Dagiti Katulagan ti Mangikonekta Kadatayo iti Dios

Ti panagaramid ken panagtungpal kadagiti katulangan ket mangyeg kadagiti bendision.

Ilawlawag a ti katulagan ket maysa a kari iti nagbaetan ti Nailangitan nga Ama ken dagiti annakna. Itudingna dagiti kondision para kadagiti katulagan nga armidentayo Kenkuana. No aramidentayo ti idawatna, umawattayo iti adu a bendision. Ken saantayo laeng magun-od dagiti bendision iti daga—no aramiden ken tungpalentayo dagiti katulagan, agsublitayonto a makipagnaed iti Dios ken dagiti pamiliatayo iti langit iti maysa nga aldaw.

Dagiti Katulagan ken Ordinansa

Aramidentayo dagiti katulagan kabayatan dagiti masinunuo nga ordinansa. Nasken nga awatentayo dagita nga ordinansa ken tungpalentayo dagita nga ordinansa tapno makasublitayo a makipagnaed iti Dios. Maannong dagiti ordinansa babaen ti turay ti priesthood. Iraman dagita nga ordinansa ti panagbuniag ken kumpirmasion, panangawat iti Melchizedek Priesthood (para kadagiti lallaki), ken dagiti ordinansa nga awatentayo iti templo. Kabayatan ti sakramento, pabaruen dagiti miembro ti Simbaan dagiti kari nga inaramidda iti Dios (kitaen iti Doktrina ken Katulagan 20:77, 79).

Tulongandatayo dagiti Katulagan nga Agbiag a Sililinteg

Kabayatan ti panagbuniag, ikaritayo a suroten ni Jesucristo, kanayon a laglagipen Isuna, ken tungpalen dagiti bilinna (kitaen iti Doktrina ken Katulagan 20:37). Ikari ti Dios a mabalin a kanayon a kadkaduatayo ti Espiritu Santo.

No umawat dagiti lallaki iti priesthood, ikarida ti agbiag a maikari iti bileg ti priesthood ti Dios. Ikari ti Dios a bendisionanna ida. (Kitaen iti Doktrina ken Katulagan 84:33–40.)

Dagiti Katulagan nga Aramidentayo iti Templo

No umawat dagiti miembro ti Simbaan iti endowmentda iti templo, ikarida ti agbiag a sililinteg ken agsakripisio para iti ebanghelio. Naikari kadakuada ti bileg manipud iti Dios (kitaen iti Doktrina ken Katulagan 38:32; 109:22).

Kabayatan ti pannakailantip iti templo, agkallaysa dagiti agassawa para iti kinaagnanayon ken agkari nga agbalin a napudno iti tunggal maysa ken iti Dios. Ikari ti Dios a makapagsublida Kenkuana ken agbiag kas pamilia iti agnanayon. (Kitaen iti Doktrina ken Katulagan 132:19–20.)

Datayo dagiti Natulagan a Tattao

Agbalin a natulagan a tattao ti Dios dagiti agkameng iti Ti Simbaan ni Jesucristo dagiti Santo iti Ud-udina nga Aldaw. Tawidenda pay dagiti bendision ken pagrebbengan ti katulagan ni Abraham ( kitaen iti Taga Galacia 3:27–29. Ti panagbalin a paset ti natulagan a tattao ti Dios kayatna a sawen nga agtitinnulongtayo bayat ti yaasidegtayo ken ni Cristo. Kayatna pay a sawen nga agtrabahotayo a mangpapigsa iti Simbaan ti Dios iti daga. No tungpalentayo dagiti katulagantayo, makasaraktayo iti bileg ken pigsa manipud iti Dios.

© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2022. Ilokano. 18313 864