kraist, chechemeni I iteitan, me aponueta an kewe annuk (nengeni Doctrine and Covenants 20:37). Kot a pwonei pwe ewe Ngun mi Fel a tongeni epwe nomw rech fansoun meinisin.
Nupwen mwan ra angei ewe pritut, ra pwon pwe repwe manauwen tupwen non an Kot pochokunen pristut. Kot a pwon epwe efeiochu ir. (Nengeni Doctrine and Covenants 84:33–40.)
Chungan ewe Recife Brazil Tempel seni James Porter
Pwon Mi Pin Kich Sia Fori non ewe Tempel
Nupwen Chon Mwichefen ra angei ar endowment non ewe tempel, ra pwon repwe manauwoch me asor fan iten ewe kapas allim. A pwon ngenir ewe manamanen Kot (nengeni Doctrine and Covenants 38:32; 109:22).
Fansoun riri non tempel, kewe pupunu emon mwan me fefin ra epupunu fengen feinfeino me pwon ar repwe nukuchar nefiner me ngeni Kot. Kot a pwon pwe repwe tongeni niwin ngeni I me nomw fengen ren famini feinfeino. (Nengeni Doctrine and Covenants 132:19–20.)
Kich Ekkewe Aramas Pwon
Ekkewe ra choni Ewe Mwichefenin Jises Kraist ren Aramas mi Pin Non Fansoun Soponon ra winiti noun Kot aramas pwon. Ra pwan angei kewe feioch me wiis ren ewe pwon an Abraham (nengeni Galatians 3:27–29). Ren ach choni an Kot mwichen aramas pwon wewen kich sipwe anisi emon me emon kich ach sia feito me kan ngeni Kraist. Apwan wewe ngeni pwe kich sia angang ren epochokunen an Kot ewe Mwichefen won fonufan. Nupwen sia aponueta ach kewe pwon mi pin, kich sia tongeni kuna manamanen me pochokun seni Kot.
© 2022 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porous ren Liahona Iteiten Maram, February 2022. Chuukese. 18313 901