“Ang mga Kasugtanan Nagaangot sa Aton sa Dios,” Liahona, Pebrero 2022
Bulanan nga Mensahe sa Liahona, Pebrero 2022
Ang mga Kasugtanan Nagaangot sa Aton sa Dios
Ang paghimo kag pagtuman sang mga kasugtanan nagadala sang mga bugay.
Ang kasugtanan isa ka promisa sa tunga sang Amay nga Langitnon kag sang Iya mga anak. Nagapahamtang Sia sang mga kondisyon sa mga kasugtanan nga aton ginahimo upod sa Iya. Kon himuon naton ang Iya ginapangayo, makabaton kita sang madamo nga mga bugay. Kag indi lang kita makabaton sang mga bugay sa duta—kon maghimo kita kag magtuman sang mga kasugtanan, makabalik kita sa pagpuyo upod sa Dios kag sa aton mga pamilya sa langit sa pila ka adlaw.
Mga Kasugtanan kag Mga Ordinansa
Nagahimo kita sang mga kasugtanan sa pila ka mga ordinansa. Kinahanglan naton nga mabaton ina nga mga ordinansa kag tumanon ina nga mga kasugtanan para makabalik kita sa pagpuyo upod sa Dios. Ang mga ordinansa ginahikot paagi sa awtoridad sang priesthood. Ina nga mga ordinansa nagalakip sang bunyag kag kumpirmasyon, pagbaton sang Melchizedek Priesthood (sa mga lalaki), kag sang mga ordinansa nga aton mabaton sa templo. Sa tion sang sakramento, ang mga miyembro sang Simbahan nagapabakod sang mga promisa nga ila ginhimo sa Dios (tan-awa sa Doktrina kag mga Kasugtanan 20:77, 79).
Ang mga Kasugtanan Nagabulig sa Aton nga Magpangabuhi sing Matarong
Sa tion sang bunyag, nagapromisa kita nga sundon si Jesucristo, panumdumon Sia pirme, kag tumanon ang mga kasuguan (tan-awa sa Doktrina kag mga Kasugtanan 20:37). Nagapromisa ang Dios nga ang Balaan nga Espiritu mahimo nga makaupod naton pirme.
Kon mabaton sang mga lalaki ang priesthood, nagapromisa sila nga magpangabuhi nga angayan sang gahum sang priesthood sang Dios. Nagapromisa ang Dios nga bugayan sila. (Tan-awa sa Doktrina kag mga Kasugtanan 84:33–40.)
Ilustrasyon sang Templo sang Recife Brazil ni James Porter
Mga Kasugtanan nga Aton Ginahimo sa Templo
Kon mabaton sang mga miyembro sang Simbahan ang ila endowment sa templo, nagapromisa sila nga magpangahuhi sing matarong kag magsakripisyo para sa ebanghelyo. Ginapromisahan sila sang gahum halin sa Dios (tan-awa sa Doktrina kag mga Kasugtanan 38:32; 109:22).
Sa pagselyo sa templo, ang bana kag asawa ginakasal tubtob sa wala katapusan kag nagapromisa nga mangin tampad sa isa kag isa kag sa Dios. Ang Dios nagapromisa nga makabalik sila sa pagpuyo upod sa Iya kag magkabuhi bilang mga pamilya sa wala katubtuban. (Tan-awa sa Doktrina kag mga Kasugtanan 132:19–20.)
Kita Katawhan sa Kasugtanan
Ang mga nagapa-miyembro sa Ang Simbahan ni Jesucristo sang mga Santos sa Ulihing mga Adlaw mangin mga katawhan sang Dios sa kasugtanan. Nagapanubli man sila sang mga bugay kag responsibilidad sang kasugtanan kay Abraham (tan-awa sa Taga-Galacia 3:27–29). Ang mangin bahin sang katawhan sa kasugtanan sang Dios nagakahulugan nga buligan naton ang isa kag isa samtang mas nagapalapit kita kay Cristo. Nagakahulugan man ini nga magpangabudlay kita para pabakuron ang Simbahan sang Dios sa duta. Kon ginatuman naton ang aton mga kasugtanan, makabaton kita sang gahum kag kusog halin sa Dios.
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, February 2022. Hiligaynon. 18313 861